കറകളഞ്ഞ കമ്മ്യൂണിസ്റ്റ് നേതാവും അഴിമതിയില്ലാത്ത ഭരണകര്‍ത്താവുമായിരുന്ന ജി സുധാകരന്‍ ഇപ്പോള്‍ ഒറ്റതിരിഞ്ഞ് ആക്രമിക്കപ്പെടുകയാണ്.

അമ്പലപ്പുഴ മണ്ഡലത്തിലെ തിരഞ്ഞെടുപ്പ് പ്രചാരണങ്ങളില്‍ സി.പി.എം സംസ്ഥാന സമിതി അംഗവും മുതിര്‍ന്ന നേതാവുമായ ജി. സുധാകരന്‍ സജീവമായില്ലെന്ന പരാതിയില്‍ പാര്‍ട്ടി അന്വേഷണ കമ്മിഷനെ നിയോഗിച്ചതോടെ അണികളില്‍ പ്രതിഷേധം കനക്കുകയാണ്. ജില്ലാ സെക്രട്ടേറിയറ്റില്‍ ചിലര്‍ സംഘടിതമായി സുധാകരനെ കടന്നാക്രമിച്ചപ്പോള്‍ തന്നെ ജില്ലയില്‍ പ്രതിഷേധമുയര്‍ന്നിരുന്നു.

ജില്ലാ കമ്മിറ്റിയില്‍ പാര്‍ട്ടി സംസ്ഥാന ആക്ടിംഗ് സെക്രട്ടറി എ. വിജയരാഘവന്റെ സാന്നിദ്ധ്യത്തിലായിരുന്നു വിമര്‍ശനം. എന്നാല്‍, രണ്ടു ദിവസം ജില്ലയില്‍ ക്യാമ്പ് ചെയ്തിട്ടും ഈ വിഷയത്തില്‍ സുധാകരനുമായി വിജയരാഘവന്‍ ആശയവിനിമയം നടത്തിയില്ല. അഴിമതി രഹിത മുഖച്ഛായയുള്ള സുധാകരനെതിരെ ചില നേതാക്കള്‍ നടത്തുന്ന പ്രചാരണങ്ങളില്‍ ജില്ലയിലെ പ്രവര്‍ത്തകര്‍ കടുത്ത നിരാശയിലാണ്.

ആലപ്പുഴയില്‍ പൊളിറ്റിക്കല്‍ ക്രിമിനലുകള്‍ തന്നെ വേട്ടയാടുന്നുവെന്ന തുറന്നുപറച്ചിലിനും നിയമസഭ തിരഞ്ഞെടുപ്പിനും ശേഷം സുധാകരനെതിരെയുള്ള നീക്കങ്ങള്‍ പാര്‍ട്ടിയിലെ എല്ലാം അതിരുകളും കടന്നുള്ളതാണെന്നാണ് പ്രവര്‍ത്തകരുടെ വാദം. അമ്പലപ്പുഴ മണ്ഡലത്തില്‍ ഉള്‍പ്പെടുന്ന ആലപ്പുഴ നഗരസഭയിലെ 27 വാര്‍ഡുകളില്‍ 6200 വോട്ടിന്റെ ഭൂരിപക്ഷം ഇടതുമുന്നണിക്ക് ലഭിച്ചിരുന്നു. എന്നാല്‍, ആലപ്പുഴ മണ്ഡലത്തില്‍ ഉള്‍പ്പെടുന്ന നഗരസഭയിലെ 25 വാര്‍ഡുകളില്‍ 1400 വോട്ടുകള്‍ക്ക് ഇടതുമുന്നണി പിന്നാക്കം പോയി. 2016 ല്‍ ആലപ്പുഴ മണ്ഡലത്തില്‍ തോമസ് ഐസിക്കിന് ലഭിച്ചത് 83.211 വോട്ടുകളാണ്. എന്നാല്‍, ഇത്തവണ ചിത്തരഞ്ജന് ലഭിച്ചത് 73,412 വോട്ടുകള്‍ മാത്രം. 9799 വോട്ടുകള്‍ ചോര്‍ന്നു.

അതേസമയം അമ്പലപ്പുഴയില്‍ ജി. സുധാകരന്‍ നേടിയ 63,069 വോട്ടുകളേക്കാള്‍ 1704 വോട്ടുകള്‍ മാത്രമേ എച്ച്. സലാമിന് കുറഞ്ഞിട്ടുള്ളൂ. അരൂര്‍, മാവേലിക്കര, കായംകുളം മണ്ഡലങ്ങളിലെ ഭൂരിപക്ഷവും ഗണ്യമായി ഇടിഞ്ഞെങ്കിലും ചര്‍ച്ചയ്‌ക്കെടുക്കാതെ അമ്പലപ്പുഴയില്‍ ഭൂരിപക്ഷം കുറഞ്ഞത് മാത്രമാണ് ഉയര്‍ത്തിക്കാട്ടിയത്. കണക്കുകള്‍ കാര്യങ്ങള്‍ വ്യക്തമാക്കുമ്പോഴും സുധാകരനെ മാത്രം ലക്ഷ്യംവച്ചുള്ള കടന്നാക്രമണത്തിനാണ് ചില നേതാക്കള്‍ ശ്രമിച്ചതെന്നാണ് പ്രവര്‍ത്തകരുടെ വികാരം.

തിരഞ്ഞെടുപ്പില്‍ സുധാകരന്‍ സജീവമായിരുന്നെന്ന റിപ്പോര്‍ട്ടാണ് അമ്പലപ്പുഴ നിയോജകമണ്ഡലം തിരഞ്ഞെടുപ്പ് കമ്മിറ്റി പാര്‍ട്ടിക്ക് നല്‍കിയത്. സുധാകരനെതിരെ ചില നേതാക്കള്‍ കമ്മിറ്റിയില്‍ ഉയര്‍ത്തിയ വിമര്‍ശനങ്ങളില്‍ ദേഭഗതി വരുത്തിയാണ് ജില്ലാ നേതൃത്വം സംസ്ഥാന കമ്മിറ്റിക്ക് റിപ്പോര്‍ട്ട് നല്‍കിയത്. ഇതൊന്നും കാര്യമായി പരിഗണിക്കാതെയാണ് അന്വേഷണ കമ്മിഷനെ നിയോഗിച്ചതെന്ന് പറയപ്പെടുന്നു.

അതേസമയം ജി സുധാകരന്‍ വിഷയം ഏറ്റെടുത്ത് ബിജെപി നേതാവായ സന്ദീപ് വജസ്പദിയും രംഗത്തെത്തി. അമ്പലപ്പുഴയിലെ തിരഞ്ഞെടുപ്പ് പ്രചാരണത്തില്‍ ജി. സുധാകരന്റെ ഭാഗത്തുനിന്ന് വേണ്ടത്ര ജാഗ്രതയുണ്ടായില്ലെന്ന് സി.പി.എം സംസ്ഥാന സമിതിയില്‍ വിമര്‍ശനം ഉയര്‍ന്നു എന്ന വാര്‍ത്തകളില്‍ പ്രതികരണവുമായി സന്ദീപ് വാചസ്പതി രംഗത്തെത്തിയത്.

എന്തുകൊണ്ട് സുധാകരന്‍ മാത്രം വിചാരണ ചെയ്യപ്പെടുന്നു ചിന്തിക്കുന്നവര്‍ക്ക് ദൃഷ്ടാന്തവുമുണ്ട്. അമ്പലപ്പുഴയേക്കാള്‍ ദയനീയ പ്രകടനം നടന്ന ആലപ്പുഴയെ ഒഴിവാക്കി അമ്പലപ്പുഴ മാത്രം ഇഴകീറി പരിശോധിക്കുന്ന സി.പി.എമ്മിന്റെ നയം സംശയാസ്പദമാണെന്നും സന്ദീപ് പറയുന്നു.