നെയ്യാറ്റിന്‍കരയില്‍ കഞ്ചാവും മയക്കുമരുന്ന് ഗുളികകളുമായി യുവാവിനെ എക്‌സൈസ് സംഘം അറസ്റ്റ് ചെയ്തു. നരുവാമൂട് സ്വദേശി അനുവാണ് അറസ്റ്റിലായത്. പ്രതിയെ റിമാന്‍ഡ് ചെയ്തു. നെയ്യാറ്റിന്‍കര എക്‌സൈസ് സംഘം മുക്കംപാലമൂട് ഭാഗത്ത് നടത്തിയ പരിശോധനയിലാണ് മുട്ടായി അനു എന്ന അനു അറസ്റ്റിലായത്. മയക്കുമരുന്ന് ഗുളികകള്‍ മുട്ടായി എന്ന രഹസ്യ കോഡ് ഉപയോഗിച്ച് കച്ചവടം നടത്തുന്നതാണ് ഇയാളുടെ രീതി. 1.405 കിലോഗ്രാം കഞ്ചാവും 25 നൈട്രാസെപാം ഗുളികകളും അനുവില്‍ നിന്ന് കണ്ടെടുത്തു. ഷെഡ്യൂള്‍ എച്ച് 1 വിഭാഗത്തില്‍പ്പെടുന്ന ഇത്തരം ഗുളികകള്‍ മാനസിക രോഗികളുടെ അവസ്ഥ വളരെ വഷളാകുമ്‌ബോള്‍ ഡോക്‌റുടെ പ്രത്യേക നിര്‍ദ്ദേശ പ്രകാരം മാത്രം നല്‍കുന്നതാണ്. 20 ഗ്രാമിന് മുകളില്‍ ഇത്തരം മയക്കുമരുന്ന് ഗുളിക കൈവശം സൂക്ഷിക്കുന്നത് പത്ത് വര്‍ഷം വരെ കഠിന തടവും ഒരു ലക്ഷം രൂപ വരെ പിഴയും ലഭിക്കാവുന്ന കുറ്റമാണ്. പ്രതിക്ക് ലഹരി മരുന്ന് ഗുളികകള്‍ എവിടെ നിന്ന് കിട്ടി എന്നതിനെക്കുറിച്ച് കൂടുതല്‍ അന്വേഷണം നടത്തും. ഇയാളുടെ പേരില്‍ വിവിധ പോലീസ് സ്‌റ്റേഷനുകളില്‍ വധശ്രമം ഉള്‍പ്പെടെയുള്ള നിരവധി ക്രിമിനല്‍ കേസുകള്‍ നിലവിലുണ്ട്. എക്‌സൈസ് സംഘത്തെ കണ്ട് രക്ഷപെടാന്‍ ശ്രമിച്ച പ്രതിയെ ബലപ്രയോഗത്തിലൂടെയാണ് പിടികൂടിയത്.