ബാബു ആന്റണിയുടെ മകൻ സിനിമയിലേക്ക് എത്തിയതിന്റെ സന്തോഷം പങ്കുവെച്ച് നടി മഞ്ജു വാര്യർ. ആർതറിനു എല്ലാ വിധ ആശംസകളും നടി നേർന്നിരിക്കുകയാണ്. അവന്റെ പുതിയ ചിത്രമായ 'ദ ഗ്രേറ്റ്‌ എസ്കേപ്‌' ചിത്രത്തിനും ആർതറിനും എല്ലാ വിധ ആശംസകളും എന്നാണ് പോസ്റ്റിൽ മഞ്ജു പറയുന്നത്.

ദി ഗ്രേറ്റ് എസ്‌കേപ്പ് വഴി അഭിനയരംഗത്ത് അരങ്ങേറ്റം കുറിക്കുന്ന ആർതർ ബാബു ആന്റണിക്കും അദ്ദേഹത്തിന്റെ അച്ഛനും പ്രിയ ബാബു ആന്റണി ചേട്ടനും എല്ലാ ആശംസകളും നേരുന്നു. ബാബു ഏട്ടാ, നിങ്ങളുടെ മകൻ നിങ്ങളുടെ അഭിമാനമാകുമെന്ന് എനിക്ക് ഉറപ്പുണ്ട്! എന്ന ക്യാപ്ഷ്യനോടെയാണ് മഞ്ജു പോസ്റ്റ് പങ്കു വച്ചിരിക്കുന്നത്.

മഞ്ജുവാര്യരോളം മലയാളി സ്നേഹിക്കുന്ന മറ്റൊരു നടി മലയാളത്തിലില്ല . കാലം എത്ര പോയാലും മലയാളികളുടെ പ്രിയ നടിയായി തന്നെ മഞ്ജു വാര്യർ തന്നെയായിരിക്കും . സ്ക്രീന് അപ്പുറത്തും മഞ്ജുവിന്റെ വിശേഷങ്ങളറിയാനും ചിത്രങ്ങൾ കാണാനുമൊക്കെ ആരാധകർക്ക് താൽപ്പര്യം കൂടുതലാണ് .

അതേ സമയം മിക്സഡ്‌ മാർഷ്യൽ ആർട്സിൽ ഫസ്റ്റ്‌ ഡാൻ ബ്ലാക്ക്‌ ബെൽറ്റ്‌ കരസ്ഥമാക്കിയ ആർതർ പ്രധാന കഥാപാത്രത്തെ അവതരിപ്പിക്കുന്ന മൾട്ടിലിംഗ്വൽ ചിത്രം 'ദ ഗ്രേറ്റ്‌ എസ്കേപ്‌' ഷൂട്ടിംഗ്‌ പുരോഗമിക്കുകയാണ് . സൗത്ത്‌ ഇന്ത്യൻ യു.എസ്‌ ഫിലിംസിൻ്റെ നിർമാണത്തിൽ ഒരുങ്ങുന്ന ഈ ചിത്രം മലയാളിയായ സന്ദീപ്‌ ജെ.എൽ ആണ്‌ സംവിധാനം ചെയ്യുന്നത്‌.

ആക്ഷൻ ഡ്രാമയായൊരുങ്ങുന്ന ചിത്രമാണിത്. ഓഡീഷനിലൂടെയാണ്‌ ആർതർ തെരഞ്ഞെടുക്കപ്പെട്ടത്‌. 2013 ൽ ഇടുക്കി ഗോൾഡിൽ ഒരു ചെറിയ കഥാപാത്രത്തിൽ ആർതർ അഭിനയിച്ചിരുന്നു. 16 കാരനായ ആർതറിനെ തേടി നിരവധി അവസരങ്ങൾ തേടിയെത്തിയിരുന്നു.

പക്ഷേ വിദ്യാഭ്യാസം മുടങ്ങരുത്‌ എന്നതിനാൽ ബാബു ആന്റണി സമ്മതിച്ചില്ല. യു.എസിൽ ഷൂട്ട്‌ നടക്കുന്നതിനാലും വിദ്യാഭ്യാസത്തിന് തടസങ്ങൾ ഇല്ലാത്തതിനാലുമാണ് 'ദ ഗ്രേറ്റ്‌ എസ്കേപി'ൽ മകനെ അഭിനയിപ്പിക്കാൻ ബാബു ആന്റണി തീരുമാനമെടുത്തത്.