പാരലൽ കോളേജ് പ്രൊട്ടക്ഷൻ ഫോറം സംസ്ഥാന കമ്മിറ്റിയുടെ നേതൃത്വത്തിൽ സെക്രട്ടറിയേറ്റ് നടയിൽ അതിജീവന സമരം നടന്നു. കേരളത്തിലെ ആദരണീയനായ പ്രതിപക്ഷ നേതാവ് വി ഡി സതീശനാണ് സമരം ഉത്ഘാടനം ചെയ്തത്.

കോവിഡ് പ്രതിസന്ധിയിൽ ബുദ്ധിമുട്ടുന്ന സമാന്തര വിദ്യാഭ്യാസമേഖലയിലെ അധ്യാപകരുടെയും അനധ്യാപകരുടെയും ബുദ്ധിമുട്ടുകൾ മനസ്സിലാക്കി ക്രിയാത്മകമായ ഇടപെടലുകൾ സർക്കാരിന്റെ ഭാഗത്തു നിന്ന് ഇതുവരെ ഉണ്ടായിട്ടില്ലെന്ന് സമരക്കാർ ആരോപിച്ചു.

കോവിഡ് മാനദണ്ഡങ്ങൾ പാലിച്ചുകൊണ്ട് പാരലൽ കോളേജ് തുറന്ന് പ്രവർത്തിക്കാൻ അനുവദിക്കുക, സമാന്തര വിദ്യാഭ്യാസ മേഖലകളിലെ അദ്ധ്യാപകർക്ക് ക്ഷേമനിധി ഉറപ്പാക്കുക, സമാന്തര വിദ്യാഭ്യാസ സ്ഥാപനങ്ങളിലെ അധ്യാപകരെ കോവിഡ് സാമ്പത്തിക സഹായ പദ്ധതിയിൽ ഉൾപ്പെടുത്തുക തുടങ്ങിയ ആവശ്യങ്ങളാണ് പാരലൽ കോളേജ് പ്രൊട്ടക്ഷൻ ഫോറം പ്രതിനിധികൾ ഉയർത്തുന്നത്. ട്യൂഷൻ സെന്ററുകൾ തുറക്കണ്ട എന്നാൽ ജീവിക്കാൻ ഒരു വഴി പറയൂവെന്നും ഇവർ ആവശ്യപ്പെടുന്നുണ്ട്.

പി സി പി എഫ് സംസ്ഥാന കമ്മിറ്റി സംസ്ഥാന തലത്തിൽ ആഹ്വാനം ചെയ്തിട്ടുള്ള അതിജീവനത്തിലേക്ക് ഒരു കയ്യൊപ്പ് എന്ന പരിപാടിയുടെ സംസ്ഥാനതല ഉദ്ഘാടനവും തദവസരത്തിൽ പ്രതിപക്ഷനേതാവ് നിർവഹിക്കുകയുണ്ടായി. തുടർന്ന് അധ്യാപകർ വിവിധ വിഷയങ്ങളിൽ വിഷയാവതരണം നടത്തുകയുണ്ടായി.

അതിജീവന സമരത്തിൽ സംസ്ഥാന പ്രസിഡന്റ് ശ്രീ സജികുമാർ അധ്യക്ഷത വഹിച്ചു. സംസ്ഥാന സെക്രട്ടറി പ്രവീൺ സ്വാഗതം ആശംസിച്ചു. സമാന്തര വിദ്യാഭ്യാസ മേഖല നേരിടുന്ന പ്രതിസന്ധിയെക്കുറിച്ച് എം എസ് ഹരികൃഷ്ണ മണലുവട്ടം സംസാരിച്ചു. ശ്രീ പ്രദീപ് കുമാർ ക്ഷേമനിധി രൂപീകരണത്തെ കുറിച്ച് സംസാരിച്ചു. കോവിഡ് പാക്കേജിൽ സമാന്തര മേഖലയെ ഉൾപ്പെടുത്തുന്നതിനെക്കുറിച്ചും ഓൺലൈൻ വിദ്യാഭ്യാസത്തിന്റെ കോട്ടങ്ങളും കുട്ടികൾ നേരിടുന്ന ആരോഗ്യ പ്രശ്നങ്ങളെയും കുറിച്ച് വിപിൻ മഹാത്മ സംസാരിക്കുകയുണ്ടായി.

വിദ്യാർത്ഥികളും അധ്യാപകരും തമ്മിലുള്ള ഐക്യം നഷ്ടപ്പെടുന്നതിനെ സംബന്ധിച്ച് കുമ്മിൾ നസീറും സംസാരിച്ചു. സംസ്ഥാന ട്രഷറർ ശ്രീ ബിജു സമര പരിപാടിക്ക് നന്ദി രേഖപ്പെടുത്തി . പി സി പി എഫ് സംസ്ഥാന എക്സിക്യൂട്ടീവ് കമ്മിറ്റി അംഗങ്ങളും സബ്ജില്ലാ ഭാരവാഹികളും മറ്റ് അംഗങ്ങളും പങ്കെടുത്തു.