കല്ലുവാതുക്കല്‍ ഊഴായ്‌ക്കോട്ട് കരിയിലക്കൂട്ടത്തില്‍ ഉപേക്ഷിച്ച നവജാതശിശു മരിച്ചസംഭവത്തില്‍ ജയിലില്‍ കഴിയുന്ന രേഷ്മയുടെ ആണ്‍സുഹൃത്തുക്കളുടെ മൊഴിയെടുത്തു.

നവമാധ്യമങ്ങളിലൂടെ രേഷ്മ ഏറ്റവുമധികം ചാറ്റ് ചെയ്തിരിക്കുന്നവരുടെ മൊഴിയാണ് പോലീസ് രേഖപ്പെടുത്തിയത്. രേഷ്മയ്ക്ക് വിവിധപ്രായങ്ങളിലുള്ളവരുമായി സൗഹൃദമുണ്ടായിരുന്നതായി അന്വേഷണസംഘം കണ്ടെത്തിയിട്ടുണ്ട്. രേഷ്മയ്‌ക്കെതിരേ നരഹത്യക്കാണ് കേസെടുത്തിട്ടുള്ളത്.

ഫെയ്സ്ബുക്ക് കാമുകനൊപ്പം പോകുന്നതിന് തടസ്സമായേക്കുമെന്നതിനാല്‍ പ്രസവിച്ചയുടന്‍ കുഞ്ഞിനെ ഉപേക്ഷിച്ചെന്ന രേഷ്മയുടെ മൊഴിയുടെ വിശദാംശങ്ങള്‍മാത്രമാണ് പോലീസിന് തെളിയിക്കാനുള്ളത്. അതിനുള്ള അന്വേഷണമാണ് സൈബര്‍സെല്ലിന്റെ സഹായത്തോടെ നടത്തുന്നതെന്നും അന്വേഷണോദ്യോഗസ്ഥനായ പാരിപ്പള്ളി എസ്.എച്ച്.ഒ. അല്‍ ജബ്ബാര്‍ പറഞ്ഞു.

അനന്തുവെന്ന ഫെയ്സ്ബുക്ക് കാമുകനൊപ്പം ജീവിക്കാനാണ് കുഞ്ഞിനെ ഉപേക്ഷിച്ചതെന്നാണ് രേഷ്മ പോലീസിനു നല്‍കിയ മൊഴി. ബിലാല്‍ എന്ന പേരില്‍ ഫെയ്സ്ബുക്ക് അക്കൗണ്ടുള്ള വര്‍ക്കല സ്വദേശിയായ യുവാവുമായി രേഷ്മയ്ക്ക് സൗഹൃദമുണ്ടായിരുന്നതായും സ്ഥിരീകരിച്ചിട്ടുണ്ട്.

രണ്ടുദിവസംമുന്‍പ് ജയിലിലെത്തി ചോദ്യംചെയ്തപ്പോള്‍ വര്‍ക്കല സ്വദേശിയായ അനന്തു പ്രസാദിന്റെ ചിത്രം കാട്ടിയശേഷം അറിയുമോയെന്ന് അന്വേഷണസംഘം ചോദിച്ചിരുന്നു. അപ്പോള്‍ അറിയാം ബിലാല്‍ എന്ന സുഹൃത്താണെന്ന് രേഷ്മ മറുപടി പറഞ്ഞിരുന്നു. ക്വട്ടേഷന്‍ ആക്രമണക്കേസില്‍ ചാത്തന്നൂര്‍ പോലീസ് പിടികൂടിയ അനന്തു പ്രസാദ് ജയിലിലാണ്.


എന്നാല്‍ അനന്തുവെന്ന പേരില്‍ ചാറ്റ് ചെയ്തത് രേഷ്മയുടെ ബന്ധുക്കള്‍കൂടിയായ ആര്യയും ഗ്രീഷ്മയുമാണെന്നും പോലീസ് കണ്ടെത്തിയിരുന്നു. ഈ യുവതികള്‍ കുഞ്ഞിനെ ഉപേക്ഷിക്കാന്‍ ആവശ്യപ്പെട്ടിട്ടില്ലെന്നാണ് സൂചന. രേഷ്മയെ പാരിപ്പള്ളി പോലീസ് ജയിലില്‍വെച്ച് ചോദ്യംചെയ്തപ്പോള്‍ ആര്യയും ഗ്രീഷ്മയും പാവങ്ങളാണെന്നും യഥാര്‍ഥ അനന്തു അവരല്ലെന്നും രേഷ്മ അന്വേഷണസംഘത്തോടു പറഞ്ഞു. കുഞ്ഞു മരിച്ച സംഭവത്തില്‍ കുറ്റബോധമില്ലെന്നും ജയിലില്‍നിന്നിറങ്ങിയാലും അനന്തുവിനൊപ്പം പോകാന്‍ ശ്രമിക്കുമെന്നുമാണ് രേഷ്മയുടെ മൊഴി.

ആര്യയും ഗ്രീഷ്മയുമാണ് അനന്തുവായി ഫെയ്സ്ബുക്കില്‍ ചാറ്റ് ചെയ്തതെന്നും കേസന്വേഷണത്തിനിടെ അവരെ കാണാതായെന്നും ആത്മഹത്യ ചെയ്തിരിക്കാനിടയുണ്ടെന്നും പറഞ്ഞപ്പോള്‍മാത്രമാണ് രേഷ്മ ചെറുതായൊന്നു വിതുമ്പിയത്.

അനന്തുവെന്ന പേരിലുള്ള രണ്ടില്‍ക്കൂടുതല്‍ ആളുകളോട് രേഷ്മയ്ക്ക് ഫെയ്സ്ബുക്ക് ബന്ധമുണ്ടായിരുന്നു. അതിലൊരാള്‍ ചാത്തന്നൂര്‍ പോലീസ് അറസ്റ്റുചെയ്ത ക്വട്ടേഷന്‍ കേസ് പ്രതിയായ വര്‍ക്കല സ്വദേശിയാണെന്ന് പോലീസ് സംശയിക്കുന്നു.