സിപിഎമ്മും കെപിസിസി പ്രസിഡന്റ് കെ.സുധാകരനും തമ്മിലുള്ള പോര്‍വിളി തുടരുകയാണ്. അല്‍പം പോലും പുറകോട്ട് പോകാതെ സെമി കേഡറില്‍ തന്നെ നില്‍ക്കുകയാണ് സുധാകരന്‍. ഇടുക്കിയില്‍ എസ്എഫ്‌ഐ പ്രവര്‍ത്തകന്‍ ധീരജിനെ കുത്തിക്കൊലപ്പെടുത്തിയത് അറസ്റ്റിലായ യൂത്ത് കോണ്‍ഗ്രസ് പ്രവര്‍ത്തകന്‍ നിഖില്‍ പൈലിയാണെന്ന് ഇപ്പോഴും ബോധ്യം വന്നിട്ടില്ലെന്നു കെ.സുധാകരന്‍ പറഞ്ഞു.

കെഎസ്‌യുവിനും യൂത്ത് കോണ്‍ഗ്രസിനും വേണ്ടി ജീവിതം ഉഴിഞ്ഞുവച്ച പ്രവര്‍ത്തകനെ കെപിസിസി പ്രസിഡന്റിന്റെ കസേരയിലിരുന്നു തള്ളിപ്പറയില്ല. കൊല്ലാനല്ല, ജീവന്‍ രക്ഷിക്കാന്‍ മുന്നൂറു മീറ്ററിലേറെ ഓടിയവനാണു നിഖില്‍. ഇനി ആത്മരക്ഷാര്‍ഥം കുത്തിയെന്നാണെങ്കില്‍, അതു കണ്ട ഒരാളെങ്കിലും വേണ്ടേ? പരുക്കേറ്റ എസ്എഫ്‌ഐക്കാര്‍ പറഞ്ഞത് നിഖില്‍ കുത്തുന്നതു കണ്ടില്ലെന്നാണ്. നിരപരാധിയെങ്കില്‍ നിഖിലിനെ പാര്‍ട്ടി പൂര്‍ണമായി സംരക്ഷിക്കും. കുറ്റവാളിയെന്നു കണ്ടെത്തിയാല്‍ സംരക്ഷിക്കില്ലെന്നും സുധാകരന്‍ പറഞ്ഞു.

ധീരജിന്റെ മരണത്തില്‍ ദുഃഖമുണ്ട്. ധീരജിന്റേതു കോണ്‍ഗ്രസ് കുടുംബമാണ്. വീട്ടില്‍ പോകണമെന്ന് ആഗ്രഹമുണ്ടെങ്കിലും അതിന്റെ ഭവിഷ്യത്ത് അനുഭവിക്കേണ്ടിവരിക ആ കുടുംബമാവും. വീട്ടുവളപ്പില്‍ മകനെ സംസ്‌കരിക്കണമെന്ന മാതാപിതാക്കളുടെ ആഗ്രഹത്തിനു വിരുദ്ധമായാണ് ശവകുടീരം കെട്ടിപ്പൊക്കി സിപിഎം ആഘോഷിച്ചത്. പാര്‍ട്ടി സംഘടിപ്പിച്ച തിരുവാതിരക്കളി അതിന്റെ തെളിവാണ്. ദേശീയ നേതാവാണ് കൈ തട്ടി ആസ്വദിച്ചത്. ഒരു ചെറുപ്പക്കാരന്റെ നിശ്ചലമായ ശരീരം മോര്‍ച്ചറിയില്‍ കിടക്കുമ്പോള്‍ പുറത്തുനിന്നു പൊട്ടിച്ചിരിച്ച ദയാലുവായ മഹാനുഭാവനാണ് എം.എം.മണി.

തന്നെ പ്രതിക്കൂട്ടില്‍ കയറ്റാനുളള ഗൂഢാലോചന എന്ത് ഉദ്ദേശിച്ചാണെന്ന് അറിയില്ല. താനിതൊക്കെ ഒരുപാടു കണ്ടു തഴമ്പിച്ചുവന്ന രാഷ്ട്രീയ പ്രവര്‍ത്തകനാണ്. ധീരജ് കൊല്ലപ്പെട്ട രാഷ്ട്രീയ സാഹചര്യം ഉപയോഗപ്പെടുത്തി സില്‍വര്‍ ലൈന്‍ സമരത്തില്‍നിന്നു കോണ്‍ഗ്രസിനെ പിന്തിരിപ്പിക്കാമോ എന്നാണു സിപിഎം നോക്കുന്നത്. അത്തരം ഉമ്മാക്കി കണ്ടാലൊന്നും പേടിക്കില്ല.

ലോകമാകെ 10 കോടി ആളുകളെ കമ്യൂണിസ്റ്റ് പ്രസ്ഥാനങ്ങളോ ഭരണകൂടങ്ങളോ കൊലപ്പെടുത്തിയെന്നാണു കണക്ക്. ബംഗാളില്‍ മാത്രം 55,000 രാഷ്ട്രീയ എതിരാളികളെ കൊന്നു. ബുദ്ധദേവ് ഭട്ടാചാര്യ ഇതു നിയമസഭയില്‍ സമ്മതിച്ചിട്ടുണ്ട്.

കമ്യൂണിസ്റ്റ് പ്രസ്ഥാനത്തിനു കൊലപാതകം ഹരമാണ്. 6 വര്‍ഷത്തിനിടെ കേരളത്തില്‍ 54 രാഷ്ട്രീയ കൊലപാതകം നടന്നു. 28 കേസിലും സിപിഎം ആണു പ്രതികള്‍. ബിജെപി 12 കേസിലും എസ്ഡിപിഐ 9 കേസിലും സിപിഐയും ലീഗും ഓരോ കേസിലും വീതം പ്രതിസ്ഥാനത്തു വന്നു. ഇടുക്കിയിലെ ഈ ഒരു കേസാണ് കോണ്‍ഗ്രസിന്റെ പേരില്‍ കെട്ടിവയ്ക്കാന്‍ ശ്രമിക്കുന്നത്. ഒരുപാടു കോണ്‍ഗ്രസുകാര്‍ കൊല്ലപ്പെട്ടിട്ടും എവിടെയും തിരിച്ചടിച്ചിട്ടില്ല. ചെറുത്തുനിന്നിട്ടുണ്ട്. ആ ചെറുത്തുനില്‍പ് തുടരും.

വ്യക്തിപൂജയുടെ പേരില്‍ പി.ജയരാജനെതിരെ നടപടിയെടുത്ത പാര്‍ട്ടി എന്തുകൊണ്ടു തിരുവാതിരപ്പാട്ടിലെ വ്യക്തിപൂജയുടെ പേരില്‍ പിണറായി വിജയനെ വിമര്‍ശിക്കുന്നില്ല. ഇക്കാര്യത്തില്‍ പിണറായിയെ വിമര്‍ശിക്കാന്‍ കോടിയേരിക്കു നട്ടെല്ലുണ്ടോയെന്നും സുധാകരന്‍ ചോദിച്ചു.

നിരപരാധികളെ പ്രതിയാക്കിയാല്‍ വലിയ വിലകൊടുക്കേണ്ടിവരും. സുധാകരനിസം കണ്‍സ്ട്രക്റ്റീവും പോസിറ്റീവുമാണ്. പിണറായിസം പോലെ നെഗറ്റീവല്ലെന്നും കെ.സുധാകരന്‍ പറഞ്ഞു.