1886 ഒക്ടോബര്‍ 29ന് വിശാഖം തിരുന്നാല്‍ ഹൃദയരക്തംകൊണ്ടെഴുതിയ കരാറിന് ഇന്നു 135 വര്‍ഷം പൂര്‍ത്തിയായി. തിരുവതാംകൂറും മദ്രാസ് പ്രസിഡന്‍സിയും തമ്മിലുള്ള കരാറോടെ മുല്ലപ്പെരിയാര്‍ ഡാമിന്റെ നിര്‍മ്മാണം തുടങ്ങി. തിരുവതാംകൂര്‍ രാജാവായിരുന്ന വിശാഖം തിരുന്നാള്‍ 999 വര്‍ഷത്തേക്ക് തുല്യം ചാര്‍ത്തി നല്‍കിയ പാട്ടക്കരാറിന്റെ വാര്‍ഷിക ദിനത്തിലാണ് ഇന്ന് ഡാം തുറന്നത്.

1886 ഒക്ടോബര്‍ 29നായിരുന്നു 'ഹൃദയരക്തം' കൊണ്ട് വിശാഖം തിരുന്നാള്‍ രാജാവ് ഈ കരാര്‍ എഴുതിയത്. അതായത് ഇന്നേക്ക് 135 വര്‍ഷം മുമ്ബ് തന്നെ. കരാറിന് ഇനിയും 864 വര്‍ഷം കൂടി ബാക്കിയുണ്ട്.
തിരുവിതാംകൂറിന്റെ അധീനതയിലുള്ള 8000 ഏക്കര്‍ ഭൂമിയും അണക്കെട്ട് നിര്‍മിക്കാന്‍ മറ്റൊരു 100 ഏക്കര്‍ ഭൂമിയും നല്‍കാന്‍ വ്യവസ്ഥ ചെയ്യുന്നതായിരുന്നു 999 വര്‍ഷത്തെ കരാര്‍. 1886 ഓക്ടോബര്‍ 29 നാണ് തിരുവിതാംകൂറിനുവേണ്ടി ദിവാന്‍ വി രാമഅയ്യങ്കാരും മദ്രാസ് പ്രസിഡന്‍സിക്കു വേണ്ടി സ്‌റ്റേറ്റ് സെക്രട്ടറി ജോണ്‍ ചൈല്‍ഡ് ഹാനിംഗ്ടണും 999 വര്‍ഷം കാലാവധിയുള്ള മുല്ലപ്പെരിയാര്‍ പാട്ടക്കരാര്‍ ഒപ്പുവച്ചത്.
'എന്റെ ഹൃദയരക്തം കൊണ്ട് ഞാനിതില്‍ ഒപ്പ് വയ്ക്കുന്നു' എന്നാണ് വിഷമത്തോടെ അന്ന് വിശാഖം തിരുനാള്‍ മഹാരാജാവ് പ്രതികരിച്ചത്. പെരിയാറിനു കുറുകെ അണക്കെട്ട് നിര്‍മ്മിച്ച്, മുഴുവന്‍ ജലവും തമിഴ് നാട്ടിലേക്കു കൊണ്ടുപോകാം എന്നതായിരുന്നു കരാറിന്റെ ഉള്ളടക്കം.
1895ല്‍ ബ്രട്ടീഷ് എന്‍ജിനിയര്‍ കേണല്‍ ജോണ്‍ പെന്നിക് വിക്കിന്റെ നേതൃത്വത്തില്‍ നിര്‍മ്മാണം പൂര്‍ത്തിയാക്കി അന്നത്തെ മദ്രാസ് ഗവര്‍ണര്‍ ലോര്‍ഡ് വെന്‍ലോക്ക് കമ്മിഷന്‍ ചെയ്ത് പ്രവര്‍ത്തനം ആരംഭിച്ചു.
1947ല്‍ ഇന്ത്യ സ്വതന്ത്രമായതോടെ നാട്ടുരാജ്യങ്ങളും ബ്രിട്ടീഷ് സര്‍ക്കാരുമായുള്ള എല്ലാ കരാറുകളും റദ്ദായെങ്കിലും 1970ല്‍ മുഖ്യമന്ത്രി സി അച്യുതമേനോന്റെ കാലത്ത് മുല്ലപ്പെരിയാര്‍ കരാര്‍ മുന്‍കാല പ്രാബല്യത്തോടെ പുതുക്കി നല്‍കുകയായിരുന്നു. ഇതോടെ ഒരിക്കല്‍ കാലഹരണപ്പെട്ട കരാറിന് പുനര്‍ജന്മം ലഭിച്ചു. അതിന്റെകൂടി ഫലം കൂടിയാണ് ഇന്ന് കേരളം അനുഭവിക്കുന്ന ഈ ഭീഷണി.