പിസി ട്വിസ്റ്റോട് ട്വിസ്റ്റ്... വോട്ടെണ്ണലിന് തലേ ദിവസവും താന് ജയിക്കുമെന്നും താനും ബിജെപിയിലെ ടീച്ചറും കൂടി ആര് ഭരിക്കണമെന്ന് തീരുമാനിക്കുമെന്ന് പറഞ്ഞ പിസി ജോര്ജിനെ കാണാനില്ല; വീണ്ടും പിസി ജോര്ജ് വാര്ത്തകളില് നിറയുന്നത് ഒരു യുവാവിന്റെ വെല്ലുവിളി വീഡിയോയില് നിന്നാണ്; വെല്ലുവിളി ഏറ്റെടുത്ത് പിസി ജോര്ജ്
പിസി ജോര്ജെന്ന അതികായന് അടിതെറ്റിയ തെരഞ്ഞെടുപ്പായി ഇതുമാറി. അല്ലെങ്കില് നോക്കണേ വോട്ടെണ്ണലിന്റെ തലേദിവസവും പത്രസമ്മേളനം നടത്തി പിസി ജോര്ജ് പറഞ്ഞത്, കേരളം ആരു ഭരിക്കുമെന്ന് താന് തീരുമാനിക്കുമെന്നാണ്.
സംസ്ഥാനത്ത് തൂക്കുസഭ വരുമെന്ന് പി.സി ജോര്ജ്ജ് പറഞ്ഞത്. പൂഞ്ഞാറില് താന് 50000 വോട്ട് നേടി ജയിക്കും. കേരളം ആര് ഭരിക്കുമെന്ന് താനും ബി.ജെ.പിയും ചേര്ന്ന് തീരുമാനിക്കുമെന്നും പി സി മീഡിയവണിനോട് പറഞ്ഞു. ആരെല്ലാം എന്ത് നുണപ്രചരണം നടത്തിയാലും എന്ത് ഗുണ്ടായിസം നടത്തിയാലും പൂഞ്ഞാറിലെ ജനങ്ങള് എന്റെ കൂടെ കാണും. എന്നെ പരാജയപ്പെടുത്താന് ദൈവം തമ്പുരാന് വിചാരിക്കാത്തിടത്തോളം കാലം ആര്ക്കും സാധിക്കില്ല.
പൂഞ്ഞാറിലെ ജനങ്ങള് എന്നെ ഉപേക്ഷിക്കില്ല. നൂറ് ശതമാനം ആത്മവിശ്വാസമുണ്ട്. പതിനായിരം മുതല് അന്പതിനായിരം വരെ ഭൂരിപക്ഷം നേടും. ഈരാട്ടുപേട്ടയിലെ മുസ്ലിം സഹോദരങ്ങളെ തെറ്റിദ്ധരിപ്പിച്ച് കുറെയേറെ വോട്ട് പോയിട്ടുണ്ട്.
ഭരണത്തുടര്ച്ചയുണ്ടാകില്ല. യു.ഡി.എഫിന് 68 സീറ്റ് കിട്ടും. എല്.ഡി.എഫിന് 70 സീറ്റ് കിട്ടും. ബി.ജെ.പിക്ക് ഒന്നോ രണ്ടോ സീറ്റ് കിട്ടും. ബിജെപിയിലെ ടീച്ചറും ഞാനും കൂടി തീരുമാനിക്കും കേരളം ആര് ഭരിക്കണമെന്നും പിസി ജോര്ജ് പറഞ്ഞിരുന്നു.
എന്നാല് തെരഞ്ഞെടുപ്പ് ഫലം വന്നതോടെ എല്ലാം മാറി. വീറും വാശിയും ഏറിയ മത്സരം നടന്ന തെരഞ്ഞെടുപ്പില് തട്ടകം കൈവിട്ട് പിസി ജോര്ജ്ജ് കനത്ത തോല്വിയാണ് ഏറ്റുവാങ്ങിയത്.
ഏഴ് തവണ പൂഞ്ഞാറില് ജയിച്ച് കയറിയ പിസി ജോര്ജ്ജ് ഇത്തവണയും മുന്നണി ചട്ടക്കൂടില് നിന്ന് മാറി ജനപക്ഷം സ്ഥാനാര്ത്ഥിയായാണ് മത്സരത്തിന് ഇറങ്ങയതെങ്കിലും പൂഞ്ഞാറിന്റെ ജനവിധി ഇടതുമുന്നണി സ്ഥാനാര്ത്ഥി സെബാസ്റ്റ്യന് കുളത്തുങ്കലിന് ഒപ്പം നിന്നു. യുഡിഎഫ് സ്ഥാനാര്ത്ഥിയായി ടോമി കല്ലാനിയും എന്ഡിഎ സ്ഥാനാര്ത്ഥിയായി എംപി സെന്നും ആണ് മത്സര രംഗത്ത് ഉണ്ടായിരുന്നത്.
ഈരാറ്റുപേട്ട നഗരസഭയും ഒമ്പത് പഞ്ചാത്തുകളും ചേര്ന്ന പൂഞ്ഞാര് കേരളത്തിലെ തന്നെ ഏറ്റവും വലിയ നിയമസഭാമണ്ഡലം കൂടിയാണ് . മുസ്ലീം ക്രിസ്ത്യന് വിഭാഗങ്ങള്ക്ക് മുന്തൂക്കം ഉള്ള മേഖലകളില് പരമ്പരാഗത ശക്തി കേന്ദ്രങ്ങള് പോലും ഇത്തവണ പിസി ജോര്ജ്ജിനെ കൈവിട്ടു.
അതേസമയം പൂഞ്ഞാറില് പരാജയപ്പെട്ട ജനപക്ഷം സ്ഥാനാര്ത്ഥി പി.സി. ജോര്ജിനെ ഭീഷണിപ്പെടുത്തി യുവാവ് രംഗത്തെത്തിയത് വലിയ വിവാദമായി. ഫേസ്ബുക്ക് വീഡിയോയിലൂടെയാണ് യുവാവിന്റെ ഭീഷണി. ഈരാറ്റുപേട്ട പരിസരത്ത് ജോര്ജിനെക്കണ്ടാല് പേപ്പട്ടിയെ തല്ലുന്നതുപോലെ ഞങ്ങള് തല്ലുമെന്ന് സോഷ്യല് മീഡിയയില് പ്രചരിക്കുന്ന വീഡിയോയില് പറയുന്നു.
ഒരു ഇലക്ഷന് ഒക്കെയാകുമ്പോള് വിജയവും പരാജയവും ഒക്കെ സംഭവിക്കും. സ്വാഭാവികം. പക്ഷേ ഒരു ഈരാറ്റുപേട്ടക്കാരന് എന്ന നിലയ്ക്ക് പി.സി. ജോര്ജിനോട് എനിക്ക് പറയാനുള്ളത് ഒറ്റ കാര്യമേ ഉള്ളൂ. ഒരു എം.എല്.എയെ തല്ലി എന്ന മോശപ്പേര് പേട്ടക്കാര്ക്ക് വരാതിരിക്കാന് വേണ്ടി വെയ്റ്റ് ചെയ്തതാണ്. ഇനി ഈരാറ്റുപേട്ട പരിസരത്ത് നിന്നെ കണ്ടാല് പേപ്പട്ടിയെ തല്ലുന്നത് പോലെ നിന്നെ ഞങ്ങള് തല്ലും. തല്ലും എന്നുപറഞ്ഞാ തല്ലും. എന്ന് യുവാവ് വീഡിയോയില് പറയുന്നു.
എന്നാല് വീഡിയോയില് കാണുന്ന യുവാവ് ഈരാറ്റുപേട്ടക്കാരനാകാന് സാദ്ധ്യതയില്ലെന്ന് പി.സി. ജോര്ജ് പ്രതികരിച്ചു. അയ്യാളെ ഞാന് കണ്ടിട്ടില്ല. അവന് പറയുന്നിടത്ത് ഞാന് ചെല്ലാം, തന്റേടമുണ്ടെങ്കില് തല്ലട്ടെ. എസ്.ഡി.പി.ഐ എന്ന തീവ്രവാദ സംഘടന മനപൂര്വ്വം മുസ്ലീം സമുദായത്തെ മുഴുവന് ഞാന് ചീത്ത പറഞ്ഞു എന്ന് കളളപ്രചരണം നടത്തി തനിക്കെതിരായി വോട്ടുചെയ്യിച്ചു എന്നും ജോര്ജ് പറഞ്ഞു.
"
https://www.facebook.com/Malayalivartha