ഒന്നര വർഷത്തെ ഇടവേളക്ക് ശേഷം ഇന്നുമുതൽ അക്ഷരമുറ്റത്ത് ഒത്തുചേരുന്ന അധ്യാപക വിദ്യാർത്ഥി സുഹൃത്തുക്കൾക്ക് മികവാർന്നൊരു അധ്യയന വർഷം ആശംസിച്ച് കാട്ടാക്കട എം എൽ എ ഐ ബി സതീഷ് . അദ്ദേഹത്തിന്റെ വാക്കുകൾ ഇങ്ങനെ;

മൊബൈൽ ഫോണും, ലാപ്പ്ടോപ്പും, ടാബും തീർത്ത വെർച്ച്വൽ ലോകത്ത് നിന്ന് ഇറങ്ങി കൊച്ചുകൂട്ടുകാർ ഇന്ന് മുതൽ വിദ്യാലയമുറ്റത്തേക്ക് ......കോവിഡാനന്തരം ലോകം പതിയെ പതിയെ ചലിച്ച് തുടങ്ങി എന്ന് നിസ്സംശയം പറയാം ......

തെരുവോരങ്ങളിലും, ബസ് സ്റ്റോപ്പുകളിലും ഇനി കലപില കൂട്ടുന്ന വർണ്ണപ്പറവകൾ കണക്കെ നമ്മുടെ വിദ്യാർത്ഥി സമൂഹം.... അതിജീവനമെന്ന മഹാപാഠം വിജയകരമായി പൂർത്തികരിച്ച വിദ്യാർത്ഥി സമൂഹമാകും ഇന്ന് സ്കൂളുകളിൽ പരസ്പരം കണ്ടുമുട്ടുക ...പൂർണ്ണമായും കോവിഡ് മുക്തമായ സമൂഹമായിട്ടല്ല നമ്മൾ വീണ്ടും ഒരുമിച്ചിരിക്കുന്നത് എന്ന ചിന്ത മനസിൽ നിരന്തരം ഉണ്ടാകട്ടെ ...... 

വെർച്ച്വൽ ലോകം മനുഷ്യരെ ഒത്തുചേരലിന് പകരമാകില്ല എന്ന യാഥാർത്ഥ്യ ബോധവും, വാക്സിനേഷന്റെയും കോവിഡ് പ്രതിരോധ പ്രവർത്തനങ്ങളുടെ മേൻമയുടെ ആത്മവിശ്വാസവും പകർന്ന സ്‌ഥൈര്യമാണ് വിദഗ്ധരേയും സംസ്ഥാന സർക്കാരിനെയും സ്കൂളുകൾ തുറക്കാമെന്ന തീരുമാനത്തിലേക്ക് എത്തിച്ചത്.

അതിനാൽ തന്നെ മാസങ്ങൾ നീണ്ട തയ്യാറെടുപ്പുകൾക്ക് ശേഷമാണ് ഈ ദിനം വന്നെത്തുന്നത്. സ്കൂളുകൾ ബയോ ബബിളുകളാണ്. അതായത് കൊറോണ എന്ന രോഗാണുവിന് ഇടമില്ലാത്തൊരിടം..... അത് അങ്ങനെ തന്നെ ആയിരിക്കുവാൻ നമുക്കെല്ലാവർക്കും ഒരുമിച്ച് പരിശ്രമിക്കാം....

എല്ലാ കൂട്ടുകാരുടെയും സ്കൂളുകൾ 2020 മാർച്ചിൽ തങ്ങൾ പടിയിറങ്ങിപ്പോയ അവസ്ഥയിലായിരിക്കില്ല ഇപ്പോൾ ഉണ്ടാവുക. സംസ്ഥാന സർക്കാരിന്റെ പൊതുവിദ്യാലയ സംരക്ഷണ യജ്ഞത്തിന്റെ ഭാഗമായി മിക്ക സ്കൂളുകളുടെയും ഭൗതീക സാഹചര്യത്തിലെ മികവ് അവർക്ക് ഇന്ന്മുതൽ അനുഭവവേദ്യമാകും ......

മുന്നിലുള്ള അവസരങ്ങൾ പരമാവധി പ്രയോജനപ്പെടുത്തി ഉയരങ്ങളിലെത്തുവാൻ എല്ലാ കൂട്ടുകാർക്കും സാധിക്കട്ടെ..... ഒന്നര വർഷത്തെ ഇടവേളക്ക് ശേഷം ഇന്നുമുതൽ അക്ഷരമുറ്റത്ത് ഒത്തുചേരുന്ന അധ്യാപക വിദ്യാർത്ഥി സുഹൃത്തുക്കൾക്ക് മികവാർന്നൊരു അധ്യയന വർഷം ആശംസിക്കുന്നു.....

ശുഭദിനം....
സ്നേഹപൂർവ്വം
ഐ.ബി സതീഷ്