ട്രിപ്പിള്‍ ലോക്ക് ഡൗണ്‍ പ്രഖ്യാപിക്കപ്പെട്ട തിരുവനന്തപുരത്ത് നടക്കുന്ന രണ്ടാം പിണറായി സര്‍ക്കാരിന്റെ സത്യപ്രതിജ്ഞാ ചടങ്ങില്‍ നിന്നും കോവിഡ് വൈറസിന് വിലക്കോ?

രാജ്ഭവനില്‍ സത്യപ്രതിജ്ഞ നടത്താമെന്ന് മുഖ്യമന്ത്രി പറഞ്ഞിട്ടും സി പി എം നേതൃത്വമാണ് അതിനെ സെന്‍ട്രല്‍ സ്റ്റേഡിയത്തിലേക്ക് മാറ്റിയതെന്നാണ് സൂചന.സത്യപ്രതിജ്ഞ വര്‍ണാഭമായി നടത്തണമെന്ന ആവശ്യമാണ് അവര്‍ മുന്നോട്ടു വച്ചത്. ഉയര്‍ന്ന സര്‍ക്കാര്‍ ഉദ്യോഗസ്ഥര്‍ക്കും ചടങ്ങ് രാജ് ഭവനില്‍ നടത്താനായിരുന്നു താത്പര്യം.

750 പേരെയാണ് ചടങ്ങില്‍ ഉദ്ദേശിക്കുന്നതെങ്കിലും 3000 പേരെങ്കിലും എത്തുമെന്നാണ് പോലീസ് പോലും പ്രതീക്ഷിക്കുന്നത്. എന്നാല്‍ ഇതിനെതിരെ പ്രതികരിക്കാന്‍ എസ് എസ് ലാല്‍ എന്ന ആരോഗ്യ വിദഗ്ദ്ധന്‍ ഒഴികെ മറ്റാരും രംഗത്തില്ല.

തൃശൂര്‍ പൂരം കാണാന്‍ രണ്ടു ഡോസ് കോവിഡ് വാക്‌സിന്‍ എടുത്ത സര്‍ട്ടിഫിക്കേറ്റ് വേണമെന്ന നിബന്ധന പോലും സെന്‍ട്രല്‍ സ്റ്റേഡിയത്തിലെ സത്യപ്രതിജ്ഞാ ചടങ്ങിനില്ല. പൊതുജനങ്ങള്‍ക്ക് പ്രവേശനമില്ലെന്ന ന്യായമാണ് ഇതിന് സര്‍ക്കാര്‍ മുന്നോട്ടു വയ്ക്കുന്നത്.

പുതിയ മന്ത്രിസഭയുടെ സത്യപ്രതിജ്ഞാ ചടങ്ങ് വിപുലമായി നടത്തി കോവിഡ് പടര്‍ത്തരുതെന്ന് കഴക്കൂട്ടത്തെ കോണ്‍ഗ്രസ് സ്ഥാനാര്‍ഥിയായിരുന്ന ഡോ. എസ്.എസ്. ലാല്‍ ഫെയ്‌സ് ബുക്കില്‍ കുറിച്ചത് കഴിഞ്ഞ ദിവസമാണ് . സംസ്ഥാനത്ത് ഭരണമാണ് വേണ്ടതെന്നും അതിന് ലളിതമായ സത്യപ്രതിജ്ഞാ ചടങ്ങാണ് വേണ്ടതെന്നും അദ്ദേഹം പറഞ്ഞു.

സത്യപ്രതിജ്ഞ സെന്‍ട്രല്‍ സ്റ്റേഡിയത്തില്‍ ആഘോഷമായി നടത്തരുത്. അതിനുള്ള ശ്രമങ്ങള്‍ ജനവിരുദ്ധമാണ്. കൊവിഡ് രോഗം വ്യാപകമായി പടര്‍ന്ന് എല്ലായിടത്തും മരണങ്ങള്‍ സംഭവിക്കുകയാണ്. നാട്ടുകാരോടാണ് സര്‍ക്കാരിന് കടപ്പാടെങ്കില്‍ ആഘോഷ ആഭാസത്തിന് കൂട്ടുനില്‍ക്കരുതെന്നും അദ്ദേഹം ആവശ്യപ്പെട്ടു.



സംസ്ഥാനത്തെ ഭരണ സ്തംഭനം പരിഹരിക്കാന്‍ എത്രയും വേഗം പുതിയ സര്‍ക്കാര്‍ സത്യപ്രതിജ്ഞ ചെയ്യണം. ഭരണമാണ് വേണ്ടത്.

ചികിത്സയ്ക്ക് ഐ.സി. യൂണിറ്റ് പോയിട്ട് കട്ടില്‍ പോലും ഇല്ലാത്ത അവസ്ഥയാണ്. ഇനിയും രോഗികള്‍ ഉണ്ടായാല്‍ ആശുപത്രിയില്‍ കയറാനാകാതെ വഴിയില്‍ കിടന്ന് നമ്മള്‍ മരിച്ചെന്നു വരും.

തൊഴിലില്ലാതെ ലക്ഷക്കണക്കിന് കുടുംബങ്ങള്‍ പട്ടിണിയിലാണ് . മരിച്ചവരുടെ ശരീരവുമായി ബന്ധുക്കള്‍ ശ്മശാനങ്ങളില്‍ കാത്തു നില്‍ക്കുകയാണ്. കേരളം ഒരു മരണ വീടാണ്. ഇവിടെ ആഘോഷം നടത്തരുത്.

സാംസ്‌കാരിക സാഹിത്യ നായകരെ ഇരുത്താന്‍ അവിടെ കസേര ഒരുക്കിയിട്ടുണ്ടെന്ന് വാര്‍ത്തയില്‍ കണ്ടു. ഈ നായകര്‍ക്ക് കടപ്പാട് അവരെ വളര്‍ത്തുന്ന നാട്ടുകാരോടാണെങ്കില്‍ ഈ ആഘോഷ ആഭാസത്തിന് കൂട്ടുനില്‍ക്കരുത്. അഥവാ കൂട്ടുനിന്ന് രോഗവ്യാപനം ഉണ്ടാക്കിയാല്‍ പിന്നീട് മരിച്ചവരുടെ പേരില്‍ കവിതയും കഥയും എഴുതി കരയാനും വായിച്ചു കേള്‍പ്പിക്കാനും വരരുത്.

അമ്മാവന് അടുപ്പിലും ആകാം എന്നത് ഈ കാലഘട്ടത്തിലെ കേരളത്തിന് ദൂഷണമല്ല. മുഖ്യമന്ത്രി തീരുമാനം തിരുത്തണമെന്നും ലാല്‍ പറഞ്ഞു. ചെന്നിത്തലയും ഉമ്മന്‍ ചാണ്ടിയുമൊന്നും ഇക്കാര്യം അറിഞ്ഞ മട്ടേയില്ല.

തിരുവന്തപുരത്ത് ആശുപത്രിക്ക് കിടക്കക്കും ശ്മശാനത്തിനും വേണ്ടി ജനങ്ങള്‍ ഓടുകയാണ്. തിരുവനന്തപുരത്തെ വിദൂര ഗ്രാമമായ മാറനല്ലൂര്‍ ശ്മശാനത്തില്‍ ശവസംസ്‌കാരം നടത്തണമെങ്കില്‍ പോലും ദിവസങ്ങള്‍ കാത്തിരിക്കേണ്ട അവസ്ഥയാണ് നിലവിലുള്ളത്. തന്നെ ഒരിക്കല്‍ കൂടി അധികാരത്തിലെത്തിച്ച ജനങ്ങളോട് മുഖ്യമന്ത്രി നീതി പുലര്‍ത്തിയിരുന്നെങ്കില്‍ ഇത്തരമൊരു തീരുമാനം ഒരിക്കലും ഉണ്ടാകുമായിരുന്നില്ലെന്ന് ജനങ്ങള്‍ പറയുന്നു.

സെന്‍ട്രല്‍ സ്റ്റേഡിയം കോവിഡ് വ്യാപനത്തിന് കാരണമാകുമെന്ന കാര്യത്തില്‍ സംശയമേ വേണ്ട. ഗൗരിയമ്മയുടെയും ബാലകൃഷ്ണ പിള്ളയുടെയും സംസ്‌കാര ചടങ്ങുകള്‍ നടന്നതും കോവിഡ് പ്രോട്ടോക്കോള്‍ ലംഘിച്ചാണ്. സ്വയം ലോക്ക് ഡൗണ്‍ ലംഘിച്ച ശേഷം ജനങ്ങളെ ലോക്ക് ഡൗണിന് പ്രേരിപ്പിക്കുന്നതില്‍ അര്‍ത്ഥമില്ലെന്നും സാമൂഹിക മാധ്യമങ്ങള്‍ പറയുന്നു. ചുരുക്കത്തില്‍ ചിലരുടെ വാക്കുകള്‍ പഴയ ചാക്കുകളാണ് എന്ന ചൊല്ല് അന്വര്‍ത്ഥമാവുകയാണ് ഇവിടെ.