സഞ്ജു സാംസണ് കുറച്ചു കൂടി മെച്ചപ്പെട്ട പരിഗണന ഇന്ത്യൻ സെലക്ടർമാർ നൽകണമെന്ന് സയ്യിദ് മുഷ്താഖ് അലി ട്വന്റി20 ടൂർണമെന്റ് ചൂണ്ടിക്കാട്ടുന്നുവെന്ന് മന്ത്രി വി ശിവൻകുട്ടി.മന്ത്രി ഫേസ്ബുക്കിൽ പങ്കു വച്ച കുറിപ്പ് ഇങ്ങനെ; സഞ്ജു സാംസണ് കുറച്ചു കൂടി മെച്ചപ്പെട്ട പരിഗണന ഇന്ത്യൻ സെലക്ടർമാർ നൽകണമെന്ന് സയ്യിദ് മുഷ്താഖ് അലി ട്വന്റി20 ടൂർണമെന്റ് ചൂണ്ടിക്കാട്ടുന്നു.

സഞ്ജു തകർത്തടിച്ചപ്പോൾ ( 39 പന്തിൽ പുറത്താകാതെ 52 റൺസ് ) ഹിമാചൽ പ്രദേശിനെ 8 വിക്കറ്റിന് തോൽപ്പിച്ച് കേരളം ക്വാർട്ടറിൽ എത്തി. ടൂർണമെന്റിൽ ഉടനീളം സ്ഥിരതയാർന്ന പ്രകടനമാണ് കേരള ക്യാപ്റ്റൻ കൂടിയായ സഞ്ജു സാംസൺ നടത്തിയത്.ഐപിഎൽ - 14 ൽ സ്ഥിരതയാർന്ന പ്രകടനം നടത്തിയ വിക്കറ്റ് കീപ്പർ - ബാറ്ററും സഞ്ജുവായിരുന്നു.

എന്തിന് സഞ്ജുവിനെ ഇന്ത്യൻ ടീമിൽ നിന്ന് മാറ്റി നിർത്തണമെന്ന് ചോദിച്ചാണ് അദ്ദേഹം കുറിപ്പ് അവസാനിപ്പിക്കുന്നത് . നിരവധി അഭിപ്രായങ്ങൾ ഈ പോസ്റ്റിന് കീഴെ വരുന്നുണ്ട് . ടീം തലപ്പത്ത് അഴിച്ചുപണികൾ നടന്ന സ്ഥിതിക്ക് വരും സീരീസുകളിൽ അവസരങ്ങൾ ഉണ്ടാകും എന്ന് തന്നെ വിശ്വസിക്കാം.

അതിനോടൊപ്പം, തന്റെ ശൈലി മാറ്റില്ലെന്ന പിടിവാശി സഞ്ജുവും മാറ്റണം. സാഹചര്യങ്ങൾക്കൊപ്പം സ്വയം മാറാനുള്ള കഴിവും ഒരു ക്രിക്കറ്റർക്ക് അത്യാവശ്യമാണ്.അത് മാറ്റാൻ സാധിച്ചില്ലെങ്കിൽ അത് കഴിവുകേടായി മാത്രമേ കാണാൻ സാധിക്കുവെന്നാണ് ആൾക്കാരുടെ വിലയിരുത്തൽ. മറ്റൊരാളുടെ കമന്റ് ഇങ്ങനെ; പരിഗണന കിട്ടിയപ്പോൾ കുറച്ചു കൂടി ഉത്തരവാദിത്വം കാട്ടിയിരുന്നങ്കിൽ ഇതു പറയണ്ടി വരില്ലായിരുന്നു.

ഈ ടൂർണമെൻറിലെ പ്രകടനങ്ങളുടെ വെളിച്ചത്തിൽ ഇനി ടീമിൽ ഇടം ലഭിക്കുമ്പോൾ അത് മികച്ച നിലയിൽ മുതലാക്കാൻ കഴിയട്ടെ എന്ന് ആശംസിക്കുന്നു ടോപ്പ് ഓർഡറിൽ ഇറക്കാൻ ദ്രാവിഡ് തയ്യാറാകും എന്നും പ്രതീക്ഷിക്കുന്നു , കാരണം കിട്ടിയ അവസങ്ങളിൽ കൂടുതലും അവസാനഓവറുകളിൽ വലിച്ചിടക്കണ്ട നേരത്താണ് ഇറങ്ങണ്ടി വന്നിട്ടുള്ളത്.