ജി സുധാകരനെ സംബന്ധിച്ച് നിര്‍ണായകമാണ് ഇനിയുള്ള നാളുകള്‍. ഒന്നുകില്‍ അച്ചടക്കമുള്ള നേതാവായി തുടരാം. അല്ലെങ്കില്‍ വെട്ടിനിരത്തല്‍ ഉണ്ടാകും.

അമ്പലപ്പുഴയിലെ തെരഞ്ഞെടുപ്പില്‍ തന്റെ പ്രവര്‍ത്തനങ്ങളെപ്പറ്റി അന്വേഷിക്കുന്ന സിപിഎം കമ്മിഷനോടു പറയാനുള്ളത് വിശദ റിപ്പോര്‍ട്ടായിത്തന്നെ മുന്‍ മന്ത്രി ജി.സുധാകരന്‍ നല്‍കാനാണ് സാധ്യത. വസ്തുതകളും കണക്കുകളും വച്ചുള്ള വിശദ മറുപടി നല്‍കും. ആര്‍ക്കുമെതിരെ വ്യക്തിപരമായ പരാതിയോ ആക്ഷേപമോ ഉണ്ടാകാനിടയില്ല.

പാര്‍ട്ടിയിലെ എതിര്‍വിഭാഗത്തിന്റെ ആക്രമണത്തെ നേരിടാന്‍ തന്നെയാണു സുധാകരന്റെ തീരുമാനമെന്ന് അറിയുന്നു. പാര്‍ട്ടിയില്‍ 'പൊളിറ്റിക്കല്‍ ക്രിമിനലുകള്‍' ഉണ്ടെന്ന് സുധാകരന്‍ നേരത്തേ പറഞ്ഞിരുന്നു. ആ നിലപാടില്‍ വിട്ടുവീഴ്ച ചെയ്തിട്ടുമില്ല.

പറയാനുള്ളത് അന്വേഷണ കമ്മിഷനോടു തുറന്നുപറയുക, എന്നാല്‍ പാര്‍ട്ടി അച്ചടക്കം കര്‍ശനമായി പാലിക്കുക എന്ന നിലപാടാകും അദ്ദേഹം തുടര്‍ന്നും സ്വീകരിക്കുകയെന്ന് അടുപ്പമുള്ളവര്‍ സൂചിപ്പിച്ചു. പരസ്യ പ്രതികരണത്തിലൂടെയും മറ്റും സ്വയം ദുര്‍ബലനാകാതെ ശ്രദ്ധിക്കുന്നുമുണ്ട്. ഈ നിലപാടിലൂടെ പാര്‍ട്ടിയിലും പുറത്തും പിന്തുണ വര്‍ധിക്കുന്നുണ്ടെന്നാണു വിലയിരുത്തല്‍.



പാര്‍ട്ടിയില്‍നിന്നു സുധാകരനെ കടപുഴക്കാനുള്ള സംഘടിത ശ്രമമുണ്ടായെന്ന് ഒരുവിഭാഗം വിശ്വസിക്കുന്നു. ആരോപണങ്ങള്‍ ഈ പശ്ചാത്തലത്തില്‍ വിശകലനം ചെയ്താല്‍ സംസ്ഥാന നേതൃത്വത്തിന് അദ്ദേഹത്തിന്റെ നിലപാടു ബോധ്യപ്പെടുമെന്ന ആത്മവിശ്വാസം അടുപ്പമുള്ളവര്‍ പ്രകടിപ്പിക്കുന്നു. വസ്തുതകള്‍ പരിശോധിച്ച് ആലപ്പുഴ ജില്ലാ നേതൃത്വം തന്നെ പരിഹാരം കാണുമെന്ന പ്രതീക്ഷയും അവര്‍ക്കുണ്ട്.

സുധാകരന്‍ വര്‍ഗവഞ്ചകനാണെന്നും രക്തസാക്ഷികള്‍ മാപ്പു നല്‍കില്ലെന്നുമുള്ള ഒളിയമ്പു പ്രചാരണം അദ്ദേഹത്തെയും കുടുംബത്തെയും വേദനിപ്പിച്ചിട്ടുണ്ട്. സുധാകരന്റെ സ്വന്തം സഹോദരന്‍ തന്നെ രക്തസാക്ഷിയാണെന്നതു മറന്നവരാണ് അത്തരം പ്രയോഗങ്ങള്‍ നടത്തിയതെന്ന വികാരമുണ്ട്. പാര്‍ട്ടി സംസ്ഥാന നേതൃത്വത്തില്‍ മറ്റൊരു നേതാവിനും ഇങ്ങനെയൊരു പശ്ചാത്തലം അവകാശപ്പെടാനാവില്ല എന്നതും ചൂണ്ടിക്കാണിക്കപ്പെടുന്നു.

സിപിഎമ്മിലെ ചര്‍ച്ചയും അന്വേഷണവും അമ്പലപ്പുഴയെപ്പറ്റിയാണെങ്കിലും അതു ചുറ്റിത്തിരിഞ്ഞ് ആലപ്പുഴയിലുമെത്തിയതിനെ സ്വകാര്യമായി സ്വാഗതം ചെയ്യുന്നവരുണ്ട് പാര്‍ട്ടിയില്‍. വോട്ട് കണക്കുപ്രകാരം, അമ്പലപ്പുഴയിലേതിനെക്കാള്‍ ശ്രദ്ധേയമായ നഷ്ടം ആലപ്പുഴയില്‍ സംഭവിച്ചെന്നാണ് അവരുടെ പക്ഷം.

അമ്പലപ്പുഴയില്‍ ഇത്തവണ എല്‍ഡിഎഫിന് 2.5% വോട്ട് കുറഞ്ഞെങ്കില്‍ ആലപ്പുഴയില്‍ കുറവ് 4.5% ആണെന്ന് അവര്‍ ചൂണ്ടിക്കാട്ടുന്നു. അരൂരിലും വലിയ കുറവുണ്ടായി. എന്നാല്‍, അതിന്റെയൊക്കെ ഉത്തരവാദിത്തം അവിടെ മുന്‍പു മത്സരിച്ചവര്‍ക്കാണെന്നു പറയാനാവില്ല. അമ്പലപ്പുഴയില്‍ മാത്രം അത്തരം 'കണ്ടെത്തല്‍' ഉണ്ടാകുന്നതിലുള്ള വിമര്‍ശനം പാര്‍ട്ടി ചര്‍ച്ചകളില്‍ ഉയരാനിടയുണ്ട്.

അതേസമയം സിപിഎം സംസ്ഥാന സമിതി അംഗവും മുന്‍ മന്ത്രിയുമായ ജി സുധാകരനു നേരിടേണ്ടി വരുന്ന രാഷ്ട്രീയ പ്രതിസന്ധി തുറന്നു കാട്ടി കഥാകൃത്ത് ടി. പത്മനാഭന്റെ കഥ. ജി.സുധാകരനെന്ന് എടുത്തു പറയുന്നില്ലെങ്കിലും കഥയിലുള്ളത് സുധാകരന്‍ തന്നെയെന്നു സൂചനകളിലൂടെ വ്യക്തമാണ്.

അയാള്‍ എന്നാണ് സുധാകരനെ പ്രതിനിധീകരിക്കുന്ന കഥാപാത്രത്തെ അവതരിപ്പിച്ചിരിക്കുന്നത്. സഖാവും അയാളും തമ്മില്‍ നടക്കുന്ന സംഭാഷണത്തിലൂടെയാണ് സിപിഎമ്മിന്റെ ഉള്‍പാര്‍ട്ടി രാഷ്ട്രീയത്തെക്കുറിച്ചു പറയുന്നത്. പുറത്തിറങ്ങാനിരിക്കുന്ന വാര്‍ഷിക പതിപ്പിലാണ് 'സഖാവ്' എന്ന പേരിലുള്ള കഥ പ്രസിദ്ധീകരിക്കുന്നത്. അടിമുടി മാന്യനായ രാഷ്ട്രീയക്കാരനാണ് ജി.സുധാകരനെന്ന് അഭിപ്രായമുള്ള ആളാണ് കഥാകൃത്ത്. അക്കാര്യം പത്മനാഭന്‍ മുന്‍പു വ്യക്തമാക്കിയിട്ടുണ്ട്. എന്തായാലും സഖാവ് എന്തായി തീരുമെന്ന് കാത്തിരുന്ന് കാണാം.