സ്വപ്നത്തില് പോലും വിചാരിച്ചില്ല... ജനരോഷം ഉയര്ന്നിട്ടും ഒരടി പിന്നോട്ട് പോകാത്ത അഡ്മിനിസ്ട്രേറ്റര് പ്രഫുല് ഖോഡ പട്ടേലിനെ നിലയ്ക്ക് നിര്ത്താനൊരുങ്ങി അമിത്ഷാ; ലക്ഷദ്വീപില് പരിഷ്കാരം അടിച്ചേല്പിക്കില്ല; തിരുമാനമായത് അബ്ദുള്ള കുട്ടിയുമായും ദ്വീപ് നേതാക്കളുമായുള്ള ചര്ച്ചയില്
ബിജെപി ദേശീയ വൈസ് പ്രസിഡന്റ് എ.പി. അബ്ദുള്ളക്കുട്ടിയും ലക്ഷദ്വീപ് ബിജെപി നേതാക്കളും ആഭ്യന്തര മന്ത്രി അമിത്ഷായെ കണ്ടതിന് പ്രയോജനം ലഭിച്ചിരിക്കുകയാണ്. ഇനിയും ഇടപെട്ടില്ലെങ്കില് ലക്ഷദ്വീപ് കൈവിട്ടുപോകുമെന്ന സത്യം അവര് പറഞ്ഞു. അതിനാല് ഉടന് തന്നെ കേന്ദ്രം തീരുമാനമെടുത്തു.
ലക്ഷദ്വീപിലെ ജനവിരുദ്ധ നടപടികളില് അഡ്മിനിസ്ട്രേറ്റര് പ്രഫുല് ഖോഡ പട്ടേലിനെതിരെ ജനകീയ പ്രതിഷേധം കൂടുതല് ശക്തമാകുന്ന പശ്ചാത്തലത്തില് നിലപാട് മയപ്പെടുത്തി കേന്ദ്രം. ദ്വീപ് നിവാസികളുടെ അഭിപ്രായം തേടാതെ പരിഷ്കാരങ്ങള് നടപ്പാക്കില്ലെന്ന് കേന്ദ്ര ആഭ്യന്തരമന്ത്രി അമിത് ഷാ വ്യക്തമാക്കി. ദ്വീപിലെ പ്രക്ഷോഭങ്ങളില് മൗനം പാലിച്ചിരുന്ന കേന്ദ്ര സര്ക്കാര്, കടുംപിടിത്തത്തില് നിന്ന് പിന്മാറുന്നതിന്റെ സൂചന ഇതാദ്യം. അതേസമയം, അഡ്മിനിസ്ട്രേറ്ററെ മാറ്റണമെന്ന ആവശ്യത്തില് ഷാ പ്രതികരിച്ചില്ല.
ഇപ്പോഴത്തേത് കരട് വിജ്ഞാപനമാണ്. അതിലെ നിര്ദ്ദേശങ്ങള് ആഭ്യന്തര മന്ത്രാലയത്തിന്റെ പരിഗണനയിലാണ്. വിജ്ഞാപനം അതേപടി നടപ്പാക്കില്ല. ലക്ഷദ്വീപിന്റെ പാരമ്പര്യം സംരക്ഷിക്കുന്ന പരിഷ്കാരങ്ങളില് ദ്വീപുകാരെ ദ്രോഹിക്കുന്ന നടപടികള് ഉണ്ടാവില്ലെന്നും ദ്വീപിലെ ബി.ജെ.പി ഭാരവാഹികള്ക്കൊപ്പം പാര്ട്ടി ദേശീയ വൈസ് പ്രസിഡന്റ് എ.പി. അബ്ദുള്ളക്കുട്ടിയും, ദ്വീപിലെ എം.പി മുഹമ്മദ് ഫൈസലും വെവ്വേറെ നടത്തിയ കൂടിക്കാഴ്ചയില് ഷാ ഉറപ്പു നല്കി.
പരിഷ്കാരങ്ങളെക്കുറിച്ച് ദ്വീപുവാസികളുടെ ആശങ്ക പരിഹരിക്കുമെന്നും, ഏതെല്ലാം പരിഷ്കാരങ്ങള് നടപ്പാക്കണമെന്നതില് ജനാഭിപ്രയം തേടുമെന്നും അമിത് ഷാ പറഞ്ഞതായി എ.പി. അബ്ദുള്ളക്കുട്ടി, ലക്ഷദ്വീപ് ബി.ജെ.പി അദ്ധ്യക്ഷന് അബ്ദുള് ഖാദര് ഹാജി, വൈസ് പ്രസിഡന്റ് അഡ്വ.കെ.പി. മുത്തുക്കോയ എന്നിവര് പറഞ്ഞു. ജനങ്ങള്ക്ക് ബുദ്ധിമുട്ടുണ്ടാക്കുന്ന ഒരു നിയമവും നടപ്പാക്കില്ലെന്ന് ഉറപ്പു ലഭിച്ചതായി ഇന്നലെ അമിത് ഷായെ കണ്ട മുഹമ്മദ് ഫൈസല് എം.പിയും മാദ്ധ്യമങ്ങളോടു പറഞ്ഞു.
അഡ്മിനിസ്ട്രേറ്ററെ മാറ്റണമെന്ന ആവശ്യത്തിന് തൃപ്തികരമായ മറുപടി ലഭിച്ചില്ലെന്നും അതിനായുള്ള പോരാട്ടം തുടരുമെന്നും ഫൈസല് പറഞ്ഞു. അഞ്ചു മാസത്തിനിടെ അഡ്മിനിസ്ട്രേറ്റര് 15 ദിവസം മാത്രമാണ് ദ്വീപില് താമസിച്ചതെന്നും ഫൈസല് അമിത് ഷായെ അറിയിച്ചു. കേരള നിയമസഭയുടെ പ്രമേയം ലക്ഷദ്വീപ് ജനതയ്ക്ക് ശുഭാപ്തിവിശ്വാസം നല്കുന്നുവെന്ന് ഫൈസല് മാദ്ധ്യമങ്ങളോടു പറഞ്ഞു.
അതിനിടെ, കൊച്ചിയില് നിന്ന് ദ്വീപ് സന്ദര്ശനത്തിനൊരുങ്ങിയ യു.ഡി.എഫ് എം.പിമാരായ ബെന്നി ബഹനാന്, ഇ.ടി മുഹമ്മദ് ബഷീര്, എന്.കെ.പ്രേമചന്ദ്രന്, എം.കെ.രാഘവന്, ഹൈബി ഈഡന് എന്നിവര്ക്ക് ലക്ഷദ്വീപ് ഭരണകൂടം ഇന്നലെ അനുമതി നിഷേധിച്ചു. കൊവിഡ് നിയന്ത്രണങ്ങളുടെ ഭാഗമായി ദ്വീപ് സന്ദര്ശനത്തിന് കര്ശന വിലക്ക് ഏര്പ്പെടുത്തിയത് കഴിഞ്ഞ ദിവസമാണ്. സന്ദര്ശക പാസില് തങ്ങുന്നവര് ഒരാഴ്ചയ്ക്കകം മടങ്ങാനും നിര്ദ്ദേശിച്ചിരുന്നു.
ലക്ഷദ്വീപില് കഴിഞ്ഞ തിങ്കളാഴ്ച ഏര്പ്പെടുത്തിയ ഒരാഴ്ചത്തെ ലോക്ക്ഡൗണ് ജൂണ് ഏഴു വരെ നീട്ടി ജില്ലാ കളക്ടര് എസ്. അസ്കര് അലിയുടെ ഉത്തരവ്. കില്ത്താന് ഉള്പ്പെടെ അഞ്ച് ദ്വീപുകളില് നിശാനിയമവും പ്രഖ്യാപിച്ചിട്ടുണ്ട്.
ദ്വീപില് കൊവിഡ് കേസുകള് ഉയരുന്ന സാഹചര്യത്തിലാണ് ജനസഞ്ചാരം നിയന്ത്രിക്കുന്നതിന്റെ ഭാഗമായി അടച്ചിടല് നീട്ടുന്നതെന്നാണ് വിശദീകരണം. എന്തായാലും അമിത്ഷായുടെ ഇടപെടല് വന്നതോടെ പ്രഫുല് ഖോഡ തണുക്കാന് തന്നെയാണ് സാധ്യത.
"
https://www.facebook.com/Malayalivartha
