പൊതുജനങ്ങളോടുള്ള പൊലിസിന്റെ പെരുമാറ്റത്തില്‍ കടുത്ത വിമര്‍ശനവുമായി ഹൈക്കോടതി
പൊതുജനങ്ങളോടുള്ള പൊലിസിന്റെ പെരുമാറ്റത്തില്‍ കടുത്ത വിമര്‍ശനവുമായി ഹൈക്കോടതി. പൊതുജനങ്ങളോട് എങ്ങനെ പെരുമാറണമെന്ന് പൊലിസിന് ഇപ്പോഴും മനസിലായിട്ടില്ലെന്ന് ജസ്റ്റിസ് ദേവന്‍ രാമചന്ദ്രന്‍ വിമര്‍ശിച്ചു. കൊച്ചിയില്‍ പൊലിസ് ഉദ്യോഗസ്ഥര്‍ പരാതിക്കാരനെ ഭീഷണിപ്പെടുത്തിയെന്ന ഹരജി പരിഗണിക്കുമ്‌ബോഴാണ് ഹൈക്കോടതിയുടെ വിമര്‍ശനം. കൊച്ചി സൗത്ത് പൊലിസിന്റെ നടപടി ചോദ്യം ചെയ്ത് എറണാകുളം സ്വദേശിനിയായ ഷൈനി സന്തോഷാണ് ഹരജി സമര്‍പ്പിച്ചത്. പൊതുജനങ്ങളോട് അപമര്യാദയായി പെരുമാറുന്ന പൊലിസ് ഉദ്യോഗസ്ഥര്‍ക്കെതിരെ കര്‍ശന നടപടി സ്വീകരിക്കണമെന്നും ഇക്കാര്യത്തില്‍ കൃത്യമായി ഇടപെടുന്നുണ്ടെന്ന് മേലുദ്യോഗസ്ഥര്‍ ഉറപ്പുവരുത്തണമെന്നും ജസ്റ്റിസ് ദേവന്‍ രാമചന്ദ്രന്‍ നിര്‍ദേശിച്ചു. കോടതി പല തവണ നിര്‍ദ്ദേശങ്ങള്‍ നല്‍കിയെങ്കിലും പാലിക്കപ്പെട്ടിട്ടില്ലെന്ന് സിംഗിള്‍ ബെഞ്ച് വിമര്‍ശിച്ചു. സംസ്ഥാനത്തിന്റെ വിവിധ ഭാഗങ്ങളില്‍ നിന്നായി പെരുമാറ്റ ദൂഷ്യത്തിന്റെ പേരില്‍ പൊലിസ് പഴികേള്‍ക്കുന്നതിനിടെയാണ് ഹൈക്കോടതി വീണ്ടും വിമര്‍ശനം ഉന്നയിച്ചത്. കുറ്റക്കാരായ ഉദ്യോഗസ്ഥര്‍ക്കെതിരെ നടപടിയുറപ്പാക്കണമെന്ന് സിറ്റി പൊലിസ് കമ്മീഷണറോട് കോടതി ആവശ്യപ്പെട്ടു.
https://www.facebook.com/Malayalivartha
