കൊച്ചിയിൽ ഷോർട്ട് ഫിലിമിന്റെ ഷൂട്ടിങ് സ്ഥലത്ത് നിന്ന് അഞ്ജന ഷാജൻ തിരക്കിട്ടു മടങ്ങാൻ കാരണം വീട്ടിൽ അമ്മ തനിച്ചായതോടെ. വീട്ടിൽ അമ്മ തനിച്ചാണ്, എനിക്ക് ഇന്നു തന്നെ മടങ്ങണം.. എന്നായിരുന്നു അഞ്ജനയുടെ അവസാന വാക്ക്.

ശനിയാഴ്ചയാണ് അഞ്ജന ആളൂരിലെ വീട്ടിൽ നിന്ന് കൊച്ചിയിൽ ഷൂട്ടിങ്ങിനെത്തിയത്. അച്ഛൻ ഷാജൻ ആലുവയിലെ ജോലി സ്ഥലത്തായതിനാൽ അമ്മ ലതിക വീട്ടിൽ ഒറ്റയ്ക്കായിരുന്നു. സോഫ്റ്റ്‌വെയർ എൻജിനീയറായ സഹോദരൻ അർജുൻ കൊച്ചിയിലായിരുന്നു.

ചിത്രീകരണം പൂർത്തിയായപ്പോൾ അമ്മയുടെ അടുത്തേയ്ക്ക് എത്രയും വേഗം എത്താൻ കൂട്ടുകാരിയായ അൻസി കബീറിനൊപ്പം കാറിന്റെ പിൻസീറ്റിലിരുന്ന‍ായിരുന്നു യാത്ര.

പ്ലസ്ടു വരെയുള്ള പഠനം ഹൈദരാബാദിലെ കേന്ദ്രീയ വിദ്യാലയത്തിൽ പൂർത്തിയാക്കിയ ശേഷമാണ് അഞ്ജന ബിഎഎംഎസ് പൂർത്തിയാക്കിയത്. കുറച്ചുനാൾ ബെംഗളൂരുവുവിലെ ആശുപത്രിയിൽ സേവനമനുഷ്ഠിച്ചിരുന്നു.

കൊച്ചിയിൽ നിന്ന് അഞ്ജനയുടെ തൃശൂരിലെ വീട്ടിലേയ്ക്ക് മടങ്ങും വഴിയായിരുന്നു അപകടം നടന്നത്. ഇരുവരും സഞ്ചരിച്ചിരുന്ന കാർ എറണാകുളം ബൈപ്പാസ് റോഡിൽ ഹോളിഡേ ഇൻഹോട്ടലിന് മുന്നിൽ അപകടത്തിൽപ്പെടുകയായിരുന്നു.

ഇടത് വശം ചേർന്ന് പോയ ബൈക്കിൽ ഇടിക്കാതിരിക്കാൻ വെട്ടിച്ച കാർ മരത്തിൽ ഇടിച്ചുണ്ടായ അപകടമാണ് ദുരന്തത്തിൽ കലാശിച്ചത്. ബൈക്കിൽ ഇടിച്ചെങ്കിലും യാത്രക്കാരന് കാര്യമായ പരുക്കില്ല.

ഡ്രൈവർ സീറ്റിൽ എയർ ബാഗ് ഉണ്ടായിരുന്നതിനാൽ ഡ്രൈവർക്ക് കാര്യമായ പരുക്കുകൾ സംഭവിച്ചില്ല. പിന്നിൽ വലതുവശത്തിരുന്ന യുവാവ് മുന്നിലേയ്ക്കു തെറിച്ചു വീണു തലയ്ക്ക് കാര്യമായി പരുക്കേറ്റിട്ടുണ്ട്.

സംഭവ സ്ഥലത്തുവച്ചു തന്നെ അൻസിയും, അഞ്ജനയും മരിച്ചു. നാലുപേരാണ് വാഹനത്തിലുണ്ടായിരുന്നത്. ഒപ്പമുണ്ടായിരുന്ന രണ്ടുപേരിൽ ഒരാളുടെ അവസ്ഥ ഗുരുതരമാണ്. ഇരുവരും എറണാകുളം മെഡിക്കൽ സെന്ററിൽ ചികിത്സയിലുണ്ട്.