വി ഡി സതീശനെതിരെ കോണ്‍ഗ്രസില്‍ പടയൊരുക്കം. ഇന്ധനവില വര്‍ധനയ്‌ക്കെതിരായ കോണ്‍ഗ്രസിന്റെ ചക്രസ്തംഭന സമരത്തില്‍ പ്രതിപക്ഷ നേതാവ് വി.ഡി.സതീശന്‍ പങ്കെടുക്കാത്തതിനെതിരെയാണ് കോണ്‍ഗ്രസില്‍ മുറുമുറുപ്പ് തുടങ്ങിയത്. തിങ്കളാഴ്ച രാവിലെ 11 മുതല്‍ 15 മിനിറ്റ് ആയിരുന്നു സമരം.

നിയമസഭ ഉള്ളതിനാലാണ് പങ്കെടുക്കാതിരുന്നത് എന്നാണ് സതീശന്റെ വിശദീകരണം. ചക്രസ്തംഭന സമരത്തെ അനുകൂലിക്കുന്നുണ്ടോയെന്ന മാധ്യമപ്രവര്‍ത്തകരുടെ ചോദ്യത്തില്‍നിന്നു പിന്മാറിയ സതീശന്‍, മുല്ലപ്പെരിയാര്‍ വിഷയം സഭയില്‍ ചര്‍ച്ചചെയ്യുമ്പോള്‍ താന്‍ അവിടെ വേണ്ടേയെന്ന മറുചോദ്യവും ചോദിച്ചു. നിയമസഭക്കടുത്ത് പാളയത്തും കോണ്‍ഗ്രസിന്റെ സമരം ഉണ്ടായിരുന്നു. നിയമസഭയില്‍ നിന്ന് പാളയത്തെത്താന്‍ സതീശന് നിഷ്പ്രയാസം കഴിയുമായിരുന്നു.

റോഡ് ഉപരോധത്തോടുള്ള എതിര്‍പ്പ് സതീശന്‍ നേരത്തെ വ്യക്മാക്കിയിരുന്നു.അതേസമയം, എല്ലാ നേതാക്കളും എല്ലായിടത്തും പങ്കെടുക്കേണ്ടതില്ലെന്ന് കെപിസിസി പ്രസിഡന്റ് കെ.സുധാകരന്‍ പ്രതികരിച്ചു.

രാവിലെ 11 മുതല്‍ 11.15 വരെയാണ് സമരം സംഘടിപ്പിച്ചത്. സെക്രട്ടേറിയറ്റ് മുതല്‍ രാജ്ഭവന്‍ വരെ പ്രതിഷേധ സമരം നടന്നു. എല്ലാ ജില്ലാ ആസ്ഥാനങ്ങളിലും ഡിസിസിയുടെ നേതൃത്വത്തില്‍ ചക്രസ്തംഭന സമരം സംഘടിപ്പിച്ചു. പൊതുജനങ്ങള്‍ക്ക് ബുദ്ധിമുട്ട് ഉണ്ടാകാത്ത വിധത്തിലും ഗതാഗതക്കുരുക്ക് ഉണ്ടാകാത്ത രീതിയിലും സമരം നടത്തുമെന്നാണ് അറിയിച്ചിരുന്നതെങ്കിലും പലയിടത്തും പ്രവര്‍ത്തകര്‍ വാഹനം തടഞ്ഞു.

ജോജു ജോര്‍ജിനെതിരെയുള്ള സമരം മൂര്‍ദ്ധന്യാവസ്ഥയില്‍ നില്‍ക്കുമ്പോഴാണ് സതീശന്‍ ചക്ര സ്തംഭന സമരത്തില്‍ നിന്ന് പിന്‍മാറിയത്. കെ പി സി സി നടത്തുന്ന സമരത്തില്‍ പങ്കെടുക്കണമെന്ന് അധ്യക്ഷന്‍ കെ.സുധാകരന്‍ ആവശ്യപ്പെട്ടിരുന്നു.എന്നാല്‍ തന്റെ നിലപാട് സതീശന്‍ സുധാകരനെ അറിയിച്ചിരുന്നു. അപ്പോഴും സമരത്തില്‍ നിന്ന്. പിന്‍മാറുന്നത് ശരിയല്ലെന്ന് സുധാകരന്‍ ആവര്‍ത്തിച്ചിരുന്നു.

സതീശന്‍ സ്വന്തം തടി രക്ഷിച്ചപ്പോഴാണ് ടോണി ചമ്മിണി ഉള്‍പ്പെടെയുള്ള നേതാക്കള്‍ ജോജുവിന്റെ കാര്‍ തകര്‍ത്ത കേസില്‍ അറസ്റ്റ് വരിച്ചത്. പ്രവര്‍ത്തകര്‍ പ്രകടനമായെത്തിയാണ് അറസ്റ്റ് വരിച്ചത്. അപ്പോഴും നിയമസഭയില്‍ മുല്ലപ്പെരിയാര്‍ കരാറിന്റെ പേരില്‍ പ്രസംഗിക്കുകയായിരുന്നു സതീശന്‍.

വി.ഡി സതീശനെതിരെ കോണ്‍ഗ്രസ് പ്രവര്‍ത്തകര്‍ മുമ്പും ശബ്ദമുയര്‍ത്തിയിട്ടുണ്ട്. തനിക്ക് ശരിയെന്ന് തോന്നുന്ന നിലപാടുകളില്‍ ഉറച്ചു നില്‍ക്കുന്നതാണ് സതീശന്റെ ശീലം. കോണ്‍ഗ്രസിന്റെ പൊതുസമര രീതികളുമായി അദ്ദേഹം യോജിക്കാറില്ല. പാര്‍ട്ടി അതിശക്തമായും കര്‍ശനമാവും ആവശ്യപ്പെട്ടാല്‍ പോലും സതീശന്‍ തലകുനിക്കാന്‍ തയ്യാറായില്ല. മുമ്പ് വി.എം.സുധീരനും മറ്റും ഇത്തരത്തില്‍ കര്‍ശന നിലപാട് സ്വീകരിച്ചിട്ടുണ്ട്. അതിന്റെ പരിണിത ഫലമാണ് സുധീരന്റെ സ്ഥാനത്യാഗം.

ജോജു ജോര്‍ജിനെതിരായ സമരത്തില്‍ കോണ്‍ഗ്രസ് പ്രവര്‍ത്തകര്‍ക്കിടയില്‍ ഇപ്പോള്‍ ആശയ കുഴപ്പമുണ്ട്. പ്രതിപക്ഷ നേതാവ് ജോജുവിന് അനുകൂലമായാണ് നിലപാടെടുത്തത്. ജോജുവിനെ വി.ഡി.സതീശന്‍ അനുകൂലിക്കുമ്പോള്‍ തങ്ങള്‍ എന്തിനാണ് അദ്ദേഹത്തെ എതിര്‍ക്കുന്നതെന്ന പൊതു നിലപാട് പ്രവര്‍ത്തകര്‍ ഉന്നയിച്ചാല്‍ അവരെ തെറ്റുപറയാനാവില്ല.

കോണ്‍ഗ്രസില്‍ എന്തും നടക്കും എന്നതു കൊണ്ടാണ് സതീശന്‍ ഇങ്ങനെയൊക്കെ ചെയ്യുന്നതെന്ന് വിശ്വസിക്കുന്നു. സി പി എമ്മില്‍ ആയിരുന്നെങ്കില്‍ ഇങ്ങനെ സംഭവിക്കുമായിരുന്നോ എന്ന് ചോദിക്കുന്ന കോണ്‍ഗ്രസ പ്രവര്‍ത്തകരും നിരവധിയുണ്ട്.

സതീശന്റെ പ്രവൃത്തിയോട് കെ സുധാകരന് നീരസമുണ്ട്. അദ്ദേഹം തന്റെ അടുപ്പക്കാരുമായി ഇക്കാര്യം പങ്കു വച്ചെന്നാണ് ലഭിക്കുന്ന സൂചനകള്‍. എന്നാല്‍ സതീശനെതിരെ രംഗത്തിറങ്ങാനുള്ള ധൈര്യം സുധാകരനില്ല. അങ്ങനെ ചെയ്തത് കൊണ്ട് എന്തെങ്കിലും പ്രയോജനമുണ്ടെന്ന് സുധാകരന്‍ കരുതുന്നില്ല.