നടന് ജോജു ജോര്ജിന്റെ വാഹനം തകര്ത്ത കേസ്... ഒളിവിലായിരുന്ന പി.വൈ.ഷാജഹാനും അരുണ് വര്ഗീസും പൊലീസ് സ്റ്റേഷനില് കീഴടങ്ങി
കോണ്ഗ്രസ് ദേശീയ പാതയില് നടത്തിയ സമരത്തിനെതിരെ പ്രതികരിച്ചതിന് പിന്നാലെ നടന് ജോജു ജോര്ജിന്റെ വാഹനം സമരക്കാര് തകര്ത്തിരുന്നു. ജോജുവിന്റെ പരാതിയെ തുടര്ന്ന് ഒളിവിലായിരുന്ന രണ്ടു പ്രതികള് കൂടി ഇന്ന് പൊലീസ് സ്റ്റേഷനില് കീഴടങ്ങി. യൂത്ത് കോണ്ഗ്രസ് സംസ്ഥാന സെക്രട്ടറി പി.വൈ.ഷാജഹാന്, മണ്ഡലം പ്രസിഡന്റ് അരുണ് വര്ഗീസ് എന്നിവരാണ് മരട് പൊലീസ് സ്റ്റേഷനില് കീഴടങ്ങിയത്. ഇരുവരെയും ആരോഗ്യ പരിശോധനയ്ക്കു വിധേയമാക്കി കോടതിയില് ഹാജരാക്കും.
ഇന്നലെ അറസ്റ്റിലായ കൊച്ചി മുന് മേയര് ടോണി ചമ്മണി ഉള്പ്പടെയുള്ളവരെ റിമാന്ഡ് ചെയ്ത് കാക്കനാട് സബ് ജയിലിലേക്കു മാറ്റി. ആരോഗ്യ കാരണങ്ങളാലാണ് നേരത്തേ ഷാജഹാന് കീഴടങ്ങാന് എത്താതിരുന്നത് എന്നാണ് വിശദീകരണം. അറസ്റ്റ് ഉറപ്പായതോടെ ഷാജഹാനും അരുണും മൊബൈല് ഫോണ് ഓഫ് ചെയ്ത് ജില്ല വിട്ടു. ദിവസങ്ങളായി ഇടുക്കി ജില്ലയില് ഇവര് ഒളിവില് കഴിയുകയായിരുന്നു.
ഇതിനിടെയാണ് ഇന്ധന വിലവര്ധനയ്ക്കെതിരെ പ്രതിഷേധിച്ചതിന്റെ പേരില് കേസെടുത്ത പൊലീസ് നടപടികളെ നിയമപരമായി നേരിടാനുള്ള പാര്ട്ടി തീരുമാനമുണ്ടായത്. കേസില് പ്രതികളായ നേതാക്കള് അറസ്റ്റു വരിച്ച് ജയിലില് പോകാനും നേതൃത്വം തീരുമാനിച്ചു. എന്നാല് നേതാക്കള് ശ്രമിച്ചിട്ടും ഇവരെ ഫോണില് ലഭിക്കാതായതോടെ പൊലീസിനു മുന്നില് ഹാജരാകുന്നതു വൈകുകയായിരുന്നു.
അതേസമയം, തനിക്കെതിരെ വ്യാജ പരാതിയിലാണ് പൊലിസ് കേസെടുത്തതെന്ന് ടോണി ചമ്മിണി കഴിഞ്ഞദിവസം പ്രതികരിച്ചു. നിയമപരമായും രാഷ്ട്രീയപരമായും നേരിടുമെന്നും അദ്ദേഹം പറഞ്ഞു. സമരത്തെ അലങ്കോലപ്പെടുത്താന് ജോജു ശ്രമിച്ചെന്നും ഇതില് പ്രകോപിതരായാണ് പ്രവര്ത്തകര് പ്രതികരിച്ചതെന്നും ടോണി ചമ്മിണി പറഞ്ഞു.
ജോജു ജോര്ജ് സിപിഎമ്മിന്റെ ചട്ടുകമായി പ്രവര്ത്തിക്കുകയാണെന്നും കോണ്ഗ്രസ് ആരോപിച്ചു. ഗതാഗതക്കുരുക്ക് കണ്ട ശേഷം ആരുടെ സമരം എന്ന് ചോദിച്ച ശേഷമാണ് ജോജു പുറത്തിറങ്ങിയത്. കോണ്ഗ്രസിന്റെ സമരമായതിനാലാണ് ജോജു പ്രതികരിച്ചത്. സംവിധായകന് ബി ഉണ്ണികൃഷ്ണനും സി.പി.എമ്മും ചേര്ന്നാണ് കേസിലെ ഒത്തുതീര്പ്പ് ശ്രമങ്ങള് അട്ടിമറിച്ചതെന്നും ടോണി ചമ്മണി ആരോപിച്ചു.
ഇന്ധനവില വര്ധനയ്ക്കെതിരെ എറണാകുളം ജില്ലാ കോണ്ഗ്രസ് സംഘടിപ്പിച്ച റോഡ് ഉപരോധ സമരത്തിനെതിരെ ജോജു ജോര്ജ് രംഗത്ത് എത്തിയതാണ് പ്രശ്നങ്ങള്ക്ക് തുടക്കം. ജോജുവിന്റെ പ്രതിഷേധം രൂക്ഷമായതോടെ കോണ്ഗ്രസ് പ്രവര്ത്തകര് രംഗത്തു വരികയും അദ്ദേഹത്തിന്റെ വാഹനം അടിച്ചു തകര്ക്കുകയുമായിരുന്നു. ഇതിനെത്തുടര്ന്ന് ജോജു നല്കിയ പരാതിയുടെ അടിസ്ഥാനത്തിലാണ് പൊലിസ് കേസെടുത്തത്.
അതേസമയം കാറിന്റെ അതിസുരക്ഷാ നമ്പര് പ്ലേറ്റ് അഴിച്ചുമാറ്റി ഫാന്സി നമ്പര് പ്ലേറ്റ് പിടിപ്പിച്ചതിനു നടന് ജോജു ജോര്ജിനെതിരെ മോട്ടര് വാഹന വകുപ്പ് കേസെടുത്തു. പിഴയടച്ചു അതിസുരക്ഷാ നമ്പര് പ്ലേറ്റ് പിടിപ്പിച്ചു വാഹനം ഹാജരാക്കാനാണ് എറണാകുളം ആര്ടിഒ പി.എം.ഷെബീറിന്റെ ഉത്തരവ്.
കോണ്ഗ്രസ് പ്രവര്ത്തകനായ കളമശേരി സ്വദേശി മനാഫ് പുതുവായില് നല്കിയ പരാതിയിലാണു നടപടി. കോണ്ഗ്രസ് സമരത്തിനിടെ ഈ കാറിലാണു ജോജു വൈറ്റിലയിലെത്തിയത്. കേടു സംഭവിച്ച വാഹനം കുണ്ടന്നൂരിലെ ഷോറൂമില് അറ്റകുറ്റപ്പണിക്കു നല്കിയിരിക്കുകയാണ്.
അസി.മോട്ടര് വെഹിക്കിള് ഇന്സ്പെക്ടര് എ.ചന്തുവിന്റെ നേതൃത്വത്തില് അവിടെയെത്തി കാര് പരിശോധിച്ച് ആര്ടിഒക്ക് റിപ്പോര്ട്ട് നല്കുകയായിരുന്നു. ജോജുവിന്റെ മറ്റൊരു കാര് ഹരിയാന റജിസ്ട്രേഷനുള്ളതാണെന്നും ഇവിടെ അനധികൃതമായി ഉപയോഗിക്കുന്നുവെന്ന പരാതി എറണാകുളം ആര്ടിഒക്കു ലഭിച്ചതു ചാലക്കുടി ആര്ടിഒക്കു കൈമാറിയിട്ടുണ്ട്.
https://www.facebook.com/Malayalivartha
