കെപിസിസി അധ്യക്ഷന്‍ കെ സുധാകരന്റെ കേഡര്‍ സ്വഭാവത്തിന്റെ ആദ്യ ഫലം അനുഭവിച്ച് പഴയ കൊച്ചി മേയര്‍ ടോണി ചമ്മണിയും കൂട്ടരും. ഒരാവേശത്തിന് ജോജുവിന് നേരെ കൈ പൊക്കിയതാണ്. കാറിന്റെ ചില്ല് പൊട്ടിച്ച് ഓടിക്കാനാണ് നോക്കിയത്. എന്നാല്‍ ജോജു ഓടിയില്ലെന്ന് മാത്രമല്ല കോണ്‍ഗ്രസുകാരെ അകത്താക്കുകയും ചെയ്തു.

ഇന്ധന വില വര്‍ധനയ്‌ക്കെതിരെ ദേശീയപാത ഉപരോധിച്ച് കഴിഞ്ഞയാഴ്ചയാണ് കോണ്‍ഗ്രസുകാര്‍ സമരം ചെയ്തത്. അങ്ങനെ സമരം ചെയ്ത കോണ്‍ഗ്രസ് പ്രവര്‍ത്തകരോടു തെരുവില്‍ പ്രതികരിച്ച നടന്‍ ജോജുവിന്റെ കാറിന്റെ ചില്ലു പൊട്ടിച്ച കേസില്‍ പ്രതികള്‍ക്കെതിരെ ശക്തമായ വകുപ്പാണ് പൊലീസ് ചുമത്തിയിരിക്കുന്നത്. പൊതുമുതല്‍ സംരക്ഷണ നിയമത്തിനു സമാനമായ സ്വകാര്യസ്വത്ത് സംരക്ഷണ നഷ്ടപരിഹാര നിയമമാണു (കേരള പ്രിവന്‍ഷന്‍ ഓഫ് ഡാമേജ് ടു െ്രെപവറ്റ് പ്രോപ്പര്‍ട്ടി ആന്‍ഡ് പേയ്‌മെന്റ് ഓഫ് കോംപന്‍സേഷന്‍ ആക്ട് കെപിഡിപിപിപി 2019) കോണ്‍ഗ്രസ് പ്രവര്‍ത്തകര്‍ക്കെതിരെ ചുമത്തിയത്.

കേരളത്തിലെ റോഡില്‍ നടക്കുന്ന പ്രതിഷേധ സമരങ്ങളുടെയും അക്രമ സമരങ്ങളുടെയും ചരിത്രത്തില്‍ ആദ്യമായാണു സ്വകാര്യ സ്വത്തിനു സംരക്ഷണം നല്‍കാന്‍ പൊതുപ്രവര്‍ത്തകര്‍ക്കെതിരെ ഈ വകുപ്പു ചുമത്തി കേസ് റജിസ്റ്റര്‍ ചെയ്യുന്നതെന്നാണു സൂചന. 5 വര്‍ഷം വരെ തടവും പിഴയും ലഭിക്കാവുന്ന കുറ്റകൃത്യമാണിത്. സ്വകാര്യ സ്വത്തിനു കേടുപാടു പറ്റാന്‍ കാരണം പൊട്ടിത്തെറി, തീപിടിത്തം എന്നിവയാണെങ്കില്‍ ശിക്ഷ 10 വര്‍ഷം വരെ കഠിനതടവും പിഴയുമാണ്.

ഇത്തരം കേസുകളില്‍ പ്രതികള്‍ക്കു ജാമ്യം ലഭിക്കാന്‍, കേടുപാടു സംഭവിച്ച സ്വകാര്യ സ്വത്തിന്റെ വിലയുടെ പകുതിയില്‍ കുറയാത്ത തുക കോടതി മുന്‍പാകെ ബാങ്ക് ഗാരന്റിയും തുല്യതുകയ്ക്കുള്ള രണ്ടാളുടെ ഉറപ്പും ബോണ്ടും നല്‍കണമെന്നാണ് നിയമം. എന്തായാലും ടോണി ചമ്മണി കുടുങ്ങിയെന്ന് പറഞ്ഞാല്‍ മതി.

പൊലീസ് നിയോഗിക്കുന്ന വിഡിയോഗ്രഫര്‍ പകര്‍ത്തിയ ദൃശ്യങ്ങള്‍ ഇന്ത്യന്‍ തെളിവു നിയമപ്രകാരം കോടതി സ്വീകരിക്കും. ഈ ദൃശ്യങ്ങളും പൊലീസ് സമര്‍പ്പിക്കുന്ന അനുബന്ധ റിപ്പോര്‍ട്ടും പരിശോധിച്ച ശേഷം ജാമ്യവ്യവസ്ഥകളില്‍ കോടതിക്ക് ഉചിതമായ തീരുമാനമെടുക്കാം.

സാധാരണ പ്രതിപക്ഷ പാര്‍ട്ടികള്‍ സംഘടിപ്പിക്കുന്ന ബഹുജന സമരങ്ങള്‍ക്കിടയില്‍ സംഭവിക്കുന്ന ഇത്തരം അനിഷ്ട സംഭവങ്ങളില്‍ ഇത്രയും ശക്തമായ വകുപ്പുകള്‍ ചുമത്തി കേസെടുക്കാറില്ല. ഇരുകക്ഷികളും തമ്മില്‍ സംസാരിച്ചു നഷ്ടപരിഹാരത്തിന്റെ കാര്യത്തില്‍ തീരുമാനമെടുത്തു കേസ് കോടതിക്കു പുറത്ത് ഒത്തുതീരുകയാണു പതിവ്.

അതേസമയം വഴി തടഞ്ഞുള്ള സിനിമാ ഷൂട്ടിംഗ് തടയുമെന്ന യൂത്ത് കോണ്‍ഗ്രസ് തീരുമാനത്തെ തള്ളി എറണാകുളം ഡിസിസി പ്രസിഡന്റ് മുഹമ്മദ് ഷിയാസ് രംഗത്തെത്തി. ഷൂട്ടിംഗ് തടയമെന്ന തീരുമാനമെടുത്തിട്ടില്ലെന്നും ലൊക്കേഷനുകളിലേക്ക് തങ്ങളാരും പോകില്ലെന്നും മുഹമ്മദ് ഷിയാസ് വ്യക്താക്കി.

കോണ്‍ഗ്രസും യൂത്ത് കോണ്‍ഗ്രസും അങ്ങനെയൊരു തീരുമാനമെടുക്കില്ല. ലൊക്കേഷനിലേക്ക് ഞങ്ങളാരും പോകുന്നില്ല എന്നും ഷിയാസ് പറഞ്ഞു. ജനങ്ങളുടെ സഞ്ചാര സ്വാതന്ത്ര്യം തടസപ്പെടുത്തിയും സര്‍ക്കാര്‍ ഓഫീസുകളുടെ പ്രവര്‍ത്തനം തടസപ്പെടുത്തിയുമുള്ള സിനിമ ചിത്രീകരണം എറണാകുളം ജില്ലയില്‍ ഇനി അനുവദിക്കില്ലെന്നായിരുന്നു യൂത്ത് കോണ്‍ഗ്രസ് ജില്ലാ പ്രസിഡന്റ് ടിറ്റോ ആന്റണി നേരത്തെ പറഞ്ഞിരുന്നത്. ലൊക്കേഷനുകളില്‍ ഗുണ്ടകളെ അണിനിരത്തിയാണ് പലയിടത്തും ഷൂട്ടിംഗ് നടത്തുന്നത്. ഇവര്‍ ജനങ്ങളെ ആട്ടിയകറ്റുകയാണ്. ചോദ്യം ചെയ്താല്‍ മര്‍ദനമടക്കം നേരിടേണ്ടി വരുന്ന സാഹചര്യവുമുണ്ട്. ജില്ലയില്‍ പൊതുജനങ്ങള്‍ക്ക് ബുദ്ധിമുട്ടുണ്ടാക്കുന്ന തരത്തിലുള്ള സിനിമ ചിത്രീകരണം മുന്നറിയിപ്പില്ലാതെ തടയുമെന്നും ടിറ്റോ ആന്റണി പറഞ്ഞിരുന്നു. ഇതിനെയാണ് ഇപ്പോള്‍ ഡിസിസി പ്രസിഡന്റ് തള്ളി പറഞ്ഞിരിക്കുന്നത്.