ഏത് വിധേനയും പഞ്ച്ഷീറിനെ തോല്‍പ്പിക്കാനുള്ള ശ്രമത്തിലാണ് താലിബാന്‍. എത്ര ശ്രമിച്ചിട്ടും താലിബാന്റെ സൈന്യം മരിക്കുകയല്ലാതെ പഞ്ചഷീറിന്‌മേല്‍ ആധിപത്യം സ്ഥാപിക്കാന്‍ കഴിയുന്നില്ല. ഒരിഞ്ച് പിന്നോട്ട് മാറാതെ അഹമ്മദ് മസൂറിന്റെ നേതൃത്വത്തിലുള്ള പഞ്ച്ഷീര്‍ ശക്തമായ പ്രതിരോധമാണ് തീര്‍ക്കുന്നത്.

അഫ്ഗാനിസ്ഥാനിലെ പഞ്ച്ശീര്‍ പ്രവിശ്യയില്‍ താലിബാനും പ്രതിരോധ സേനയും തമ്മില്‍ കനത്ത ഏറ്റുമുട്ടലാണ് നടക്കുന്നത്. താലിബാന്‍ പോരാളികളും താലിബാന്‍വിരുദ്ധ ഗ്രൂപ്പും തമ്മില്‍ അഫ്ഗാനിലെ പഞ്ച്ശീര്‍ താഴ്‌വരയില്‍ വ്യാഴാഴ്ച രാത്രി കനത്ത പോരാട്ടം ഉണ്ടായതായി സിഎന്‍എന്‍ റിപ്പോര്‍ട്ട് ചെയ്തു. അഫ്ഗാന്റെ ആധിപത്യം താലിബാന്‍ ഏറ്റെടുത്തതു മുതല്‍ പ്രതിരോധസേന താലിബാനെ ചെറുക്കാനുള്ള ശ്രമത്തിലാണ്.

കഴിഞ്ഞദിവസം പഞ്ച്ശീറിലേക്ക് നുഴഞ്ഞുകയറാന്‍ ശ്രമിച്ച 40 താലിബാന്‍കാരെ കൊലപ്പെടുത്തിയതായി പ്രതിരോധസേനയുടെ ശബ്ദസന്ദേശം പുറത്തുവന്നിരുന്നു. കഴിഞ്ഞ രണ്ടാഴ്ചയായി പഞ്ച്ശീറില്‍ ഏറ്റുമുട്ടല്‍ തുടരുകയാണ്. കഴിഞ്ഞ ദിവസം രാത്രി മുതലാണ് പോരാട്ടം കനത്തത്. സകല ശക്തിയുമെടുത്ത് പ്രതിരോധ സേനയെ കീഴടക്കാനാണ് താലിബാന്‍ ശ്രമിക്കുന്നതെന്നാണു റിപ്പോര്‍ട്ട്.

ഇരുകൂട്ടരും തമ്മിലുള്ള ചര്‍ച്ചകള്‍ പരാജയപ്പെട്ടിരുന്നു. കാബൂളിന് 90 മൈല്‍ വടക്ക് ഹിന്ദു കുഷ് പര്‍വതനിരകളിലാണ് പഞ്ച്ശീര്‍ താഴ് വര. കഴിഞ്ഞ 2 മാസത്തിനുള്ളില്‍ രാജ്യത്തിന്റെ മറ്റ് ഭാഗങ്ങളില്‍ മിന്നലാക്രമണം നടത്തിയിട്ടും പ്രതിരോധത്തിന്റെ ഈ ശക്തികേന്ദ്രത്തെ കീഴ്‌പ്പെടുത്താന്‍ താലിബാനു കഴിഞ്ഞിട്ടില്ല.

അതിനിടെ പഞ്ച്ശീറിലെ പ്രതിരോധ സേനയെ കീഴടക്കാന്‍ ഭീകരസംഘടനയായ അല്‍ ഖായിദയുമായി താലിബാന്‍ കൈകോര്‍ത്തതായി റിപ്പോര്‍ട്ട് പുറത്തുവന്നു. ദിവസങ്ങളോളം പോരാടിയിട്ടും പഞ്ച്ശീര്‍ പ്രവിശ്യയെ കീഴ്‌പ്പെടുത്താന്‍ താലിബാനു സാധിച്ചിട്ടില്ല. ഈ സാഹചര്യത്തിലാണ് പുതിയ നീക്കം. അഫ്ഗാനിസ്ഥാനിലെ ദേശീയ പ്രതിരോധ സേന പ്രതിനിധി ഇക്കാര്യം സ്ഥിരീകരിച്ചതായി രാജ്യാന്തര മാധ്യമങ്ങള്‍ റിപ്പോര്‍ട്ട് ചെയ്തു.

പഞ്ച്ശീറിനെ ആക്രമിക്കാന്‍ അല്‍ ഖായിദ അംഗങ്ങള്‍ താലിബാനൊപ്പം ചേരുകയാണെന്ന് സേനാ പ്രതിനിധി ഫഹീം ദഷ്ടി ഒരു പ്രാദേശിക മാധ്യമത്തോടു പറഞ്ഞു. സമാധാന കരാറിനു തയാറാണെന്നും എന്നാല്‍ താലിബാന്റെ ഏത് ആക്രമണവും നേരിടുമെന്നും അദ്ദേഹം പറഞ്ഞു. അതേസമയം പഞ്ച്ശീറിലെ ഷുതൂല്‍ ജില്ല വളഞ്ഞെന്ന താലിബാന്റെ അവകാശവാദം ഫഹീം ദഷ്ടി തള്ളി. പഞ്ച്ശീറിനായുള്ള പോരാട്ടത്തില്‍ 350 ല്‍ അധികം വരുന്ന താലിബാന്‍ അംഗങ്ങളെ പ്രതിരോധ സേന വധിച്ചിരുന്നു.



താലിബാനും പ്രതിരോധ സേനയും തമ്മിലുള്ള പ്രശ്‌നങ്ങള്‍ ചര്‍ച്ചയിലൂടെ പരിഹരിക്കണമെന്ന് അഫ്ഗാനിസ്ഥാന്‍ മുന്‍ പ്രസിഡന്റ് ഹമീദ് കര്‍സായി ആവശ്യപ്പെട്ടു. അതേസമയം പഞ്ച്ശീറില്‍ പോരാട്ടം തുടരുകയാണ്. പഞ്ച്ശീര്‍ വളഞ്ഞ താലിബാന്‍, പ്രവിശ്യയിലേക്കുള്ള വൈദ്യുതിയും ടെലിഫോണ്‍ ബന്ധവും വിച്ഛേദിച്ചതായി മുന്‍ വൈസ് പ്രസിഡന്റ് അമറുല്ല സാലെ പ്രതികരിച്ചു. മരുന്നുകളും അവശ്യവസ്തുക്കളും തടഞ്ഞെന്നും അദ്ദേഹം പറഞ്ഞു.