കേരള പിറവി ദിനത്തില്‍ മലയാളികളെ അക്ഷരാര്‍ത്ഥത്തില്‍ ഞെട്ടിപ്പിക്കുന്നതായിരുന്നു മിസ് കേരള 2019 അന്‍സി കബീര്‍, മിസ് കേരള 2019 റണ്ണറപ്പ് അഞ്ജന ഷാജന്‍ എന്നിവരുടെ അപകട മരണ വാര്‍ത്ത.ഫോര്‍ട്ട് കൊച്ചിയിലെ ഡി.ജെ.പാര്‍ട്ടി കഴിഞ്ഞ് മടങ്ങവെയാണ് ഇവര്‍ അപകടത്തില്‍ പെട്ടതെന്നാണ് പോലീസ് പറയുന്നത്. കൊച്ചിയില്‍ നിന്നുള്ള യാത്രക്കിടെ എറണാകുളം വൈറ്റിലയില്‍ ഹോളിഡേ ഇന്‍ഹോട്ടലിനു മുന്നില്‍ വച്ചാണ് അപടമുണ്ടായത്. സംഭവ സ്ഥലത്തുവച്ചു തന്നെ ഇരുവരും മരിക്കുകയായിരുന്നു.

പാര്‍ട്ടി കഴിഞ്ഞ് മടങ്ങുമ്പോള്‍ ബൈക്കുമായി കൂട്ടിയിടിക്കാതിരിക്കാന്‍ കാര്‍ വെട്ടിച്ചതാണ് അപകടത്തിന് കാരണമെന്ന് പോലീസ് പറയുന്നു.അപകടത്തില്‍ കാര്‍ പൂര്‍ണ്ണമായി തരകര്‍ന്നു. മിസ് കേരള 2019 അന്‍സി കബീര്‍, മിസ് കേരള 2019 റണ്ണറപ്പ് അഞ്ജന ഷാജന്‍ എന്നിവര്‍ക്ക് പുറമെ കാറില്‍ മറ്റ് രണ്ട് സുഹൃത്തുക്കള്‍ കൂടിയുണ്ടായിരുന്നു . ഒപ്പമുണ്ടായിരുന്ന രണ്ടുപേരില്‍ ഒരാളുടെ നില ഗുരുതരമാണ്. പരിക്കേറ്റ ഇവര്‍ എറണാകുളത്തെ സ്വകാര്യ ആശുപത്രിയില്‍ ചികിത്സയിലാണ്. അന്‍സി കബീറിന്‍റേയും, അഞ്ജന ഷാജന്‍റേയും മ‍ൃതദേഹവും ഇതേ ആശുപത്രിയില്‍ സൂക്ഷിച്ചിരിക്കുകയാണ്. നടപടി ക്രമങ്ങൾ പൂർത്തിയാക്കിയ ശേഷം മൃതദേഹങ്ങൾ ബന്ധുക്കൾക്ക് വിട്ടുനൽകും.

എന്നാൽ മരണത്തിലേക്കുള്ള അവസാന യാത്രക്ക് മുമ്പ് മുന്‍ മിസ് കേരള അന്‍സി കബീര്‍ കുറിച്ച വാക്കുകള്‍ അറം പറ്റിയതിന്റെ ആഘാതത്തിലാണ് ആരാധകരും സുഹൃത്തുക്കളും. 'പോകാനുള്ള സമയമായി' (It’s time to go) എന്നാണ് അന്‍സി കബീര്‍ ഇന്‍സ്റ്റഗ്രാമില്‍ കുറിച്ചത്. യാത്ര പോയ സ്ഥലത്തെ ചെറു വീഡിയോയ്ക്ക് ഒപ്പമായിരുന്നു ആന്‍സിയുടെ ഒറ്റവരി പോസ്റ്റ്. വിശ്വസിക്കാനാകുന്നില്ലെന്നും ഇത് ഒരുപാട് നേരത്തെയാണെന്നുമാണ് അന്‍സിയുടെ മരണത്തില്‍ ദുഃഖം പങ്കുവെച്ച പലരും അവരുടെ ഇന്‍സ്റ്റഗ്രാം പോസ്റ്റില്‍ കുറിച്ചത്. അന്‍സി ഇത് നേരത്തെ മുന്‍കൂട്ടി കണ്ടിരുന്നുവെന്നും സുഹൃത്തുക്കൾ അവരുടെ പോസ്റ്റിന് താഴെ കുറിച്ചു.

റാംപിലെ ഇരുവരുടെയും സൗഹൃദം മരണത്തിലും ഒരുമിച്ചപ്പോൾ ആരാധകര്‍ക്കും,സുഹ‍ൃത്തികള്‍ക്കും ഇത് ഉൾക്കൊള്ളാനാകുന്നില്ല. 2019 മിസ് കേരളയും മോഡലുമായ 2019 ലെ മിസ് കേരള അൻസി കബീറും റണ്ണറപ്പ് അഞ്ജന ഷാജനും അടുത്ത സുഹൃത്തുക്കൾ കൂടിയായിരുന്നു. മിസ് കേരള സൗന്ദര്യ മത്സരത്തിനിടെയാണ് ഇരുവരും സൗഹൃദത്തിലായത്. പരിശീലന നാളുകളിൽ ഇരുവരുടെയും സൗഹൃദം കൂടുതൽ ദൃഢമായത്.. കോവിഡ് കാലത്തും അടുത്ത സൗഹൃദം ഇരുവരും കാത്തു സൂക്ഷിച്ചിരുന്നു. പല പരിപാടികളിലും ഒന്നിച്ചു പങ്കെടുക്കാറുള്ള ഇരുവരും മരണത്തിലും ഒന്നിക്കുകയായിരുന്നു.