പേരൂര്‍ക്കട സ്വദേശിനി അനുപമയുടെ ആണ്‍കുഞ്ഞിനെ രേഖകളില്‍ തിരിമറി നടത്തി ആന്ധ്രാ ദമ്പതികള്‍ക്ക് ദത്തു നല്‍കിയ കേസില്‍ ശിശുക്ഷേമ സമിതിക്കും സി ഡബ്ലുസിക്കും കുരുക്ക് മുറുകുന്നു.

ദത്തു നല്‍കിയതിന്റെ മുഴുവന്‍ രേഖകളും ശിശുക്ഷേമ സമിതിയും സി. ഡബ്ലു. സി. യും 20 നകം ഹാജരാക്കാന്‍ തിരുവനന്തപുരം കുടുംബ കോടതി ഉത്തരവിട്ടു.

ശിശുക്ഷേമ സമിതിക്കും ചൈല്‍ഡ് വെല്‍ഫയര്‍ കമ്മിറ്റിക്കും ഉള്ള ദത്ത് ലൈസന്‍സ് , കുഞ്ഞിനെ ഉപേക്ഷിക്കപ്പെട്ട നിലയിലോ കൊണ്ടുവന്നേല്‍പ്പിച്ച നിലയിലോ ലഭിച്ചത് , ജനന സര്‍ട്ടിഫിക്കറ്റ് , അഡോപ്ഷന്‍ സര്‍ട്ടിഫിക്കറ്റ് , കുഞ്ഞിനെ ദത്ത് നല്‍കുന്നത് വിളംബരം ചെയ്തുള്ള പത്രപ്പരസ്യം , ഡിഎന്‍എ പ്രൊഫൈല്‍ റിപ്പോര്‍ട്ട് , ദത്തിന് മുന്നോടിയായി പോലീസിന് നല്‍കിയ പരാതി റിപ്പോര്‍ട്ടടക്കമുള്ള സകല റെക്കോര്‍ഡുകളും സഹിതം സത്യവാങ്മൂലം ഹാജരാക്കണം.


ചട്ടങ്ങള്‍ പാലിക്കാതെ നിയമവിരുദ്ധമായുള്ള കുട്ടിക്കടത്തിന് ശിശുക്ഷേമ സമിതിയെയും സി ഡബ്ലുസിയെയും തലസ്ഥാത്തെ കുടുംബക്കോടതി രൂക്ഷമായി വിമര്‍ശിച്ചു. ദത്ത് ലൈസന്‍സിന്റെ കാലാവധി തീര്‍ന്നതിന് ശേഷമാണ് കുഞ്ഞിനെ ദത്ത് നല്‍കിയതെന്ന് റെക്കോര്‍ഡുകള്‍ പരിശോധിച്ച് കണ്ടെത്തിയ ജഡ്ജി കെ. ബിജു മേനോന്‍ രണ്ട് സ്ഥാപനങ്ങളെയും രൂക്ഷമായി വിമര്‍ശിക്കുകയായിരുന്നു. ലൈസന്‍സ് പുതുക്കാത്തതിന്റെ കാരണം വിശദമാക്കാനും കോടതി ഉത്തരവിട്ടു. കുഞ്ഞ് എങ്ങനെ ശിശുക്ഷേമ സമിതിയിലെത്തിയെന്നതടക്കമുള്ള തുടര്‍ നടപടികളടക്കം മുദ്രവച്ച കവറില്‍ ഹാജരാക്കണമെന്നും കോടതി ഉത്തരവിട്ടു. അനുപമയുടെ കക്ഷി ചേരല്‍ ഹര്‍ജിയും 20 ന് പരിഗണിക്കും.

ദത്തുമായി ബന്ധപ്പെട്ട് വനിതാ ശിശു വികസന വകുപ്പ് മെമ്പര്‍ സെക്രട്ടറി സമര്‍പ്പിച്ച ഇടക്കാല ഹര്‍ജി പരിഗണിക്കുകയായിരുന്നു കോടതി. 2003 ലെ ജുവനൈല്‍ ജസ്റ്റിസ് (കെയര്‍ ആന്റ് പ്രൊട്ടക്ഷന്‍ ഓഫ് ചില്‍ഡ്രന്‍) കേരള ചട്ടം 58 പ്രകാരമുള്ള ഹര്‍ജിയിലാണ് കോടതിയുടെ രൂക്ഷ വിമര്‍ശനങ്ങള്‍ രണ്ടു സ്ഥാപനങ്ങളും ഏറ്റുവാങ്ങിയത്. 2021 സെപ്റ്റംബര്‍ 6 നാണ് മിസലേനിയസ് സിവിള്‍ ആപ്ലിക്കേഷന്‍ 18/2021 നമ്പരായി കുടുംബക്കോടതിയില്‍ ഹര്‍ജി ഫയല്‍ ചെയ്തത്. ഒക്ടോബര്‍ 23 നാണ് അനുപമ കക്ഷി ചേരല്‍ ഹര്‍ജി സമര്‍പ്പിച്ചത്.


കുഞ്ഞ് ഉപേക്ഷിക്കപ്പെട്ട നിലയില്‍ കിട്ടിയതാണോ കൈമാറിക്കിട്ടിയതാണോയെന്ന ചോദ്യത്തിന് ഉപേക്ഷിക്കപ്പെട്ട നിലയില്‍ കിട്ടിയതെന്ന മറുപടിയാണ് ശിശുക്ഷേമ സമിതി ഒക്ടോബര്‍ 25 ന് കോടതിയില്‍ ബോധിപ്പിച്ചത്. സംഭവത്തില്‍ പേരൂര്‍ക്കട പോലീസ് അന്വേഷണ പുരോഗതി റിപ്പോര്‍ട്ട് ഹാജരാക്കാന്‍ സമയം തേടി. നവംബര്‍ 20 നകം റിപ്പോര്‍ട്ട് ഹാജരാക്കാനും കോടതി ഉത്തരവിട്ടു.

കുട്ടിക്കടത്തു കേസില്‍ 2 മുതല്‍ 5 വരെ പ്രതികളായ അനുപമയുടെ മാതാവ് സ്മിത ജെയിംസ് , സഹോദരി അഞ്ജു , ഭര്‍ത്താവ് അരുണ്‍ , അനുപമയുടെ പിതാവ് ജയച്ചന്ദ്രന്റെ സുഹൃത്ത് രമേശ് , പേരൂര്‍ക്കട വാര്‍ഡ് മുന്‍ കൗണ്‍സിലര്‍ അനില്‍ കുമാര്‍ എന്നിവര്‍ സമര്‍പ്പിച്ച മുന്‍കൂര്‍ ജാമ്യ ഹര്‍ജിയില്‍ ഇന്ന് ജില്ലാ കോടതി വിധി പറയും.അതേസമയം ഒന്നാം പ്രതി ജയച്ചന്ദ്രന്‍ മുന്‍കൂര്‍ ജാമ്യഹര്‍ജി സമര്‍പ്പിച്ചിട്ടില്ല.