ശക്തമായ മഴയെ തുടർന്ന് പി സി ജോർജിന്റെ വീട് മുങ്ങി. അരക്കെട്ട് വരെ വെള്ളത്തിൽ മുങ്ങി നിൽക്കുന്ന പി സി യുടെ ദൃശ്യങ്ങൾ സമൂഹമാധ്യമങ്ങളിലൂടെ പ്രചരിക്കാൻ തുടങ്ങിയതോടുകൂടിയാണ് പൂഞ്ഞാർ മുൻ എം എൽ എ യുടെ വീട്ടിലും വെള്ളം കയറിയ കാര്യം പുറംലോകം അറിയുന്നത്.

തന്റെ ജീവിതത്തില്‍ ഇന്നുവരെയായും ഇത്രയും ഭീകരമായ വെള്ളപ്പൊക്കം ഈരാറ്റുപ്പേട്ടയില്‍ കണ്ടിട്ടില്ലെന്നും ഇന്നേവരെ തന്റെ വീട്ടില്‍ വെള്ളം കയറുന്ന അവസ്ഥ ഉണ്ടായിട്ടില്ലെന്നും പി സി ജോര്‍ജ് മാധ്യമങ്ങളോട് വ്യക്തമാക്കി.

ഈരാറ്റുപ്പേട്ടയില്‍ നിന്ന് ഇപ്പോള്‍ വെള്ളം ഇറങ്ങുന്നുണ്ടെന്നും എന്നാല്‍ ഈ വെള്ളം ചെന്ന് ചേരുന്നത് പന്തളം, ചെങ്ങന്നൂര്‍, റാന്നി, കോന്നി, പാലാ, കോട്ടയം എന്നീ മേഖലകളിലാണെന്നും അതിനാല്‍ തന്നെ ഇവിടെയുള്ള ജനങ്ങള്‍ വളരെയേറെ ശ്രദ്ധിക്കണമെന്നും പി സി ജോ‌ര്‍ജ് മുന്നറിയിപ്പ് നൽകിയിരുന്നു.

കോട്ടയത്തെ വിവിധ സ്ഥലങ്ങളില്‍ മണ്ണിടിച്ചില്‍ അടക്കമുള്ള ദുന്തമുണ്ടായിട്ടുണ്ടെന്നും എന്നാല്‍ ഇവിടെയൊന്നും പൊലീസിനോ രക്ഷാപ്രവര്‍ത്തകര്‍ക്കോ ചെന്നെത്താന്‍ സാധിക്കാത്തതിനാല്‍ ജനങ്ങള്‍ തന്നെയാണ് ഇവിടെയെല്ലാം രക്ഷാപ്രവര്‍ത്തനത്തിന് മുന്നിട്ട് ഇറങ്ങിയതെന്നും പി സി ജോര്‍ജ് പറഞ്ഞു.