കുമരകത്ത് വീടിനുള്ളിൽ യുവാവിനെ മരിച്ച നിലയിൽ കണ്ടെത്തി. വാർഡ് 12 ൽ ദീപ കോട്ടേജിൽ പരേതനായ ശശിധരൻ്റെയും തങ്കച്ചിയുടെയും മൂത്ത മകനും കുമരകം മാർക്കറ്റിനു സമീപം നിവേദ്യ മൊബൈൽ സ്ഥാപനത്തിൻ്റെ ഉടമയുമായ റ്റിബിനെ ( 39) ആണ് മരിച്ച നിലയിൽ കണ്ടെത്തിയത്.

കുമരകം ഗവൺമെൻ്റ് ആശുപത്രിയിലെ ജീവനക്കാരിയായ ഭാര്യ ജോലിക്ക് പോകും വഴി ആശുപത്രിക്ക് സമീപത്തെ ഭർതൃവീട്ടിൽ കയറിയപ്പോഴാണ് മരിച്ച നിലയിൽ കണ്ടത്. രാവിലെ 8 മണിയോടെയാണ് മൃതദേഹം കണ്ടെത്തിയത്. കിടപ്പുമുറിയിൽ കട്ടിലിനു സമീപം കമഴ്ന്നു കിടന്ന നിലയിലാണ് മൃതദേഹം കിടന്നത്. കാലിന് പിൻവശത്ത് കണങ്കാലിന് സമീപത്ത് മുറിവോടു കൂടിയ ചോരപ്പാടുകളോടെയാണ് മൃതദേഹം കിടന്നിരുന്നത്.

സംഭവമറിഞ്ഞ് കോട്ടയം ഡി.വൈ.എസ്.പി ജെ.സന്തോഷ് കുമാറിൻ്റെ നേതൃത്വത്തിൽ പൊലീസ് സംഘം സ്ഥലത്ത് എത്തി പ്രാഥമിക അന്വേഷണം ആരംഭിച്ചു. ഇൻക്വസ്റ്റ് അടക്കമുള്ള നടപടികൾ പൂർത്തിയാക്കി മൃതദേഹം മെഡിക്കൽ കോളജ് ആശുപത്രി മോർച്ചറിയിലേയ്ക്ക് മാറ്റി. ഭാര്യ ദീപ, മകൾ നിവേദ്യ സഹോദരങ്ങൾ വിഷ്ണു (കാനഡ), അർജ്ജുൻ (ദീപ മൊബൈൽ സ്ഥാപന ഉടമ ) .