പഠനകാലത്തെ പ്രണയത്തിനൊടുവില്‍ മൂന്നു മാസം മുമ്പ് വിവാഹം നിശ്ചയം കഴിഞ്ഞു.... ഗള്‍ഫിലായിരുന്ന പ്രതിശ്രുത വരനുമായി സംസാരത്തിനിടെ പിണങ്ങി കഴുത്തില്‍ കുരുക്കിടുന്ന ചിത്രങ്ങള്‍ വാട്‌സാപ്പില്‍ അയച്ചു കൊടുത്തു, ഞെട്ടലോടെ യുവാവ് വീട്ടുകാരെ വിളിച്ചറിയിച്ചതിനെ തുടര്‍ന്ന് അവര്‍ ഓടിയെത്തുമ്പോഴേക്കും ജനല്‍ കമ്പിയില്‍ യുവതി തൂങ്ങിയ നിലയില്‍... ആ കാഴ്ച കണ്ണീര്‍ക്കാഴ്ചയായി.

പായിക്കുഴി കന്നേലിത്തറയില്‍ സലിം സബീന ദമ്പതികളുടെ മകള്‍ സുമയ്യ (18)യാണു ഈ കടുംകൈ ചെയ്തത്. പെണ്‍കുട്ടി തൂങ്ങി മരിക്കാന്‍ ശ്രമിക്കുന്ന വിവരം വിദേശത്തുനിന്നു മേമന സ്വദേശിയായ യുവാവ് ബന്ധുക്കളെയും പൊലീസിനെയും അറിയിക്കുകയായിരുന്നു. വിവരമറിഞ്ഞ ബന്ധുക്കള്‍ പെട്ടെന്ന് വീട്ടിലെത്തിയപ്പോഴേക്കും സുമയ്യ മരിച്ചിരുന്നു. ഇന്നലെ 4.15ന് ആയിരുന്നു സംഭവം നടന്നത്.

പെണ്‍കുട്ടിയുടെ അച്ഛന്റെ സഹോദരന്‍ റഹിം മുന്നു ദിവസം മുന്‍പാണു മരിച്ചത്. മരണാനന്തര ചടങ്ങുകള്‍ നടക്കവേ വിദേശത്തു നിന്നു യുവാവ് പെണ്‍കുട്ടിയെ ഫോണില്‍ വിളിക്കുകയും പെണ്‍കുട്ടി ഫോണില്‍ സംസാരിച്ചു കൊണ്ടു അടുത്തുള്ള സ്വന്തം വീട്ടിലെ മുറിയിലേക്ക് പോയി. വീട്ടില്‍ അപ്പോള്‍ ആരും ഉണ്ടായിരുന്നില്ല.

പ്ലസ്ടു കഴിഞ്ഞ വര്‍ഷം പാസായ സുമയ്യയും മേമന സ്വദേശിയായ യുവാവും പഠിച്ചു കൊണ്ടിരുന്നകാലത്തെ പ്രണയമായിരുന്നു. വിവാഹ നിശ്ചയം മുന്നു മാസം മുന്‍പു നടത്തിയിരുന്നു.

പെണ്‍കുട്ടിയുടെ മൊബൈല്‍ ഫോണ്‍ പൊലീസ് കണ്ടെടുത്തു. സൈബര്‍ സെല്ലിന്റെ സഹായത്തോടെ ഫോണിലെ വിവരങ്ങള്‍ പൊലീസ് ശേഖരിക്കുന്നുണ്ട്. മൃതദേഹം കരുനാഗപ്പള്ളി താലൂക്ക് ആശുപത്രി മോര്‍ച്ചറിയില്‍. ഇന്ന് പാരിപ്പള്ളി മെഡിക്കല്‍ കോളജ് ആശുപത്രിയില്‍ പോസ്റ്റ്‌മോര്‍ട്ടം നടത്തും. ഓച്ചിറ പൊലീസ് കേസെടുത്തു.