മലയാളികളുടെ ഇടയിലേക്ക് ഒരു കൊടുങ്കാറ്റായി തിമിംഗല ഛര്‍ദി പടരുകയായിരുന്നു. തിമിംഗിലത്തില്‍ നിന്നു ലഭിച്ച മുപ്പത് കോടി വിലമതിക്കുന്ന ആംബര്‍ഗ്രിസ് എന്ന വസ്തു വില്‍ക്കാന്‍ ശ്രമിച്ച മൂന്നുപേരെ തൃശൂരിലെ ചേറ്റുവയില്‍നിന്ന് വനംവകുപ്പ് വിജിലന്‍സ് അറസ്റ്റ് ചെയ്തിരുന്നു. ഇതോടെയാണ് ആംബര്‍ഗ്രിസ് വാര്‍ത്തയിലെത്തിയത്. അത് സോഷ്യല്‍ മീഡിയയില്‍ ഏറെ ചര്‍ച്ചയാകുകയും ചെയ്തു.

സ്വര്‍ണത്തേക്കാള്‍ വിലയുള്ള ആംബര്‍ഗ്രിസിന്റെ കൗതുകങ്ങളെക്കുറിച്ച് തിരയുകയാണ് മലയാളി. എന്നാലിതിനെ തിമിംഗില ഛര്‍ദിയെന്ന് വിശേഷിപ്പിക്കുന്നത് അശാസ്ത്രീയമാണെന്ന് കേരള സര്‍വകലാശാലയിലെ അക്വാട്ടിക് ബയോളജി ആന്‍ഡ് ഫിഷറീസ് വകുപ്പ് മേധാവി പറയുന്നു. വംശനാശം നേരിടുന്ന എണ്ണത്തിമിംഗിലങ്ങളുടെ കുടലില്‍ ദഹനത്തിന്റെ ഭാഗമായി നടക്കുന്ന പ്രവര്‍ത്തനങ്ങളുടെ ഫലമായി രൂപംകൊള്ളുന്ന പ്രകൃതിദത്ത ഉത്പന്നമാണിത്. വിസര്‍ജ്യ വസ്തുവായും ഇതിനെ കണക്കാക്കാം.

ഔഷധങ്ങളും സുഗന്ധദ്രവ്യങ്ങളും നിര്‍മിക്കാന്‍ ആയിരം വര്‍ഷത്തിലേറെയായി ആംബര്‍ഗ്രിസ് ഉപയോഗിക്കുന്നു. സുഗന്ധം കൂടുതല്‍ നേരം നിലനില്‍ക്കാന്‍ സഹായിക്കുന്ന ഒരു പ്രകൃതിദത്ത പശ എന്ന നിലയില്‍ വിപണിയില്‍ ഇവയ്ക്ക് സ്വര്‍ണത്തേക്കാള്‍ വിലയുണ്ട്.

എണ്ണത്തിമിംഗിലങ്ങളുടെ പ്രധാന ആഹാരം കണവയും കൂന്തളും ആണ്. ചില എണ്ണത്തിമിംഗിലങ്ങളില്‍ ദഹിക്കാത്ത കണവച്ചുണ്ടുകളും മറ്റും ചെറുകുടലില്‍ എത്തിപ്പെടും. കൂര്‍ത്തമുനകളുള്ള ഇവ അതിലോലമായ കുടലിന്റെ ഉള്ളില്‍ ഉരയും. ഇതിന്റെ പ്രതികരണമെന്ന നിലയില്‍ കുടല്‍ കൊഴുപ്പടങ്ങിയ വസ്തു സ്രവിക്കും. ഇത് കണവകളുടെ ദഹിക്കാതെ കിടക്കുന്ന അംശങ്ങളെ കൂട്ടിയോജിപ്പിച്ച് പുറമേ മൃദുവാക്കിമാറ്റും. ഇതിലെ വെള്ളം ചെറുകുടല്‍ വലിച്ചെടുക്കുന്നതോടെ ഇവ പാറപൊലെ ഉറപ്പുള്ളതാകും

 മലാശയത്തില്‍ ഇതില്‍ ഒട്ടേറെ പാളികള്‍ കൂട്ടിച്ചേര്‍ക്കപ്പെടുന്നു. ഇതാണ് ആംബര്‍ഗ്രിസ്. വെറും ഒരു ശതമാനം എണ്ണത്തിമിംഗലങ്ങളിലാണ് ഈ പ്രക്രിയ നടക്കുന്നത്. അതുകൊണ്ടുതന്നെ ആംബര്‍ഗ്രിസ് അപൂര്‍വ വസ്തുവുമാണ്.

ഇവ ചിലപ്പോള്‍ എണ്ണത്തിമിംഗിലങ്ങളുടെ കുടലിനെ പൂര്‍ണമായും അടച്ചുകളഞ്ഞേക്കാം. അങ്ങനെവന്നാല്‍ കുടല്‍ പൊട്ടി പുറത്തുവരും. അപൂര്‍വമായി വിസര്‍ജ്യമായും പുറത്തുവരും. മരിക്കുന്ന തിമിംഗിലങ്ങളുടെ ശവം ചീഞ്ഞുകഴിഞ്ഞാല്‍ കുടലില്‍നിന്ന് ഇവ കടലില്‍ എത്തുന്നു. വെള്ളത്തില്‍ ഒഴുകിനടക്കുന്ന ഇവയില്‍ ഉപ്പുവെള്ളവും സൂര്യപ്രകാശവും പലതരം മാറ്റങ്ങള്‍ വരുത്തും. അങ്ങനെ ഇവയ്ക്ക് നല്ല വാസന കിട്ടും. കിലോയ്ക്ക് ഒരു കോടിരൂപവരെ വിലയുണ്ട്. ഇന്ത്യയില്‍ ആംബര്‍ഗ്രിസോ അതിന്റെ ഉപോത്പന്നങ്ങളോ കൈവശം വെക്കുകയോ വ്യാപാരം നടത്തുകയോ ചെയ്യുന്നത് നിയമവിരുദ്ധമാണ്.

30 കോടി രൂപ വിലമതിക്കുന്ന 19 കിലോ തിമിംഗല ഛര്‍ദിലുമായി (ആംബര്‍ ഗ്രിസ്) 3 പേരെയാണ് വനം വകുപ്പ് ഫ്‌ളയിങ് സ്‌ക്വാഡ് തൃശൂരില്‍ നിന്നും പിടികൂടിയത്. വാടാനപ്പിള്ളി രായംമരയ്ക്കാര്‍ റഫീഖ് (47), പാലയൂര്‍ കൊങ്ങണം വീട്ടില്‍ ഫൈസല്‍ (40), എറണാകുളം വടക്കുംഭാഗം ശ്രീമൂലനഗരം കരിയക്കര ഹംസ (49) എന്നിവരാണു പിടിയിലായത്. സുഗന്ധദ്രവ്യ അസംസ്‌കൃത വസ്തുക്കളിലൊന്നായ തിമിംഗല ഛര്‍ദില്‍ കേരളത്തില്‍ നിന്നു പിടിക്കപ്പെടുന്നത് ആദ്യമായാണെന്നു സൂചനയുമുണ്ടായിരുന്നു.

വന്യജീവി സംരക്ഷണ നിയമത്തിലെ പട്ടിക 2ല്‍ പെടുന്നതാണു തിമിംഗലം എന്നതിനാല്‍ ഇതു കൈവശപ്പെടുത്തുന്നതും കൈമാറ്റം ചെയ്യുന്നതും കുറ്റകരമാണ്. വാങ്ങാനെന്ന വ്യാജേന ഫ്‌ളെയിങ് സ്‌ക്വാഡ് റേഞ്ച് ഓഫിസര്‍ ഭാസി ബാഹുലേയന്‍ റഫീഖുമായി ഫോണില്‍ സംസാരിച്ച പ്പോള്‍ 30 കോടി രൂപയാണ് ആവശ്യപ്പെട്ടത്. ഇതിനിടെ ഇവര്‍ ചേറ്റുവയിലുണ്ടെന്നു കണ്ടെത്തി പിടികൂടുകയായിരുന്നു.

തിമംഗല ഛര്‍ദില്‍ എവിടെ നിന്നെന്നു പ്രതികള്‍ വനംവകുപ്പ് സംഘത്തോടു വെളിപ്പെടുത്തിയിട്ടില്ല. മറ്റൊരു സംഘത്തില്‍ നിന്നു വാങ്ങിയതാണെന്നും മറിച്ചുവില്‍ക്കാനായിരുന്നു ശ്രമമെന്നും പറയുന്നു. ഇത് വലിയ വാര്‍ത്തയായതോടെയാണ് തിമിംഗല ഛര്‍ദിയെ പറ്റി കൂടുതല്‍ വെളിപ്പെടുത്തലുകള്‍ ഉണ്ടായത്.