മുന്‍ സംസ്ഥാന ട്രാന്‍സ്‌പോര്‍ട്ട് ഡ്രൈവറുടെ വീട്ടില്‍നിന്ന് 28 കോടി രൂപയുടെ പണവും 15 കിലോ സ്വര്‍ണ്ണവും പോലീസ് പിടിച്ചെടുത്തു. തൃണമൂല്‍ കോണ്‍ഗ്രസ് മുന്‍ നേതാവ് അനുബ്രത മൊണ്ടാലിന്റെ അടുത്ത അനുയായിയും മണല്‍-കല്ല് മാഫിയ തലവനുമായ തുളു മൊണ്ടാലിന്റെ ബന്ധു മിനാര്‍ മൊണ്ടാലിന്റെ വീട്ടിലാണ് വീര്‍ഭൂം പോലീസ് മിന്നല്‍ പരിശോധന നടത്തിയത്. പിടിച്ചെടുത്ത പണം എണ്ണിത്തീര്‍ക്കുന്നതിനിടെ അതിഭീമമായ തുക കാരണം അഞ്ച് കൗണ്ടിംഗ് മെഷീനുകള്‍ കേടായി.

പിടിച്ചെടുത്ത 15 കിലോ സ്വര്‍ണ്ണത്തിന് വിപണിയില്‍ ഏകദേശം 21 കോടി രൂപയോളം വിലമതിക്കും. സംഭവവുമായി ബന്ധപ്പെട്ട് വീര്‍ഭൂം പോലീസ് മിനാര്‍ മൊണ്ടാലിനെ അറസ്റ്റ് ചെയ്തു. പിടിച്ചെടുത്ത കോടികളും സ്വര്‍ണ്ണവും തുളു മൊണ്ടാലിന്റെ നിയമവിരുദ്ധ 'സിന്‍ഡിക്കേറ്റ്' ബിസിനസ്സിലൂടെ സമാഹരിച്ചതാണെന്ന് ഇയാള്‍ പോലീസിന് മുന്നില്‍ സമ്മതിച്ചിട്ടുണ്ട്.ബുധനാഴ്ച രാത്രി വൈകിയാണ് പോലീസിന്റെ വന്‍ സംഘം മുഹമ്മദ് ബസാര്‍ പോലീസ് സ്റ്റേഷന്‍ പരിധിയില്‍ പരിശോധന ആരംഭിച്ചത്.

ആദ്യം 5.5 കോടി രൂപയോളം കണ്ടെടുത്തുവെങ്കിലും വ്യാഴാഴ്ച രാവിലെയോടെ തുക 28 കോടി കടക്കുകയായിരുന്നു. പണത്തിന്റെ യഥാര്‍ത്ഥ ഉറവിടം കണ്ടെത്താന്‍ പോലീസ് വിശദമായ അന്വേഷണം ആരംഭിച്ചിട്ടുണ്ട്.അതേസമയം, അഴിമതിക്കെതിരെ സര്‍ക്കാരിന്റെ 'സീറോ ടോളറന്‍സ്' നയം തുടരുമെന്ന് പശ്ചിമ ബംഗാള്‍ മുഖ്യമന്ത്രി സുവേന്ദു അധികാരി വ്യക്തമാക്കി.