സംസ്ഥാനത്ത് ലോഡ്‌ഷെഡ്ഡിംഗ് തുടരുമെന്ന് തുടരുമെന്ന് സൂചിപ്പിച്ചു വൈദ്യുതി മന്ത്രി സണ്ണി ജോസഫ്. സംസ്ഥാനത്ത് ലോഡ് ഷെഡിങ് വ്യാപകമല്ലെങ്കിലും ചെറിയ തോതിലെങ്കിലും ഉണ്ടാകുന്നത് വിഷമകരമാണെന്ന് വൈദ്യുതി മന്ത്രി പറഞ്ഞു. സംസ്ഥാനത്ത് വൈദ്യുതി ലഭ്യത കുറവുണ്ട്. ഫുട്ബാള്‍ ആരാധകരുടെ പ്രയാസം മനസ്സിലാക്കുന്നു. എല്‍ നിനോ പ്രതിഭാസത്തിന്റെ ഭാഗമായി രാജ്യത്തൊട്ടാതെ ഉഷ്ണതരംഗം വര്‍ധിച്ചു. രാജ്യത്താകെ വൈദ്യുതി ഉപഭോഗം കൂടി. മാര്‍ച്ച്, ഏപ്രില്‍ മാസങ്ങളില്‍ മറ്റ് സംസ്ഥാനങ്ങളില്‍ നിന്ന് കേരളം വൈദ്യുതി കടം വാങ്ങിയിരുന്നു.

ഇത് ജൂണ്‍ 15ഓടെയാണ് തിരിച്ചുനല്‍കേണ്ടിയിരുന്നത്. അത് തിരിച്ചുനല്‍കാതിരിക്കാന്‍ നിര്‍വാഹമില്ല. ഇതും പ്രതിസന്ധിയായി. മഴ കുറഞ്ഞത് കൊണ്ട് ജലംസംഭരണികളില്‍ വെള്ളം കുറവായതും പ്രതിസന്ധിയാണ്. പ്രതിസന്ധി ഇത്രയും പ്രതീക്ഷിച്ചിരുന്നില്ലെന്നും മന്ത്രി പറഞ്ഞു. ഇതില്‍ സര്‍ക്കാരിന്റെ വീഴ്ചയില്ല. കടം വാങ്ങിയ വൈദ്യുതി മടക്കിക്കൊടുക്കേണ്ടത് സര്‍ക്കാരിന്റെ വീഴ്ചയായി പറയാനാകില്ല. നല്ല മഴ കിട്ടേണ്ട സീസണില്‍ കേരളത്തില്‍ മഴ കുറഞ്ഞതാണ് പ്രധാനപ്പെട്ട കാരണം -മന്ത്രി പറഞ്ഞു.

സംസ്ഥാനത്ത് ഡിസംബര്‍ വരെ, രാത്രിയിലെ കടുത്ത വൈദ്യുതി പ്രതിസന്ധി തുടരുമെന്ന് കെഎസ്ഇബി സൂചിപ്പിച്ചിരുന്നു. നിലവില്‍ വൈദ്യുതി വാങ്ങാന്‍ യൂണിറ്റിന് 10 രൂപയെന്ന ഉയര്‍ന്ന പരിധി നിയന്ത്രണമുണ്ടെങ്കിലും വേണ്ടിവന്നാല്‍ അതു മറികടന്നും വാങ്ങേണ്ടി വരുമെന്ന് കെഎസ്ഇബി വൈദ്യുതി റഗുലേറ്ററി കമ്മിഷനെ അറിയിച്ചു. ഇല്ലെങ്കില്‍ ഈമാസം 30 വരെ ഏര്‍പ്പെടുത്തിയിരിക്കുന്ന വൈദ്യുതി നിയന്ത്രണമെന്ന പേരിലുള്ള ലോഡ് ഷെഡിങ് കൂടുതല്‍ സമയം തുടരേണ്ടിവരും.

ഈമാസം 15 മുതല്‍ 30 വരെയും അടുത്ത ഓരോ മാസവും ആവശ്യമായ വൈദ്യുതിക്കായി ഡീപ് പോര്‍ട്ടലില്‍ കെഎസ്ഇബി ടെന്‍ഡര്‍ ക്ഷണിച്ചെങ്കിലും ഈ മാസത്തേക്ക് ആരും ബിഡ് നല്‍കിയില്ല. ഇ ലേലത്തില്‍ ജൂലൈയിലേക്ക് യൂണിറ്റിന് 10.99 രൂപവരെ നിരക്ക് കമ്പനികള്‍ രേഖപ്പെടുത്തിയെങ്കിലും ചര്‍ച്ചയിലൂടെ ഇത് 9.99 രൂപയായി കുറച്ചു. ഒക്ടോബര്‍ മുതല്‍ ഡിസംബര്‍ വരെയുള്ള നിരക്ക് കമ്പനികള്‍ 9.07 രൂപയും 9.02 രൂപയുമാക്കിയിരുന്നത് 8.89 രൂപയായി കുറച്ചു. സെപ്റ്റംബറില്‍ യൂണിറ്റിന് 12.98 രൂപ എന്ന ഉയര്‍ന്ന നിരക്ക് വന്നതിനാല്‍ വീണ്ടും ടെന്‍ഡര്‍ ചെയ്യാന്‍ ബോര്‍ഡ് തീരുമാനിച്ചു.

വേനല്‍ക്കാലത്ത് വൈദ്യുതി പ്രതിസന്ധി മറികടക്കാന്‍ മറ്റു സംസ്ഥാനങ്ങളില്‍നിന്നു ബാങ്കിങ് കരാറിലൂടെ വായ്പയായി വാങ്ങിയ വൈദ്യുതി ഈ മാസം 15 മുതല്‍ സെപ്റ്റംബര്‍ 30 വരെയുള്ള കാലയളവിലാണ് കൊടുത്തു തീര്‍ക്കേണ്ടത്. റിസര്‍വോയറുകളില്‍ വെള്ളം തീരെ കുറഞ്ഞതിനൊപ്പം കൊടുത്തുതീര്‍ക്കേണ്ട ഈ കടം കൂടിയായതോടെയാണ് സംസ്ഥാനം രൂക്ഷമായ പ്രതിസന്ധിയിലായത്.

പകല്‍ സമയത്ത് സോളര്‍ വൈദ്യുതി ഉല്‍പാദിപ്പിക്കുന്നുണ്ട്. പക്ഷേ, രാത്രികാലത്തെ ഉപയോഗത്തിന് ആവശ്യമായ ബാറ്ററി സ്റ്റോറേജ് സംവിധാനം സംസ്ഥാനത്തില്ല. എന്താണെന്നറിയില്ല താന്‍ മന്ത്രിയായ ശേഷം മഴയില്ല എന്ന പ്രശ്‌നവും ഉണ്ടെന്നും മന്ത്രി സണ്ണി ജോസഫ് സ്വയം ട്രോളുകയും ചെയ്തു.