അനുപമയുടെ അച്ഛനെതിരെ നടപടി , ദത്ത് വിവാദത്തില്‍ പി.എസ് ജയചന്ദ്രനെതിരെ സിപിഎം നടപടി, പേരൂര്‍ക്കട ലോക്കല്‍ കമ്മിറ്റിയില്‍ നിന്നും നീക്കി, പാര്‍ട്ടി പരിപാടികളില്‍ പങ്കെടുക്കരുത് , സിപിഎം അന്വേഷണ കമ്മീഷനെ നിയോഗിച്ചു.

പാര്‍ട്ടിയുടെ എല്ലാ ചുമതലകളില്‍നിന്നും ജയചന്ദ്രനെ നീക്കം ചെയ്യാന്‍ തീരുമാനമായി. സി.പി.എം. പേരൂര്‍ക്കട ലോക്കല്‍ കമ്മിറ്റി അംഗമായിരുന്നു ജയചന്ദ്രന്‍.

വിഷയവുമായി ബന്ധപ്പെട്ട് ഇന്ന് പേരൂര്‍ക്കട ലോക്കല്‍ കമ്മിറ്റി യോഗം ചേര്‍ന്നിരുന്നു. സ്ഥാനത്തുനിന്ന് ജയചന്ദ്രനെ നീക്കണമെന്നാണ് ഇന്ന് ചേര്‍ന്ന ലോക്കല്‍ കമ്മിറ്റി യോഗത്തിലെ മുഴുവന്‍ അംഗങ്ങളും ആവശ്യപ്പെട്ടത്.

ഈ വിഷയത്തില്‍ പാര്‍ട്ടി കുറച്ചു ദിവസങ്ങളിലായി കടുത്ത പ്രതിരോധത്തിലിരിക്കുകയായിരുന്നു. സാധാരണ പേരൂര്‍ക്കട ലോക്കല്‍ കമ്മിറ്റി ചേരാറുള്ള കെട്ടിടത്തില്‍ നിന്ന് മാറി കേശവദാസപുരത്തുള്ള ലോക്കല്‍ കമ്മിറ്റി ഓഫീസില്‍ വച്ചായിരുന്നു യോഗം നടന്നത്.

മൂന്ന് മണിക്കൂറോളം നീണ്ടു നിന്ന യോഗത്തില്‍ താന്‍ തെറ്റു ചെയ്തിട്ടില്ലെന്ന് ജയചന്ദ്രന്‍ അറിയിച്ചു. അനുപമയുടെ അറിവോടെയാണ് താന്‍ കുഞ്ഞിനെ കൈമാറിയതെന്നും അജിത്തിന്റെ സ്വഭാവത്തിലുള്‍പ്പെടെ തനിക്ക് സംശയം തോന്നിയിരുന്നുവെന്നും ജയചന്ദ്രന്‍ കമ്മിറ്റിയെ അറിയിച്ചു.

പക്ഷെ പാര്‍ട്ടി അംഗങ്ങളില്‍ നിന്ന് കടുത്ത എതിര്‍പ്പാണ് യോഗത്തില്‍ ഉയര്‍ന്നത്. പാര്‍ട്ടിയുടെ പ്രതിച്ഛായ നശിപ്പിക്കുന്ന അളവിലേക്ക് പ്രശ്‌നം വഷളായതായും സംഭവം ജയചന്ദ്രന് കുറച്ചു കൂടി കാര്യക്ഷമമായി കൈകാര്യം ചെയ്യാമായിരുന്നെന്നും കമ്മിറ്റിയില്‍ അഭിപ്രായമുണ്ടായി.

ഈ സാഹചര്യത്തിലാണ് തുടര്‍ന്നാണ് ജയചന്ദ്രനെ പാര്‍ട്ടിയില്‍ വഹിക്കുന്ന എല്ലാ സ്ഥാനങ്ങളില്‍ നിന്നും നീക്കാന്‍ തീരുമാനം ഉണ്ടായത്.