വീണ്ടും കേരളത്തില്‍ ഹെലികോപ്റ്റര്‍ അഴിമതിക്ക് വഴിയൊരുങ്ങുന്നു. കഴിഞ്ഞ തവണ ലോക നാഥ് ബഹ്‌റയാണെങ്കില്‍ കഥയിലെ താരം ഇക്കുറി അനില്‍ കാന്ത് ആണെന്ന വ്യത്യാസം മാത്രമാണുള്ളത്. കത്തിയും ചമ്മന്തിയും കുടിക്കാന്‍ വകയില്ലാത്തപ്പോഴാണ് ധൂര്‍ത്തെന്ന് ഓര്‍ക്കണം.

കേന്ദ്ര സര്‍ക്കാരിന്റെ തലയില്‍ ചാരി തന്നെയാണ് ഇക്കുറിയും കോപ്റ്റര്‍ വാടകയ്ക്ക് എടുക്കുന്നത്. കഴിഞ്ഞ തവണയും കോപ്റ്ററിന്റെ വാടക കേന്ദ്ര സര്‍ക്കാര്‍ നല്‍കുമെന്നാണ് പറഞ്ഞിരുന്നത്. ഇക്കുറിയും അതേ പല്ലവി ആവര്‍ത്തിച്ചിട്ടുണ്ട്. കഴിഞ്ഞ തവണ കേന്ദ്ര സര്‍ക്കാര്‍ പണം നല്‍കുമെന്നാണ് പറഞ്ഞിരുന്നെങ്കിലും ഒരു രൂപ പോലും കിട്ടിയില്ല.

കേരള പോലീസിന്റെ ചെലവില്‍ മുഖ്യമന്ത്രിക്ക് സഞ്ചരിക്കാനുള്ള ഹെലികോപ്റ്റര്‍ ആണ് കേരള സര്‍ക്കാര്‍ വാടകയ്ക്ക് എടുക്കുന്നത്. കേരള പോലീസിലെ ആര്‍ക്കും ഹെലികോപ്റ്ററില്‍ സഞ്ചരിക്കാനുള്ള ഭാഗ്യം ഉണ്ടായിട്ടില്ല. മാവോയിസ്റ്റുകളെ പിടികൂടും എന്നൊക്കെ വീരവാദം മുഴക്കിയിരുന്നെങ്കിലും ഒരു മാവോയിസ്റ്റിനെയും കണ്ടെത്താന്‍ കഴിഞ്ഞില്ല.

കടുത്ത സാമ്പത്തിക പ്രതിസന്ധിക്കിടയിലും വീണ്ടും ഹെലികോപ്റ്റര്‍ വാടകയ്ക്ക് എടുക്കാനുള്ള തീരുമാനവുമായി സര്‍ക്കാര്‍ മുന്നോട്ടു വന്നപ്പോള്‍ തന്നെ ധനവകുപ്പ് എതിര്‍പ്പ് പ്രകടിപ്പിച്ചതാണ്. എന്നാല്‍ കേന്ദ്ര സര്‍ക്കാര്‍ തുക നല്‍കുമെന്നതിനാല്‍ സംസ്ഥാന സര്‍ക്കാരിന് അധിക സാമ്പത്തിക ബാധ്യത വരില്ലെന്നാണ് ധനമന്ത്രിയുടെ നിലപാട്. എന്നാല്‍ കഴിഞ്ഞ വര്‍ഷത്തെ തുക പോലും കിട്ടിയില്ലെന്ന് ധനവകുപ്പിലെ മിടുക്കന്‍മാര്‍ ഫയലില്‍ എഴുതിച്ചേര്‍ത്തു. പക്ഷേ കാരണവര്‍ക്ക് എന്തുമാകാം എന്ന നിലപാടില്‍ മുഖ്യമന്ത്രിയുടെ നിലപാട് അംഗീകരിക്കാനാണ് സര്‍ക്കാര്‍ തീരുമാനിച്ചത്.

കോടികള്‍ ചെലവഴിച്ച് കഴിഞ്ഞ വര്‍ഷം വാടകയ്ക്ക് എടുത്ത ഹെലികോപ്റ്റര്‍ വേണ്ടത്ര പ്രയോജനം ചെയ്തില്ലെന്ന വിമര്‍ശനങ്ങള്‍ക്കിടെയാണ് പുതിയ നീക്കം. പ്രസ്തുത കോപ്റ്റര്‍ കൊണ്ട് യാതൊരു പ്രയോജനവുമുണ്ടായില്ലെന്നതാണ് നഗ്‌ന സത്യം .

പുതിയ ടെണ്ടര്‍ കഴിഞ്ഞ ദിവസമാണ് പോലീസ് പ്രസിദ്ധീകരിച്ചത്. പുതിയ ടെണ്ടറില്‍ വ്യാപക പിശകുകളാണ് കടന്ന് കൂടിയത്. ഒന്‍പത് സീറ്റുകളുള്ള ഇരട്ട എഞ്ചിന്‍ ഹെലികോപ്റ്ററിനായാണ് ടെണ്ടര്‍ വിളിച്ചിരിക്കുന്നത്. ഒരു മാസം 20 മണിക്കൂര്‍ പറന്നാലും പറന്നില്ലെങ്കിലും നിശ്ചിത തുക കമ്പനിക്ക് നല്‍കും.

20 മണിക്കൂര്‍ കഴിഞ്ഞ് പറന്നാല്‍ ഓരോ മണിക്കൂറിനും അധികതുക നല്‍കണം. അങ്ങനെ കുറഞ്ഞ തുക ക്വാട്ട് ചെയ്യുന്ന കമ്പനിക്ക് കരാര്‍ നല്‍കുമെന്നാണ് ടെണ്ടറില്‍ ആദ്യ ഭാഗത്ത് പറയുന്നത്. കേന്ദ്രഫണ്ട് ലഭിക്കുമെന്നും പറയുന്നു. എന്നാല്‍ മറ്റൊരിടത്ത് പറയുന്നത് മാസം 108 മണിക്കൂര്‍ പറക്കണമെന്നും വര്‍ഷത്തില്‍1300 മണിക്കൂര്‍ പറക്കണമെന്നുമാണ്. അതും കേന്ദ്ര സര്‍ക്കാര്‍ നിബന്ധകള്‍ അനുസരിച്ച്.

ഇതിലാണ് കള്ളകളി. വ്യക്തമായ മാര്‍ഗ്ഗ നിര്‍ദ്ദേശങ്ങളില്ലാതെ ടെണ്ടര്‍ ഇറക്കിയത് ഏതെങ്കിലും പ്രത്യേക കമ്പനിയെ സഹായിക്കാന്‍ വേണ്ടിയാണ്. നേരത്തെ തന്നെ കമ്പനിയെ കണ്ടെത്തിയിട്ടാണ് സര്‍ക്കാര്‍ ടെണ്ടര്‍ നോട്ടീസ് ഇറക്കിയിരിക്കുന്നത്. കമ്പനിയെ നേരത്തെ കണ്ടെത്തിയാല്‍ മാത്രമേ താത്പര്യം അനുസരിച്ചുള്ള കമ്മീഷന്‍ കിട്ടുകയുള്ളു.

വടക്കന്‍ കിഴക്കന്‍ സംസ്ഥാനങ്ങളില്‍ നക്‌സല്‍ വിരുദ്ധ പ്രവര്‍ത്തനങ്ങള്‍ക്കുളള മാനദണ്ഡങ്ങള്‍ ടെണ്ടറിന്റെ മറ്റൊരു ഭാഗത്തുള്‍പ്പെടുത്തിയിരിക്കുന്നത് ആശയക്കുഴപ്പമുണ്ടാക്കിയിട്ടുണ്ട്. പിഴവ് സംഭവിച്ചിട്ടുണ്ടെന്നും ടെണ്ടറില്‍ മാറ്റങ്ങള്‍ വരുത്തുമെന്നും ഉന്നത പൊലീസ് വൃത്തങ്ങള്‍ പറയുന്നു. മാത്രമല്ല ഹെലികോപ്റ്റര്‍ കമ്പനിയുടെ യോഗം വിളിച്ച് അഭിപ്രായം തേടിയ ശേഷമേ അന്തിമ ടെണ്ടര്‍ നടപടികളിേക്ക് കടക്കുകയുള്ളുവെന്നും ഉന്നത പൊലീസ് വൃത്തങ്ങള്‍ അറിയിച്ചു.

ടെണ്ടറും മാനദണ്ഡങ്ങളും മറികടന്നാണ് പവന്‍ ഹന്‍സ് എന്ന കമ്പനിയില്‍ നിന്നും കഴിഞ്ഞ വര്‍ഷം സര്‍ക്കാര്‍ ഹെലികോപ്റ്റര്‍ വാടകയ്ക്ക് എടുത്തത്. 22.21 കോടി രൂപ പൊലീസ് ഫണ്ടില്‍ നിന്നും പവന്‍ ഹന്‍സിന് നല്‍കേണ്ടിവന്നു. കേന്ദ്രഫണ്ട് പ്രതീക്ഷിച്ചെങ്കിലും കിട്ടയില്ല. മുഖ്യമന്ത്രിയുടെയും ഉദ്യോഗസ്ഥരുടെയും യാത്രകള്‍ക്കും അവയവദാനത്തിനുമായി ചുരുക്കം ചില യാത്രകളൊഴിച്ചാല്‍ മറ്റൊന്നിനും ഹെലികോപ്റ്റര്‍ ഉപയോഗിച്ചില്ല. പെട്ടിമുടി ദുരന്തം ഉണ്ടായപ്പോള്‍ മോശം കാലാവസ്ഥ കാരണം ഹെലികോപ്റ്റര്‍ ഉപയോഗിച്ചില്ല. താഴ്ന്ന് പറക്കാനാകാത്തതിനാല്‍ മാവോയിസ്റ്റ് പരിശോധനയും നടന്നില്ല.

പോലീസിലെ ഉന്നതരാണ് പുതിയ നീക്കത്തിന് പിന്നിലുള്ളതെന്നാണ് അറിയുന്നത്. സര്‍ക്കാരിന്റെ പിന്തുണ കൂടിയാവുമ്പോള്‍ വീണ്ടും കോടികള്‍ പോക്കറ്റിലാവും.