ഇന്ത്യയിലെ ഏറ്റവും വലിയ കോടീശ്വരനും വ്യവസായിയുമായ മുകേഷ് അംബാനി വീണ്ടും ഞെട്ടിപ്പിച്ചിരിക്കുകയാണ്. മുംബൈയിലെ തന്റെ പിടിപ്പുള്ള വസതിക്ക് പുറമെ ലണ്ടനില്‍ പുതിയ വീട് വാങ്ങിയിരിക്കുകയാണ്. ബക്കിങ്ഹാംഷെയറില്‍ സ്‌റ്റോക്ക് പാര്‍ക്കിലാണ് 300 ഏക്കര്‍ സ്ഥലത്ത് സ്ഥിതി ചെയ്യുന്ന പുതിയ വീട് അംബാനിയും കുടുംബവും സ്വന്തമാക്കിയിരിക്കുന്നത്. ഈ വര്‍ഷമാദ്യമാണ് 592 കോടി രൂപ മൂല്യമുള്ള ലണ്ടനിലെ സ്ഥലം അംബാനി വാങ്ങുന്നത്. ഇത് തങ്ങളുടെ പ്രധാനപ്പെട്ട വീടാക്കി മാറ്റുന്നതിനുള്ള തയ്യാറെടുപ്പുകള്‍ അവര്‍ തുടങ്ങിക്കഴിഞ്ഞു.

അതിനിടയ്ക്ക് വീണ്ടും അംബാനിയ്ക്ക് സുരക്ഷാ പ്രശ്‌നം ഉണ്ടായിരിക്കുകയാണ്. അംബാനിയുടെ മുംബൈയിലെ വസതിയായ ആന്റിലയ്ക്ക് പോലീസ് സുരക്ഷ ശക്തമാക്കി. രണ്ട് അജ്ഞാതര്‍ ആന്റിലയേക്കുറിച്ച് തന്നോട് അന്വേഷിച്ചതായി ഒരു ടാക്‌സി ഡ്രൈവര്‍ മുംബൈ പോലീസിന് വിവരം കൈമാറിയിരുന്നു. ഇതിനു പിന്നാലെയാണ് ആന്റിലയ്ക്ക് സുരക്ഷ ശക്തമാക്കിയത്. കെട്ടിടത്തിന് ചുറ്റുമുള്ള സി.സി.ടി.വി. ക്യാമറകള്‍ പരിശോധിക്കുമെന്നും മുംബൈ സിറ്റി പോലീസ് അറിയിച്ചു.

രണ്ടു പുരുഷന്മാര്‍ വന്ന്, ആന്റില എവിടെ ആണെന്ന് തന്നോട് ചോദിച്ചതായാണ് ടാക്‌സി ഡ്രൈവര്‍ ഫോണിലൂടെ പോലീസിനെ അറിയിച്ചത്. ഇവരുടെ കയ്യില്‍ വലിയ ബാഗുണ്ടായിരുന്നെന്നും പോലീസ് മാധ്യമങ്ങളോടു പറഞ്ഞു. ഡ്രൈവറുടെ മൊഴി രേഖപ്പെടുത്തുകയും മുതിര്‍ന്ന ഉദ്യോഗസ്ഥന്‍ സാഹചര്യം വിലയിരുത്തുകയും ചെയ്തു.

കഴിഞ്ഞ ഫെബ്രുവരിയില്‍, ആന്റിലയുടെ മുന്നില്‍ നിര്‍ത്തിയിട്ട വാനില്‍നിന്ന് സ്‌ഫോടക വസ്തുക്കള്‍ കണ്ടെത്തിയത് പരിഭ്രാന്തി സൃഷ്ടിച്ചിരുന്നു. 20 ജെലാറ്റിന്‍ സ്റ്റിക്കായിരുന്നു വാഹനത്തില്‍ ഉണ്ടായിരുന്നത്. കൂടാതെ മുകേഷ് അംബാനിയുടെയും നിത അംബാനിയുടേയും പേര്‍ക്കുള്ള കത്തും വാഹനത്തിലുണ്ടായിരുന്നു. മോഷ്ടിക്കപ്പെട്ട വാഹനമായിരുന്നു ഇതെന്ന് പിന്നീട് കണ്ടെത്തി. ഇതിന്റെ ഉടമ കൊല്ലപ്പെട്ടതായും കണ്ടെത്തിയിരുന്നു. സംഭവത്തെ കുറിച്ചുള്ള അന്വേഷണം പുരോഗമിക്കുകയാണ്. ഈ സംഭവത്തിനു പിന്നാലെ ആന്റിലയ്ക്ക് സുരക്ഷ ശക്തമാക്കിയിരുന്നു.



അതേസമയം മുകേഷ് അംബാനിയുടെയും കുടുംബത്തിന്റെയും പ്രധാന വസതി ലണ്ടനിലേക്ക് മാറ്റുകയാണെന്നുകാട്ടിയുള്ള റിപ്പോര്‍ട്ടുകള്‍ തള്ളി റിലയന്‍സ് ഇന്‍ഡസ്ട്രീസ് രംഗത്തെത്തി.

കോവിഡ് കാലത്ത് മുംബൈയിലെ അള്‍ട്ട്എമൗണ്ട് റോഡില്‍ സ്ഥിതി ചെയ്യുന്ന ആഢംബര വില്ലയായ അന്റീലിയയില്‍ കഴിയുന്നതിനിടെയാണ് ലണ്ടനില്‍ വീട് വാങ്ങുന്നതിനെക്കുറിച്ച് മുകേഷ് അംബാനിയും കുടുംബവും ചിന്തിച്ചതെന്ന് റിപ്പോര്‍ട്ടുകള്‍ വ്യക്തമാക്കുന്നു.

49 കിടപ്പുമുറികളാണ് ലണ്ടനിലെ വീട്ടിനുള്ളത്. കൂടാതെ ചെറിയൊരു ആശുപത്രിയും ഇവിടെയുണ്ട്. മുംബൈയിലെ വസതിയായ അന്റീലിയലേതിനു സമാനമായ എല്ലാ ആഢംബര സൗകര്യങ്ങളും ഇവിടെയുണ്ടെന്നാണ് റിപ്പോര്‍ട്ടുകള്‍ വ്യക്തമാക്കുന്നത്.



മുകേഷ് അംബാനിയുടെയും കുടുംബത്തിന്റെയും ദീപാവലി ആഘോഷം ഇത്തവണ ലണ്ടനിലെ വീട്ടിലായിരുന്നു. ആഘോഷങ്ങള്‍ക്കുശേഷം ഇന്ത്യയിലേക്ക് അവര്‍ തിരികെയെത്തും. വീടിന്റെ പണികള്‍ മുഴുവനും പൂര്‍ത്തിയായി കഴിഞ്ഞ് അടുത്ത വര്‍ഷം ഏപ്രിലോടുകൂടി അവര്‍ ലണ്ടനിലേക്ക് പോകും. മുംബൈയിലെ ഏറ്റവും തിരക്കുള്ള സ്ഥലത്ത് സ്ഥിതി ചെയ്യുന്ന അന്റീലിയയില്‍ നിന്ന് വ്യത്യസ്തമായി കുറച്ചുകൂടി വിശാലമായ ഒരു സ്ഥലത്ത് വീട് വേണമെന്ന അന്വേഷണമാണ് സ്‌റ്റോക്ക് പാര്‍ക്കിലെത്തിച്ചത്. പുതിയ വീടിനുവേണ്ടിയുള്ള അന്വേഷണം അംബാനികുടുംബം കഴിഞ്ഞ വര്‍ഷമാണ് തുടങ്ങിയത്.

1908ന് ശേഷം ഈ ബംഗ്ലാവ് സ്വകാര്യ വസതിയായി ഉപയോഗിച്ചു വരികയായിരുന്നു. പിന്നീട് ഇത് കണ്‍ട്രി ക്ലബ് ആയി മാറ്റി. ജെയിംസ് ബോണ്ട് സിനിമ ഈ വീട്ടില്‍ ഷൂട്ട് ചെയ്തിട്ടുണ്ട്.