കുണ്ടറ പെരുമ്ബുഴയില്‍ കിണര്‍ കുഴിക്കുന്നതിനിടെ അപകടത്തില്‍പ്പെട്ട തൊഴിലാളിയും രക്ഷിക്കാനിറങ്ങിയ മൂന്ന് തൊഴിലാളികളും ശ്വാസം കിട്ടാതെ മരിച്ചു. വെള്ളിമണ്‍ ചിറക്കോണം വയലില്‍തറ പുത്തന്‍വീട്ടില്‍ സോമരാജന്‍ (56), പെരുമ്ബുഴ കുരീപ്പള്ളി തൈക്കാവുമുക്ക് പണയില്‍ വീട്ടില്‍ മനോജ് (32), പെരുമ്ബുഴ പുനക്കന്നൂര്‍ പുന്നവിള വീട്ടില്‍ രാജന്‍ (36), ചിറയടി മച്ചത്ത് തൊടിയില്‍ വീട്ടില്‍ ശിവദാസന്റെയും ആനന്ദവല്ലിയുടെയും മകന്‍ ശിവപ്രസാദ് (വാവ, 25) എന്നിവരാണ് മരിച്ചത്.

പെരുമ്ബുഴ കോവില്‍മുക്കില്‍ ഇന്നലെ രാവിലെ 11ഓടെ കൊല്ലം സ്വദേശിയുടെ പുരയിടത്തിലായിരുന്നു ദുരന്തം. പുറത്തുണ്ടായിരുന്ന രണ്ടു തൊഴിലാളികളുടെ നിലവിളി കേട്ടെത്തിയ സമീപവാസികള്‍ പൊലീസിലും ഫയര്‍ഫോഴ്‌സിലും അറിയിക്കുകയായിരുന്നു.
കുണ്ടറ, കടപ്പാക്കട ഫയര്‍ഫോഴ്‌സ് യൂണിറ്റുകളും കുണ്ടറ പൊലീസുമാണ് രക്ഷാപ്രവര്‍ത്തനം നടത്തിയത്. പി.സി. വിഷ്ണുനാഥ് എം.എല്‍.എ, മുന്‍ മന്ത്രി ജെ. മേഴ്‌സിക്കുട്ടിഅമ്മ എന്നിവരും സംഭവസ്ഥലത്ത് രക്ഷാപ്രവര്‍ത്തനങ്ങള്‍ക്ക് നേതൃത്വം നല്‍കി.
മൂന്നുപേര്‍ കിണറ്റില്‍വച്ചും നാലാമന്‍ ആശുപത്രിയിലേക്ക് കൊണ്ടുപോകുംവഴിയുമാണ് മരിച്ചത്. മൃതദേഹങ്ങള്‍ ജില്ലാ ആശുപത്രി മോര്‍ച്ചറിയിലേക്ക് മാറ്റി. പോസ്റ്റ്‌മോര്‍ട്ടത്തിന് ശേഷം മൃതദേഹങ്ങള്‍ ഇന്ന് വിട്ടുനല്‍കും. കുണ്ടറ പൊലീസ് കേസെടുത്തു.