ജനകീയ പ്രശ്‌നങ്ങളില്‍ നിരന്തരം ഇടപെടാറുള്ള പൊതു മരാമത്ത് മന്ത്രി മുഹമ്മദ് റിയാസ് ഞായറാഴ്ച തിരുവനന്തപുരത്ത് നടത്തിയ ഷോക്കെതിരെ വ്യാപക പ്രതിഷേധം.

മിന്നല്‍ സന്ദര്‍ശനം എന്ന് പേരിട്ട ശേഷം ചാനലുകളെയെല്ലാം വിളിച്ചു വരുത്തി ഒരു ഉദ്യോഗസ്ഥനോട് ക്യാമറകള്‍ക്ക് മുമ്പില്‍ മോശമായി പെരുമാറിയതാണ് വിമര്‍ശനങ്ങള്‍ക്ക് ഇടയാക്കിയത്.

പൊതുവേ എല്ലാവരോടും മാന്യമായി പെരുമാറുന്ന മുഹമ്മദ് റിയാസിന് എന്തു പറ്റി എന്ന് ചോദിക്കുന്നവരുടെ എണ്ണം കൂടി.

വെള്ളിയാഴ്ച്ച രാത്രി ആരോരുമറിയാതെ തിരുവനന്തപുരം മെഡിക്കല്‍ കോളേജ് സന്ദര്‍ശിച്ച ആരോഗ്യ മന്ത്രി വീണാ ജോര്‍ജിനെ താങ്കള്‍ക്ക് മാതൃകയാക്കാമായിരുന്നില്ലേ എന്നാണ് സമൂഹമാധ്യമങ്ങള്‍ ചോദിക്കുന്നത്.

പൊതുമരാമത്ത് വകുപ്പിന് കീഴിലുള്ള റസ്റ്റ് ഹൗസുകളില്‍ ഇന്നു മുതല്‍ പൊതുജനങ്ങള്‍ക്കായി ഓണ്‍ലൈന്‍ ബുക്കിംഗ് ആരംഭിക്കാനിരിക്കേയാണ് തിരുവനന്തപുരം തൈക്കാട്ടെ സര്‍ക്കാര്‍ റസ്റ്റ് ഹൗസില്‍ മന്ത്രി മിന്നല്‍ പരിശോധന നടത്തിയത്.

റസ്റ്റ് ഹൗസ് പരിസരം നടന്നു കണ്ട മന്ത്രി അടുക്കളയും പരിശോധിച്ചു. റസ്റ്റ് ഹൗസിന് പരിസരത്തെ മാലിന്യം നീക്കം ചെയ്യാത്തതിന് റസ്റ്റ് ഹൗസ് മാനേജറെ മന്ത്രി ശകാരിക്കുകയും ചെയ്തു. ഇതെല്ലാം ചാനല്‍ ലൈവിലൂടെ കേരളം കണ്ടതിന് പുറമേ മന്ത്രി തന്നെ തന്റെ ഫെയ്‌സ് ബുക്കില്‍ വ്യക്തമായി കാണിക്കുകയും ചെയ്തു.

പൊതുജനങ്ങള്‍ക്ക് പ്രവേശനം അനുവദിക്കുന്നതിന് മുന്നോടിയായി റസ്റ്റ് ഹൗസുകള്‍ ശുചിയാക്കണം എന്ന് നേരത്ത തന്നെ പൊതുമരാമത്ത് വകുപ്പ് റസ്റ്റ് ഹൗസ് മാനേജര്‍മാരോട് ആവശ്യപ്പെട്ടിരുന്നു. ഇത്ര ദിവസമായിട്ടും ഈ നിര്‍ദേശം പാലിക്കാതിരുന്നതാണ് മന്ത്രിയെ ക്ഷുഭിതനാക്കിയത്. റെസ്റ്റ് ഹൗസിന്റെ ചുമതലയുള്ള ഉദ്യോഗസ്ഥനെതിരെ നടപടിയെടുക്കാന്‍ മന്ത്രി നിര്‍ദേശം നല്‍കി. ആശുപത്രികള്‍ നന്നാക്കണമെന്ന് കഴിഞ്ഞ ദിവസ വും ആരോഗ്യമന്ത്രി നിര്‍ദ്ദേശം നല്‍കിയിരുന്നതാണ്. എന്നാല്‍ മെഡിക്കല്‍ കോളേജിലെ ദയനീയ കാഴ്ചകള്‍ കണ്ട് മന്ത്രി ആരെയും ശകാരിച്ചില്ല. അത് മന്ത്രിയുടെ പക്വത തന്നെയാണ്.

സര്‍ക്കാര്‍ എടുത്ത നല്ലൊരു സമീപനത്തെ തകര്‍ക്കാനോ അട്ടിമറിക്കാനോ ആരെയും അനുവദിക്കില്ലെന്ന് മന്ത്രി പരിശോധനയ്ക്ക് ശേഷം മാധ്യമങ്ങളോട് പറഞ്ഞു. പൊതുജനങ്ങള്‍ക്ക് റസ്റ്റ് ഹൗസുകള്‍ ലഭ്യമാക്കാനുള്ള തീരുമാനം സര്‍ക്കാര്‍ നേരത്തെ എടുത്തതാണ് ഇതിനു മുന്നോടിയായി റസ്റ്റ് ഹൗസുകള്‍ ശുചീകരിക്കണമെന്നും അടിയന്തര സൗകര്യങ്ങളെല്ലാം സജ്ജമാക്കണമെന്നും എല്ലാ റസ്റ്റ് ഹൗസുകളിലും അറിയിച്ചതുമാണ്. ഇക്കാര്യത്തില്‍ യാതൊരു വിട്ടുവീഴ്ചയും അനുവദിക്കുന്നതല്ല - മന്ത്രി വ്യക്തമാക്കി.

തിരുവനന്തപുരത്തെ ഒരു റസ്റ്റ് ഹൗസില്‍ ജോലി ചെയ്യുന്ന ജീവനക്കാര്‍ തീര്‍ച്ചയായും സി പി എം അനുഭാവികള്‍ തന്നെയായിരിക്കും. ഒരു മാനേജര്‍ വിചാരിച്ചാല്‍ തീര്‍ക്കാവുന്ന പ്രശ്‌നങ്ങളല്ല സര്‍ക്കാര്‍ സ്ഥാപനങ്ങളിലുള്ളത്. ഇടതു മുന്നണി പ്രവര്‍ത്തകരാണെങ്കില്‍ പറഞ്ഞാല്‍ കേള്‍ക്കില്ലെന്ന പരാതി വ്യാപകമാണ്.

യാഥാര്‍ത്ഥ്യം മനസിലാക്കി പക്വതയോടെ പെരുമാറുകയാണ് മന്ത്രി ചെയ്യേണ്ടത്. ഉദ്യോഗസ്ഥരെ ശകാരിക്കുന്നത് മുന്‍ മന്ത്രി ജി.സുധാകരന്റെ രീതിയായിരുന്നു.എന്നാല്‍ അദ്ദേഹത്തിനും സ്ഥലകാലബോധം ഉണ്ടായിരുന്നു.സുധാകരന്റെ പ്രായവും നാം കണക്കിലെടുക്കണം. ചെറുപ്പക്കാരനായ റിയാസ് ഇത്തരത്തില്‍ പെരുമാറുമ്പോള്‍ അത് വിമര്‍ശനങ്ങള്‍ വിളിച്ചു വരുത്തും. ഉദ്യോഗസ്ഥര്‍ ജോലിയില്‍ വീഴ്ച വരുത്തിയാല്‍ നടപടിയെടുക്കണം. അതല്ലാതെ ശകാരിക്കുകയല്ല വേണ്ടത്. മുമ്പേ നടന്ന കെ എം.മാണിയെ പോലുള്ളവരുടെ മാത്യക റിയാസ് മനസിലാക്കേണ്ടതായിരുന്നു.

ആരെയും അധിക്ഷേപിക്കാന്‍ മന്ത്രിക്ക് അവകാശമില്ല. അത് റിയാസിനെ പോലുള്ള ഭാവിയുള്ള മന്ത്രിമാര്‍ക്ക് യോജിച്ചതല്ല. മന്ത്രി ചൂടാവുമ്പോള്‍ പ്രതികരിക്കാന്‍ ഉദ്യോഗസ്ഥര്‍ക്ക് കഴിയാറില്ല. അത് മന്ത്രി മനസിലാക്കണം. ഇത് ജീവിതമാണ്. സിനിമയല്ല.