ബിജെപിക്ക് ഒരു നാലഞ്ച് സീറ്റ് ഈ തെരഞ്ഞെടുപ്പില്‍ കിട്ടിയിരുന്നെങ്കില്‍ എല്ലാം മാറിയേനെ. പല കോണ്‍ഗ്രസ് നേതാക്കളും ബിജെപിയിലേക്ക് ചേക്കേറിയേനെ. 35 സീറ്റുവരെ കിട്ടുമെന്നും ശ്രീധരന്‍ മുഖ്യമന്ത്രിയാകുമെന്നും സുരേന്ദ്രന്‍ പറഞ്ഞപ്പോള്‍ മലയാളികള്‍ അറിയാതെ വിശ്വസിച്ചുപോയി.

കുറച്ച് സീറ്റ് കിട്ടിയെങ്കില്‍ പതുക്കെ പതുക്കെ ബിജെപിക്ക് പ്രതിപക്ഷത്തേക്കും പിന്നെ ഭരണപക്ഷത്തേക്കും എത്താന്‍ കഴിഞ്ഞേനെ. എന്നാല്‍ ഒരാളെപ്പോലും ബിജെപിക്ക് ജയിപ്പിക്കാനാകാത്തതോടെ രക്ഷപ്പെട്ടത് കോണ്‍ഗ്രസാണ്. അല്ലെങ്കില്‍ പല കോണ്‍ഗ്രസുകാരും ബിജെപിയിലേക്ക് ചേക്കേറിയേനെ.

ഇരട്ടത്തോല്‍വിയുടെ ആഘാതത്തിലാണ് ബിജെപിയും സംസ്ഥാന അധ്യക്ഷന്‍ കെ.സുരേന്ദ്രനും. പാര്‍ട്ടിക്ക് സ്വാധീനമുണ്ടെന്നു കരുതിയ രണ്ട് സീറ്റുകളില്‍ പുതിയ പരീക്ഷണമെന്ന നിലയില്‍ സംസ്ഥാന അധ്യക്ഷനെ ഒരേ സമയം പോരിനിറക്കി പരാജയം ഏറ്റുവാങ്ങിയതിന്റെ നഷ്ടത്തിലും നാണക്കേടിലുമാണ് പാര്‍ട്ടിയും സംസ്ഥാന അധ്യക്ഷനും. മഞ്ചേശ്വരത്ത് ഒരുക്കല്‍ക്കൂടി പരാജയം ഏറ്റുവാങ്ങിയ സുരേന്ദ്രന്, കോന്നിലും രണ്ടാം പരാജയമാണ്.

2016 ല്‍ മഞ്ചേശ്വരത്ത് 89 വോട്ടിനാണ് തോറ്റതെങ്കില്‍ ഇത്തവണ പരാജയത്തിന്റെ ആഴം കൂടി. അവസാന നിമിഷം വരെ പൊരുതിയ സുരേന്ദ്രന്‍ 3000ത്തിലേറെ വോട്ടിനാണ് ഒരിക്കല്‍ കൂടി പരാജയപ്പെട്ടത്.




കഴിഞ്ഞ തവണ എതിരാളിയായിരുന്ന അബ്ദുല്‍ റസാക്കിന്റെ രണ്ടാം മല്‍സരത്തിലാണ് സുരേന്ദ്രന്‍ 89 വോട്ടിന് തോറ്റത്. എന്നാല്‍ അബ്ദുല്‍ റസാക്കിന്റെ മരണത്തെ തുടര്‍ന്നു ഉപതിരഞ്ഞെടുപ്പില്‍ വിജയിച്ച കമറുദീന്‍ ജ്വല്ലറി ഇടപാട് കേസില്‍പ്പെട്ടതോടെ മല്‍സരരംഗം വിട്ടത് തനിക്കനുകൂലമാവും എന്നായിരുന്നു സുരേന്ദ്രന്റെ പ്രതീക്ഷ. പുതുമുഖത്തെ രംഗത്തിറക്കി ലീഗ് നടത്തിയ പരീക്ഷണം ഒരിക്കല്‍ക്കൂടി സുരേന്ദ്രന് തിരിച്ചടിയായി. രണ്ട് ദിവസം മാത്രമേ പ്രചാരണത്തിനിറങ്ങിയുള്ളൂവെങ്കിലും പ്രവര്‍ത്തകര്‍ നടത്തിയ ചിട്ടയായ പ്രവര്‍ത്തനം വഴി വിജയം നേടാം എന്ന സുരേന്ദ്രന്റെ പ്രതീക്ഷയും അസ്ഥാനത്തായി.

അതേസമയം, ശബരിമല സമര നായകന്‍ എന്ന പരിവേഷത്തോടെ പത്തനംതിട്ട ജില്ലയിലെ കോന്നിയില്‍ ഒരിക്കക്കല്‍ക്കൂടി പോരിനിറങ്ങിയ സുരേന്ദ്രന് അവിടെയും കാലിടറി. 2019 ല്‍ ലോക്‌സഭാ തിരഞ്ഞെടുപ്പില്‍ കോന്നി മണ്ഡലത്തില്‍ 40,000 ല്‍ പരം വോട്ട് നേടിയ സുരേന്ദ്രന്‍ 2019 ല്‍ നടന്ന ഉപതിരഞ്ഞെടുപ്പില്‍ 39786 വോട്ടു നേടിയിരുന്നു. എന്നാല്‍ കേരളത്തില്‍ രണ്ട് മണ്ഡലങ്ങളില്‍ മത്സരിച്ച ഏക സ്ഥാനാര്‍ഥിയായ സുരേന്ദ്രന് ഇത്തവണയും കോന്നിയില്‍ മൂന്നാം സ്ഥാനമേ നേടാനായുള്ളൂ.

പാര്‍ട്ടി സംസ്ഥാന അധ്യക്ഷന്‍ എന്നതിനൊപ്പം ശബരിമല സമരനായകനെന്ന് പേരെടുത്ത സുരേന്ദ്രന് പക്ഷേ, വിശ്വാസ സമൂഹത്തിന്റെ മനംകവരാനായില്ലെന്നത് ബിജെപിയെയും സുരേന്ദ്രനെയും ഒരുപോലെ ചിന്തിപ്പിക്കുന്നതാണ്. ഒപ്പം സുരേന്ദ്രന്റെ നേതൃത്വത്തിനെതിരെ തുടക്കംമുതല്‍ പൊരുതുന്നവര്‍ക്ക് കൂടുതല്‍ കുത്തു പകരുന്നതാണ് പാര്‍ട്ടിയുടെ സംസ്ഥാനത്തെ തകര്‍ച്ചയും സുരേന്ദ്രന്റെ വ്യക്തിപരമായ തോല്‍വിയും.

രണ്ടിടങ്ങളില്‍ മത്സരിക്കുന്നത് ശരില്ലെന്ന ഒരു വിഭാഗത്തിന്റെ വിമര്‍ശനം തള്ളിയാണ് കേന്ദ്ര നേതൃത്വം സുരേന്ദ്രനെ രണ്ടിടത്തും പോരിനിറക്കിയത്. വിമര്‍ശകരുടെ വാദം ശരിവയ്ക്കുന്നതുകൂടിയായി മത്സരം ഫലം. സൗഭാഗ്യം എന്നാണ് ശോഭ സുരേന്ദ്രന്‍ വിശേഷിപ്പിച്ചത്.

സുരേന്ദ്രനെ വിശ്വസിച്ചാണ് ഹെലീകോപ്ടര്‍ പോലും നല്‍കിയത്. എന്നാല്‍ ഹെലീകോപ്ടറിന്റെ വാടക പോലും കിട്ടാത്തതായിരുന്നു ഫലം. സമ്പൂര്‍ണ തോല്‍വിയിലായ സുരേന്ദ്രനെ മിസോറാം ഗവര്‍ണറാക്കുമോ എന്നാണ് സകലരും നോക്കുന്നത്. എന്നാല്‍ ഒന്നും നേടാത്ത സുരേന്ദ്രനെ മിസോറാമില്‍ എന്തിന് ഗവര്‍ണറാക്കണമെന്ന ചോദ്യമാണ് ഉയരുന്നത്.