വേനൽച്ചൂടിൽ വെന്തുരുകുന്ന മലബാർ മേഖലയിൽ അപ്രതീക്ഷിതമായി എത്തിയ കനത്ത മഴയും കാറ്റും വൻ നാശനഷ്ടങ്ങൾ വിതച്ചു.

കോട്ടയം ഉൾപ്പെട്ടെയുള്ള ജില്ലകളിലും മഴയുണ്ട്. കണ്ണൂരിലെ മലയോര മേഖലകളിൽ ശക്തമായ മഴയാണ് രേഖപ്പെടുത്തിയത്. കണ്ണൂർ നഗരത്തിലും തലശ്ശേരിയിലും മഴ പെയ്തു. കനത്ത കാറ്റിൽ പരശുരിൽ വീടിന്റെ മേൽക്കൂര തകർന്നു. ചിറ്റാരിപ്പറമ്പിൽ കടയുടെ മേൾക്കൂര പറന്നുപോയി. കൂത്തുപറമ്പിൽ മൂന്ന് വീടുകൾക്ക് മുകളിൽ തെങ്ങ് വീണു.'

കോഴിക്കോട് ജില്ലയുടെ വിവിധ ഭാഗങ്ങളിലും മഴ പെയ്തതോടെ അന്തരീക്ഷ താപനിലയിൽ കുറഞ്ഞിട്ടുണ്ട് കോഴിക്കോട് മലയോര, തീരദേശ മേഖലകളിലാണ് ശക്തമായ മഴ പെയ്തത്. കുറ്റ്യാടി, നാദാപുരം, വടകര മേഖലകളിലാണ് ഉച്ചയോടെ മഴ തുടങ്ങിയത്. ശക്തമായ കാറ്റും ഇടിമിന്നലുമുണ്ട്.

പത്തനംതിട്ട, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിൽ ഒറ്റപ്പെട്ടയിടങ്ങളിൽ ഇടിമിന്നലോട് കൂടിയ ഇടത്തരം മഴയ്ക്കും മണിക്കൂറിൽ 50 കിലോമീറ്റർ വരെ വേഗതയിൽ ശക്തമായ കാറ്റിനും സാധ്യതയുണ്ടെന്ന് കാലാവസ്ഥ കേന്ദ്രം പ്രവചിക്കുന്നു. തിരുവനന്തപുരം, കൊല്ലം, കോട്ടയം, ഇടുക്കി, എറണാകുളം, പാലക്കാട് ജില്ലകളിൽ ഒറ്റപ്പെട്ടയിടങ്ങളിൽ ഇടിമിന്നലോട് കൂടിയ ഇടത്തരം മഴയ്ക്കും മണിക്കൂറിൽ 40 കിലോമീറ്റർ വരെ വേഗതയിൽ ശക്തമായ കാറ്റിനും മറ്റു ജില്ലകളിൽ ഒറ്റപ്പെട്ടയിടങ്ങളിൽ നേരിയ മഴയ്ക്കും സാധ്യതയുണ്ടെന്നാണ് പ്രവചനം.
മലപ്പുറം ജില്ലയിൽ ഇടിമിന്നലേറ്റ് ഒരാൾ മരിക്കുകയും കോഴിക്കോട് ജില്ലയിൽ ഒരാൾക്ക് ഗുരുതരമായി പരിക്കേൽക്കുകയും ചെയ്തു. ശനിയാഴ്ച വൈകുന്നേരത്തോടെയാണ് മലയോര മേഖലകളിലും നഗരപ്രദേശങ്ങളിലും ശക്തമായ കാറ്റോടുകൂടിയ മഴ തകർത്തുപെയ്തത്.

മലപ്പുറം എടവണ്ണയിൽ ഇടിമിന്നലേറ്റാണ് ഒരു മരണം റിപ്പോർട്ട് ചെയ്തത്. പാലപ്പറ്റ സ്വദേശിയായ കാരി (65) ആണ് മരിച്ചത്. വൈകുന്നേരം മഴ പെയ്യാൻ തുടങ്ങിയ സമയത്ത് സ്വന്തം വീട്ടുമുറ്റത്ത് നിൽക്കുകയായിരുന്നു ഇദ്ദേഹം. പെട്ടെന്നുണ്ടായ ശക്തമായ ഇടിമിന്നലിൽ ഇദ്ദേഹത്തിന് ഗുരുതരമായി പരിക്കേൽക്കുകയും ഉടൻ തന്നെ മരണം സംഭവിക്കുകയുമായിരുന്നു. മൃതദേഹം തുടർനടപടികൾക്കായി ആശുപത്രിയിലേക്ക് മാറ്റി.

കോഴിക്കോട് ജില്ലയുടെ വിവിധ ഭാഗങ്ങളിൽ ശക്തമായ കാറ്റിൽ മരങ്ങൾ കടപുഴകി വീണു. മാവൂർ മേഖലയിൽ വലിയ മരം ഒടിഞ്ഞുവീണ് മൂന്ന് വീടുകൾക്ക് ഭാഗികമായി കേടുപാടുകൾ സംഭവിച്ചു. വീടിനുള്ളിൽ ആളുകൾ ഉണ്ടായിരുന്നുവെങ്കിലും വലിയ അപകടങ്ങൾ ഒഴിവായത് ഭാഗ്യമായാണ്.

കൊയിലാണ്ടിയിൽ ഓടിക്കൊണ്ടിരുന്ന ബൈക്കിന് മുകളിലേക്ക് മരക്കൊമ്പ് വീണ് അണേല സ്വദേശി ആദർശിന് (24) ഗുരുതരമായി പരിക്കേറ്റു. തലയ്ക്ക് പരിക്കേറ്റ ഇദ്ദേഹത്തെ ഉടൻ തന്നെ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ജില്ലയിലെ മലയോര മേഖലകളിൽ പലയിടത്തും വൈദ്യുതി തൂണുകൾക്ക് മുകളിൽ മരങ്ങൾ വീണതിനെത്തുടർന്ന് ശനിയാഴ്ച രാത്രി വൈകിയും വൈദ്യുതി ബന്ധം പുനഃസ്ഥാപിക്കാൻ കഴിഞ്ഞിട്ടില്ല.

മലപ്പുറം ജില്ലയിലെ കൊണ്ടോട്ടി, നെടിയിരുപ്പ് മേഖലകളിൽ കർഷകർക്ക് വലിയ സാമ്പത്തിക നഷ്ടമാണ് മഴയുണ്ടാക്കിയത്. ചിറയിൽ നെടുമ്പിലങ്ങാട് ഭാഗത്ത് ആഞ്ഞുവീശിയ കാറ്റിൽ നൂറുകണക്കിന് വാഴകൾ ഒടിഞ്ഞുവീണു. കർഷകരായ ചിങ്ങൻ മജീദ്, പടിഞ്ഞാറെ വീട്ടിൽ അയ്യപ്പൻ എന്നിവരുടെ ഉടമസ്ഥതയിലുള്ള 600-ൽ അധികം കുലച്ച വാഴകളാണ് പൂർണ്ണമായും നശിച്ചത്. വിളവെടുപ്പിന് പാകമായ വാഴകൾ നശിച്ചത് കർഷക കുടുംബങ്ങളെ വലിയ പ്രതിസന്ധിയിലാക്കിയിരിക്കുകയാണ്.

അടുത്ത ദിവസങ്ങളിലും സംസ്ഥാനത്തിന്റെ വിവിധ ഭാഗങ്ങളിൽ വേനൽമഴയ്ക്ക് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. ഉച്ചയ്ക്ക് ശേഷം ഇടിമിന്നലോടുകൂടിയ മഴയ്ക്ക് സാധ്യതയുള്ളതിനാൽ ജനങ്ങൾ ജാഗ്രത പാലിക്കണമെന്ന് ദുരന്തനിവാരണ അതോറിറ്റി നിർദ്ദേശിച്ചു. ഇടിമിന്നൽ സമയത്ത് തുറസ്സായ സ്ഥലങ്ങളിൽ നിൽക്കരുതെന്നും വൈദ്യുത ഉപകരണങ്ങൾ കൈകാര്യം ചെയ്യുമ്പോൾ ശ്രദ്ധിക്കണമെന്നും അധികൃതർ മുന്നറിയിപ്പ് നൽകി.