നിയമ വിദ്യാര്ത്ഥിനിയായിരുന്ന മോഫിയയുടെ ആത്മഹത്യ... അന്വേഷണം എറണാകുളം ജില്ലാ ക്രൈംബ്രാഞ്ചിന് അന്വേഷിക്കും
നിയമ വിദ്യാര്ത്ഥിനിയായിരുന്ന മോഫിയാ പര്വീണ് ആത്മഹത്യ ചെയ്തതുമായി ബന്ധപ്പെട്ട കേസ് എറണാകുളം റൂറല് ജില്ലാ ക്രൈംബ്രാഞ്ച് അന്വേഷിക്കും.ഡി.വൈ.എസ്.പി വി.രാജീവിനാണ് അന്വേഷണ ചുമതല. ഇതുമായി ബന്ധപ്പെട്ട് പ്രത്യേക അന്വേഷണസംഘം രൂപീകരിച്ചിട്ടുണ്ട്. ആലുവ സി.ഐക്കെതിരെയും ഭര്ത്തൃവീട്ടുകാര്ക്കെതിരെയും ഗുരുതരമായ ആരോപണമുന്നയിച്ച് കുറിപ്പ് എഴുതി വച്ചാണ് മോഫിയ ആത്മഹത്യ ചെയ്തത്. ഇതിനെത്തുടര്ന്ന് ഭര്ത്താവ് സുഹൈല്, ഭര്ത്താവിന്റെ മാതാപിതാക്കള് എന്നിവരെ കഴിഞ്ഞദിവസം പൊലീസ് അറസ്റ്റുചെയ്തിരുന്നു. ഇവര് റിമാന്ഡിലാണ്.
അതേസമയം, കേസില് ആരോപണവിധേയനായ ആലുവ സി.ഐ സുധീറിനെതിരെ കടുത്ത നടപടി എടുക്കാത്തതില് പ്രതിഷേധം ശക്തമാണ്. സുധീറിനെതിരെ കൂടുതല് നടപടി വേണമെന്ന് വനിതാ കമ്മിഷന് അദ്ധ്യക്ഷ പി.സതീദേവിയും ആവശ്യപ്പെട്ടു. സംഭവത്തില് ആലുവ ഡിവൈഎസ്പിയോട് റിപ്പോര്ട്ട് ആവശ്യപ്പെട്ടതായി പി.സതീദേവി പറഞ്ഞു.
ആലുവ ഡിവൈഎസ്പി ആദ്യം തയ്യാറാക്കിയ റിപ്പോര്ട്ട് സി.ഐ കുറ്റക്കാരനല്ല എന്ന രീതിയിലായിരുന്നു തുടര്ന്ന് എസ്.പി നല്കിയ നിര്ദ്ദേശത്തെ തുടര്ന്ന് വിശദമായ റിപ്പോര്ട്ട് നല്കി. ഇതില് മോഫിയ പര്വീണ് നല്കിയ ഗാര്ഹിക പീഡന പരാതിയില് നടപടി സ്വീകരിച്ചതില് സി.ഐയ്ക്ക് ഗുരുതര വീഴ്ചപറ്റിയെന്ന് രേഖപ്പെടുത്തിയിട്ടുണ്ട്. ഒക്ടോബര് 29ന് മോഫിയയില് നിന്ന് ലഭിച്ച പരാതി ഡിവൈഎസ്പി സി.ഐയ്ക്ക് കൈമാറി 25 ദിവസത്തിന് ശേഷമാണ് എന്തെങ്കിലും നടപടിയെടുത്തത്. മോഫിയ ആത്മഹത്യ ചെയ്ത ദിവസമാണ് കേസെടുത്തത്.
https://www.facebook.com/Malayalivartha
