നിലവിലെ കടലാസ് നോട്ടുകള്‍ക്ക് പകരം പ്ലാസ്റ്റിക് (പോളിമര്‍) ഉപയോഗിച്ച് നിര്‍മിക്കുന്ന നോട്ടുകള്‍ പുറത്തിറക്കാനുള്ള റിസര്‍വ് ബാങ്ക് (ആര്‍ബിഐ) നിര്‍ദേശത്തിന് കേന്ദ്രധനമന്ത്രാലയത്തിന്റെ അംഗീകാരം. പരീക്ഷണാടിസ്ഥാനത്തില്‍ 10ന്റേയും 20ന്റേയും 100 കോടി വീതം എണ്ണം പോളിമര്‍ നോട്ടുകളാണ് ആദ്യഘട്ടത്തില്‍ പുറത്തിറക്കുക. പരീക്ഷണം വിജയിച്ചാല്‍ പ്ലാസ്റ്റിക് നോട്ടുകള്‍ വ്യാപകമാക്കും. കേന്ദ്ര ധനകാര്യ സഹമന്ത്രി പങ്കജ് ചൗധരി ലോക്‌സഭയില്‍ ചോദ്യത്തിന് രേഖാമൂലമുള്ള മറുപടിയായാണ് ഇക്കാര്യം സ്ഥിരീകരിച്ചത്.

പ്ലാസ്റ്റിക് നോട്ടുകള്‍ പുറത്തിറക്കാന്‍ റിസര്‍വ് ബാങ്ക് പദ്ധതിയിടുന്നതായി കഴിഞ്ഞമാസം തന്നെ റിപ്പോര്‍ട്ടുകള്‍ പുറത്തുവന്നിരുന്നു. കടലാസ് നോട്ടുകളെ അപേക്ഷിച്ച് പോളിമര്‍ നോട്ടുകള്‍ കൂടുതല്‍ കാലം ഈടുനില്‍ക്കും എന്നതാണ് റിസര്‍വ് ബാങ്ക് ഇതിന് ന്യായമായി പറഞ്ഞത്. കൂടാതെ ഉയര്‍ന്ന പണവിനിമയം നടക്കുന്ന സമ്പദ് വ്യവസ്ഥകള്‍ക്ക് അനുയോജ്യമാണ് ഇത്തരം നോട്ടുകളെന്നും ആര്‍ബിഐ പറയുന്നു.

പുതിയ നീക്കം കടലാസ് കറന്‍സിയുടെ അന്ത്യത്തെയല്ല സൂചിപ്പിക്കുന്നതെന്ന് കേന്ദ്രസര്‍ക്കാര്‍ വ്യക്തമാക്കി. നിലവിലുള്ള കടലാസ് കറന്‍സികള്‍ക്കൊപ്പമാണ് പ്ലാസ്റ്റിക് നോട്ടുകളും വിനിമയം ചെയ്യപ്പെടുക. പ്ലാസ്റ്റിക് നോട്ടുകള്‍ എത്തുന്നതിനനുസരിച്ച് കടലാസ് നോട്ടുകള്‍ നിര്‍ത്തലാക്കാന്‍ ഉദ്ദേശിക്കുന്നില്ലെന്നും കേന്ദ്രസര്‍ക്കാര്‍ പറയുന്നു. കടലാസ് കറന്‍സികള്‍ പൂര്‍ണമായും പ്ലാസ്റ്റിക്കിലേക്ക് മാറ്റാനുള്ള ആലോചന ഇപ്പോഴില്ലെന്ന് ലോക്‌സഭയിലെ മറുപടിയില്‍ മന്ത്രി പങ്കജ് ചൗധരി വ്യക്തമാക്കി.

പോളിമര്‍ നോട്ടുകള്‍ ഡിജിറ്റല്‍ പെയ്മന്റുകളെ ബാധിക്കുമോ എന്ന് ഇപ്പോള്‍ പറയാന്‍ കഴിയില്ലെന്നും റിസര്‍വ് ബാങ്ക് പറയുന്നു. നോട്ടുകള്‍ പ്രചാരത്തിലെത്തിയ ശേഷമേ ഇക്കാര്യം വിലയിരുത്താന്‍ കഴിയൂ. കറന്‍സികളും ഡിജിറ്റല്‍ പെയ്‌മെന്റും പരസ്പരപൂരകമായ പണ വിനിമയ രീതികളാണെന്നും അവ തുടര്‍ന്നും നിലനില്‍ക്കുമെന്നാണ് പ്രതീക്ഷിക്കുന്നതെന്നും ആര്‍ബിഐ പറഞ്ഞു.

ആഗോളതലത്തില്‍ ഓസ്‌ട്രേലിയ ആണ് പോളിമര്‍ കറന്‍സി ആദ്യം ഉപയോഗിച്ചു തുടങ്ങിയത്. 1988ല്‍. നിലവില്‍ അറുപതോളം രാജ്യങ്ങള്‍ പ്ലാസ്റ്റിക് കറന്‍സി ഉപയോഗിക്കുന്നുണ്ട്. 2025'26 സാമ്പത്തിക വര്‍ഷം കറന്‍സിനോട്ടുകള്‍ അച്ചടിക്കാന്‍ 4,875.2 കോടി രൂപയാണ് ചെലവുവന്നത്. തൊട്ടു മുന്‍വര്‍ഷമിത് 6,372 കോടിയായിരുന്നു. 2025'26 സാമ്പത്തികവര്‍ഷം 1,702 കോടി മുഷിഞ്ഞ നോട്ടുകള്‍ പൊതുവിപണിയില്‍നിന്ന് പിന്‍വലിച്ച് ആര്‍.ബി.ഐ. നശിപ്പിച്ചിരുന്നു. 2024'25ലിത് 2,386 കോടിയെണ്ണമായിരുന്നു.