പഞ്ച്ഷീറിന്റേയും പോരാളി അഹമ്മദ് മസൂദിന്റേയും ചെറുത്ത് നില്‍പ്പ് താലിബാന് നാണക്കേടായിരിക്കുകയാണ്. ഒരു തരത്തിലും പഞ്ച്ഷീറിനെ തകര്‍ക്കാന്‍ പറ്റാത്തതിനാല്‍ പുതിയ നീക്കം നടത്തുകയാണ് താലിബാന്‍.

പഞ്ച്ഷീര്‍ പ്രവിശ്യ ആക്രമിക്കുന്നതിനായി താലിബാന്‍, ഭീകരസംഘടനയായ അല്‍ഖ്വയ്ദയുമായി കൈകോര്‍ത്തതായാണ് റിപ്പോര്‍ട്ട്. ദേശീയ പ്രതിരോധ മുന്നണിയുടെ പ്രതിനിധിയെ ഉദ്ധരിച്ച് റഷ്യന്‍ വാര്‍ത്താ ഏജന്‍സിയാണ് ഇത്തരമൊരു റിപ്പോര്‍ട്ട് പുറത്ത് വിട്ടത്. ദിവസങ്ങളോളം പോരാടിയിട്ടും പഞ്ച്ഷീര്‍ പിടിച്ചെടുക്കാന്‍ കഴിയാതെ വന്ന സാഹചര്യത്തിലാണ് താലിബാന്റെ പുതിയ നീക്കം. നിലവില്‍ അഫ്ഗാന്‍ പ്രതിരോധ സേനയുമായുളള ഏറ്റുമുട്ടലില്‍ ഭീകരരുടെ പക്ഷത്ത് കനത്ത നാശനഷ്ടം നേരിട്ടിട്ടുണ്ട്.

സമാധാനപരമായ ഒത്തുതീര്‍പ്പിന് മുന്നണി പ്രതിജ്ഞാബദ്ധമാണെന്നും എന്നാല്‍ താലിബാനില്‍ നിന്നുള്ള ഏത് ആക്രമണത്തെയും നേരിടാന്‍ തയ്യാറാണെന്നും പ്രതിരോധ സേനാ വക്താവ് ഫഹീം ദഷ്ടി അറിയിച്ചു. അതേസമയം പഞ്ച്ഷീര്‍ പ്രവിശ്യയിലെ ഷുതുള്‍ ജില്ല വളഞ്ഞതായ താലിബാന്റെ അവകാശവാദം അദ്ദേഹം തളളിക്കളഞ്ഞു. നിലവില്‍ 350തോളം താലിബാന്‍ ഭീകരരെ പ്രതിരോധ സേന വധിച്ചിട്ടുണ്ട്. അതേസമയം, താലിബാനും പഞ്ച്ഷീര്‍ പ്രതിരോധ മുന്നണിയും യുദ്ധം നിര്‍ത്തി ചര്‍ച്ചയിലൂടെ പ്രശ്‌നങ്ങള്‍ പരിഹരിക്കണമെന്ന് മുന്‍ അഫ്ഗാന്‍ പ്രസിഡന്റ് ഹമീദ് കര്‍സായി വെള്ളിയാഴ്ച ഇരു സേനകളോടും ആവശ്യപ്പെട്ടു.

അഫ്ഗാനിസ്ഥാന്‍ പ്രവിശ്യയായ പഞ്ച്ഷീറില്‍ താലിബാന് എതിരെ പോരാടുന്ന നിരവധിപേര്‍ ഒത്തുകൂടിയിട്ടുണ്ട്. ഐതിഹാസിക അഫ്ഗാന്‍ വിമത കമാന്‍ഡര്‍ അഹ്മദ് ഷാ മസൂദിന്റെ മകന്‍ അഹമ്മദ് മസൂദും മുന്‍ വൈസ് പ്രസിഡന്റ് അംറുല്ല സാലിഹും പഞ്ച്ഷീര്‍ താഴ് വരയിലാണ് ഉളളത്. അമേരിക്ക തങ്ങളുടെ സൈന്യത്തെ പിന്‍വലിച്ചതോടെ അഫ്ഗാനിലെ സംഭവ വികാസങ്ങളെ ലോകം ജനത ഏറെ പ്രാധാന്യത്തോടെയാണ് വീക്ഷിക്കുന്നത്.

അതേസമയം താലിബാന്റെ നിയന്ത്രണത്തിലുള്ള യു.എസ് ഹെലികോപ്റ്ററില്‍ നിന്ന് കയറില്‍ തൂങ്ങിയാടുന്ന മൃതശരീരം എന്ന രീതിയിലുള്ള ദൃശ്യങ്ങള്‍ കുറച്ച് ദിവസങ്ങളായി സമൂഹ മാദ്ധ്യമങ്ങളില്‍ വ്യാപകമായി പ്രചരിച്ചിരുന്നു. മനുഷ്യ ശരീരമാണോ അതോ ഡമ്മിയാണോയെന്ന സംശയവും ചിലര്‍ പ്രകടിപ്പിച്ചിരുന്നു. കാണ്ഡഹാറില്‍ താലിബാന്‍ നടത്തിയ പട്രോളിങ്ങിന്റെ ദൃശ്യങ്ങള്‍ താലിബ് ടൈംസിന്റെ ട്വിറ്റര്‍ അക്കൗണ്ടിലാണ് പ്രത്യക്ഷപ്പെട്ടത്. എന്നാല്‍ മൃതദേഹം കെട്ടിത്തൂക്കി എന്ന നിലയിലാണ് വീഡിയോ പ്രചരിപ്പിക്കപ്പെട്ടത്. എന്നാല്‍ വീഡിയോയ്ക്ക് പിന്നിലെ സത്യം മറ്റൊന്നാണ്.

കാണ്ഡഹാറിലെ ഗവര്‍ണേഴ്‌സ് ബില്‍ഡിങിന് മുകളിലെ കൊടിമരത്തില്‍ പതാക സ്ഥാപിക്കുന്നതിന് വേണ്ടി ഒരാളെ കയറില്‍ കെട്ടി ഇറക്കുന്നതിന്റെ ദൃശ്യങ്ങളാണ് ഇതെന്ന് ആള്‍ട്ട് ന്യൂസ് റിപ്പോര്‍ട്ട് ചെയ്തു. അഫ്ഗാന്‍ ന്യൂസ് ഏജന്‍സിയുടെ പ്രതിനിധികളുമായി ബന്ധപ്പെട്ട ശേഷമാണ് ഇത് സ്ഥിരീകരിച്ചെന്നും 'ആള്‍ട്ട് ന്യൂസ്' പറയുന്നു. പതാക സ്ഥാപിക്കാനുള്ള ശ്രമം പരാജയപ്പെട്ടുവെന്നും വീഡിയോകള്‍ സൂക്ഷ്മമായി പരിശോധിച്ചപ്പോള്‍ ഹെലികോപ്റ്ററില്‍ തൂങ്ങിക്കിടക്കുന്നയാളുടെ ദേഹത്ത് കയര്‍ കൊണ്ട് സുരക്ഷിതമായി ബന്ധിച്ചത് കണ്ടെത്താനായെന്നും വിവിധ മാദ്ധ്യമങ്ങള്‍ റിപ്പോര്‍ട്ട് ചെയ്തു.