തിരുവനന്തപുരത്ത് ദത്ത് നൽകിയ കേസിലെ ഏറെനാളുകളായി വാദപ്രതിവാദങ്ങൾ അരങ്ങേറുകയാണ്. ഇപ്പോഴിതാ സ്വന്തം കുഞ്ഞിനെ തേടുന്ന അമ്മയ്ക്ക് നീതി കിട്ടാന്‍ സമരം ചെയ്ത യൂത്ത് കോണ്‍ഗ്രസ് വനിതാ നേതാക്കളെ കസ്റ്റഡിയില്‍ എടുത്ത് കടുത്ത സ്ത്രീവിരുദ്ധപരാമര്‍ശം നടത്തിയ കന്റോണ്‍മെന്റ് സി.ഐക്കെതിരെ നടപടിയെടുക്കണമെന്ന് പ്രതിപക്ഷനേതാവ് വി.ഡി സതീശൻ രംഗത്ത്.

വി.ഡി സതീശന്‍ തന്റെ ഫേസ്ബുക് പോസ്റ്റിലൂടെയാണ് ആവശ്യപ്പെട്ടത്. പ്രവര്‍ത്തകരെ ഐറ്റങ്ങള്‍ എന്ന് വിളിച്ച്‌ അധിക്ഷേപിച്ചെന്ന് കഴിഞ്ഞ ദിവസം യൂത്ത് കോണ്‍ഗ്രസ് നേതാവ് വീണ എസ്.നായര്‍ ഫേസ്ബുക് പോസ്റ്റിട്ടിരുന്നു.

കൂടാതെ പെണ്‍കുട്ടികളോടും സ്ത്രീകളോടും സഭ്യമായി പെരുമാറാന്‍ അറിയാത്തയാള്‍ നിയമപാലകനായിരിക്കാന്‍ യോഗ്യനല്ല. ഇതാണോ പൊലീസിന്റെ നയവും ഭാഷയുമെന്ന് മുഖ്യമന്ത്രി പറയണം. നവോത്ഥാന ചരിത്രവും സ്ത്രീ സുരക്ഷയും നിരന്തരം ഓര്‍മ്മിപ്പിക്കുന്ന മുഖ്യമന്ത്രി ഈ ഉദ്യോഗസ്ഥനെതിരെ കര്‍ശന നടപടി എടുക്കണം. നീതി തേടിയെത്തുന്ന സ്ത്രീകളെ ഉന്നത പൊലീസുദ്യോഗസ്ഥര്‍ പോലും അപമാനിക്കുന്നത് പതിവായി എന്നും അദ്ദേഹം കുറിക്കുകയുണ്ടായി.