കേരളത്തിലെ ജനങ്ങളുടെ പ്രശ്‌നങ്ങള്‍ ചര്‍ച്ച ചെയ്യാന്‍ പ്രതിപക്ഷം തയ്യാറാകുന്നില്ലെന്നും പ്രതിപക്ഷം നിയമസഭയില്‍ തെരുവുചട്ടമ്പികളെപ്പോലെ പെരുമാറിയെന്നും ടി പി രാമകൃഷ്ണന്‍ എംഎല്‍എ. ഇന്നുരാവിലെ സഭ പിരിഞ്ഞതിനുശേഷം ഭരണപക്ഷ എംഎല്‍എമാര്‍ പ്രതിപക്ഷത്തിനെതിരെ പ്രതിഷേധിച്ചിരുന്നു. പോസ്റ്ററുകളും ചിത്രങ്ങളുമായാണ് എംഎല്‍എമാര്‍ പ്രതിഷേധിച്ചത്. ഇതിനിടയിലാണ് രാമകൃഷ്ണന്‍ മാദ്ധ്യമങ്ങളോട് പ്രതികരിച്ചത്.

'കേരളത്തിലെ ജനങ്ങളുടെ പ്രധാന പ്രശ്‌നങ്ങള്‍ ചര്‍ച്ച ചെയ്യുന്ന പ്രധാനപ്പെട്ടൊരു വേദിയാണ് നിയമസഭ. എത്രയോ പ്രശ്‌നങ്ങള്‍ ചര്‍ച്ച ചെയ്യുന്ന സ്ഥലത്ത് യുഡിഎഫ് വളരെ പ്രതിഷേധാത്മക നിലപാടാണ് സ്വീകരിച്ചത്. ഒരു പ്രശ്‌നവും ചര്‍ച്ച ചെയ്യാന്‍ അവര്‍ തയ്യാറല്ല. സഭാന്തരീക്ഷം അലങ്കോലമാക്കി തെരുവുചട്ടമ്പികളെപ്പോലെ അവര്‍ പെരുമാറുകയാണ്. സ്പീക്കര്‍ക്കുനേരെയുണ്ടായ കടന്നാക്രമണങ്ങള്‍ ജനങ്ങള്‍ക്കുമുന്‍പില്‍ ചര്‍ച്ചയാകുകയാണ്.

ശബരിമല സ്വര്‍ണക്കൊള്ളയില്‍ സര്‍ക്കാര്‍ ഹൈക്കോടതിയുടെ നിലപാട് അംഗീകരിച്ചാണ് തുടരുന്നത്. പ്രത്യേക അന്വേഷണ സംഘത്തിലെ അംഗങ്ങളെ ഹൈക്കോടതിയാണ് നിയോഗിച്ചത്. സത്യസന്ധരായ ഉദ്യോഗസ്ഥരെയാണ് സംഘത്തില്‍ ഉള്‍പ്പെടുത്തിയിരിക്കുന്നതെന്ന് ഹൈക്കോടതി തന്നെ പറഞ്ഞു. അവരുടെ അന്വേഷണത്തില്‍ ഹൈക്കോടതി സംതൃപ്തി പ്രകടിപ്പിച്ചതാണ്. എന്നാല്‍ ഹൈക്കോടതിയുടെ നിലപാടുകള്‍ക്ക് വിരുദ്ധമായ സമീപനമാണ് ഇപ്പോള്‍ യുഡിഎഫ് സ്വീകരിച്ചിരിക്കുന്നത്. അതാണ് നിയമസഭയില്‍ നമ്മള്‍ കഴിഞ്ഞ ദിവസങ്ങളില്‍ കണ്ടത്.

നിയമസഭ ശരിയായി നടപ്പിലാക്കാന്‍ അവര്‍ സമ്മതിക്കുന്നില്ല. പ്രതിപക്ഷനേതാവ് ആവര്‍ത്തിച്ചാവര്‍ത്തിച്ച് നുണ പറഞ്ഞ് ജനങ്ങളെ കബളിപ്പിക്കുകയാണ്. യാഥാര്‍ത്ഥ്യത്തിന് വിരുദ്ധമായ നിലപാടാണ് അവര്‍ സ്വീകരിക്കുന്നത്. അതിന്റെ നേതൃത്വം പ്രതിപക്ഷനേതാവ് ഏറ്റെടുത്തിരിക്കുകയാണ്. ഇത് ജനങ്ങള്‍ തള്ളിക്കളയും. ശബരിമലയിലെ ഒരുതരി സ്വര്‍ണം പോലും നഷ്ടമാകില്ലെന്ന് സര്‍ക്കാര്‍ നേരത്തെ വ്യക്തമാക്കിയതാണ്' അദ്ദേഹം പറഞ്ഞു.