കഴിഞ്ഞ ദിവസം സഭയിലുണ്ടായ സംഘര്‍ഷത്തില്‍ മുഖ്യമന്ത്രി പിണറായി വിജയനും സ്പീക്കര്‍ എ എന്‍ ഷംസീറും പ്രതിപക്ഷത്തെ രൂക്ഷമായി വിമര്‍ശിച്ചിരുന്നു. ഇതിന് പ്രതിപക്ഷനേതാവ് വി ഡി സതീശന്‍ കടുത്ത ഭാഷയില്‍ മറുപടി നല്‍കി. കോപ്രായം കാട്ടിയത് ഭരണപക്ഷമായിരുന്നുവെന്നാണ് വി ഡി സതീശന്‍ സഭയില്‍ ഇന്ന് രാവിലെ പറഞ്ഞത്.

മുഖ്യമന്ത്രി പ്രസ്താവന പിന്‍വലിക്കണമെന്നും മന്ത്രിമാര്‍ കോണ്‍ഗ്രസിലെ മുതിര്‍ന്ന നേതാവ് സോണിയാ ഗാന്ധിയെ അധിക്ഷേപിക്കുകയാണെന്നുമാണ് പ്രതിപക്ഷനേതാവ് പറഞ്ഞത്. വി ഡി സതീശനെതിരെ സ്പീക്കറും സഭയില്‍ ആരോപണങ്ങള്‍ ഉന്നയിച്ചു. ബാനര്‍ കെട്ടിയ വടികൊണ്ട് വാച്ച് ആന്റ് വാര്‍ഡിനെ അടിച്ചെന്നാണ് സ്പീക്കര്‍ പറഞ്ഞത്. നിര്‍ബന്ധമാണെങ്കില്‍ അടിച്ചയാളുടെ പേര് പറയാമെന്നും അദ്ദേഹം പറഞ്ഞു.

എന്നാല്‍ താന്‍ വാച്ച് ആന്റ് വാര്‍ഡിനെ അടിച്ചിട്ടില്ലെന്നും പ്രതിപക്ഷനേതാവ് മറുപടി നല്‍കി. വി ഡി സതീശന് ഇരട്ടത്താപ്പെന്നാണ് മന്ത്രി എം ബി രാജേഷ് ചോദ്യോത്തരവേളയില്‍ പറഞ്ഞത്. സോണിയാ ഗാന്ധിയെ അധിക്ഷേപിക്കാന്‍ ആരും ശ്രമിച്ചിട്ടില്ലെന്ന് മന്ത്രി പി രാജീവും പറഞ്ഞു. അവരെ തെരുവിലിട്ട് ചെണ്ട കൊട്ടുന്ന രീതിയിലാക്കാന്‍ ശ്രമിക്കുന്നത് പ്രതിപക്ഷനേതാവാണെന്നും കോണ്‍ഗ്രസിലെ ചില അംഗങ്ങള്‍ ശബരിമല സ്വര്‍ണക്കൊള്ളയിലെ പ്രധാന പ്രതിയുമായി സോണിയാ ഗാന്ധിയെ കാണാന്‍ പോയി. അതിനുത്തരം പ്രതിപക്ഷനേതാവ് പറഞ്ഞാല്‍ സോണിയാ ഗാന്ധിക്ക് പത്തരമാ?റ്റ് തിളക്കമുണ്ടാകുമെന്നും അദ്ദേഹം പറഞ്ഞു.

'ശശി തരൂര്‍ എംപി ഒരുപാട് നാള്‍ കാത്തുനിന്നിട്ടും സോണിയാ ഗാന്ധിയെ കാണാന്‍ സാധിച്ചിട്ടുണ്ടോ? എത്ര മുഖ്യമന്ത്രിമാര്‍ അവരെ കാണാനുള്ള അപ്പോയ്‌മെന്റ് ലഭിക്കാതെ പാര്‍ട്ടി വിട്ടുപോയി. അന്തരിച്ച മുന്‍മുഖ്യമന്ത്രി കെ കരുണാകരന് സോണിയാ ഗാന്ധിയുടെ അപ്പോയ്‌മെന്റ് കിട്ടിയോ? പക്ഷെ സ്വര്‍ണം കട്ടവര്‍ എങ്ങനെ അവിടെ എത്തി. സോണിയാ ഗാന്ധിയെ ഇരുട്ടില്‍ നിര്‍ത്തുന്ന പ്രതിപക്ഷനേതാവ് ബിജെപിയുടെ നാവായി മാറുകയാണ്' പി രാജീവ് പറഞ്ഞു.

അതേസമയം, പ്രതിപക്ഷ നേതാവിന് എല്ലാവരോടും പുച്ഛമാണെന്നും പൊതുവേദിയില്‍ മോശം വാക്കുകള്‍ ഉപയോഗിക്കുന്നുവെന്നും മന്ത്രി വി ശിവന്‍കുട്ടി പരാതിപ്പെട്ടു. സഭയിലെ സമരം തിരഞ്ഞെടുപ്പ് വിദഗ്ദന്‍ കനഗോലു പ്ലാന്‍ ചെയ്തതെന്നും ശിവന്‍കുട്ടി ആരോപിച്ചു. 'കനഗോലുവിന്റെ അഭിപ്രായം ആണ് പ്രതിപക്ഷ നേതാവ് പറയുന്നത്. ഇന്നലെ ചെയ്തതെല്ലാം ഇന്ന് മാറ്റി പറയുന്നു. എല്ലാ തോന്നിയവാസങ്ങളെയും ന്യായീകരിക്കുന്ന വ്യക്തിയായി സതീശന്‍ മാറി. പ്രതിപക്ഷ നേതാവ് മുഖ്യമന്ത്രിയാകാന്‍ പഠിക്കുന്നു. മൂന്നാം പിണറായി സര്‍ക്കാര്‍ വരും. വിരട്ടല്‍ ഇങ്ങോട്ട് വേണ്ട. പല കാര്യങ്ങളും പറഞ്ഞാല്‍ പ്രതിപക്ഷം മുണ്ട് തലയിലിട്ട് ഇറങ്ങിപ്പോകേണ്ടി വരും'ശിവന്‍കുട്ടി പറഞ്ഞു.