കേരളത്തില്‍ രണ്ടാമൂഴം ലഭിച്ച പിണറായി വിജയന് ഇനി ഒരാഗ്രഹം കൂടിയുണ്ട്. ഇന്ത്യന്‍ പ്രധാനമന്ത്രിയാവണം. തള്ളാണെന്നും ഭോഷ്‌കാണെന്നും കരുതരുത്.

കഴിഞ്ഞ കുറെ നാളുകളായി അദ്ദേഹത്തിന്റെ മനസിലുള്ള ആഗ്രഹമാണിത്. ഇപ്പോള്‍ ഇക്കാര്യം പിണറായി കാബിനറ്റിലെ വിശ്വസ്തതനായ മന്ത്രി അബ്ദുറഹ്മാന്‍ തുറന്നു പറഞ്ഞു. രാജ്യത്ത് മൂന്നാം മുന്നണിക്ക് നേതൃത്വം നല്‍കാന്‍ കെല്‍പ്പുള്ളയാളാണ് മുഖ്യമന്ത്രി പിണറായി വിജയനെന്ന് കായിക വകുപ്പ് മന്ത്രി വി അബ്ദുറഹ്മാന്‍ പറഞ്ഞു.

മലപ്പുറം ജില്ലയിലെ അരീക്കോട് മുണ്ടമ്പ്രയില്‍ സിപിഎം നിര്‍മിച്ച് നല്‍കുന്ന വീടിന് തറക്കല്ലിട്ട് സംസാരിക്കുകയായിരുന്നു മന്ത്രി.

'രാജ്യത്ത് മൂന്നാം മുന്നണിക്ക് നേതൃത്വം നല്‍കാന്‍ കെല്‍പ്പുള്ള നേതാവാണ് പിണറായി വിജയന്‍. പിണറായി വിജയന്‍ നയിക്കുന്ന മൂന്നാം മുന്നണി രാജ്യത്ത് ഒരുപാടു കാര്യങ്ങള്‍ മുന്നോട്ടു വെക്കും. വരാന്‍ പോകുന്ന സിപിഎം പാര്‍ട്ടി കോണ്‍ഗ്രസില്‍ ഇതുസംബസിച്ച രേഖകള്‍ അവതരിപ്പിക്കുമെന്ന് പിണറായി വിജയന്‍ തന്നെ പറഞ്ഞിട്ടുണ്ട്,' - എന്നും മന്ത്രി പറഞ്ഞു.

അതായത് കാര്യങ്ങള്‍ അത്ര നിസാരമല്ലെന്ന് ചുരുക്കം. വരുന്ന പാര്‍ട്ടി കോണ്‍ഗ്രസില്‍ ഇക്കാര്യം അവതരിപ്പിക്കുമെന്ന് പിണറായി തന്നെ പറഞ്ഞിട്ടുണ്ടെന്ന് മന്ത്രി പറയുമ്പോള്‍ അത് കാമ്പില്ലാത്ത വര്‍ത്തമാനമാണെന്ന് പറഞ്ഞ് തള്ളി കളയാന്‍ കഴിയില്ല.

സി പി എമ്മിന്റെ ദേശീയ നേതൃത്വത്തില്‍ സീതാറാം യച്ചൂരിയുടെ പിടിവിട്ടിട്ട് കുറെ നാളുകളായി. രാജ്യത്ത് സി പി എമ്മിന്റെ തേരോട്ടം നിലയ്ക്കുന്നതിന്റെ ശബ്ദം കേട്ടു തുടങ്ങിയതോടെയാണ് യച്ചൂരി നിസഹായനായത്. കേരളത്തില്‍ തുടര്‍ ഭരണം കിട്ടിയതിന്റെ ക്രെഡിറ്റല്‍ ഒരു ശതമാനം പോലും യച്ചൂരിക്ക് കിട്ടിയതുമില്ല. പിണറായിയുടെ നേട്ടമായാണ് ഇത് പരക്കെ വ്യാഖ്യാനിക്കപ്പെട്ടത്. അത് സത്യവുമാണ്.അച്ചുതാനന്ദനെ പോലുള്ള നേതാക്കള്‍ ചിത്രത്തില്‍ നിന്ന് അപ്രത്യക്ഷമായതോടെ പിണറായിയെ പ്രതിരോധിക്കാന്‍ ആളില്ലാതായി. അങ്ങനെ പിണറായി സി പി എമ്മിന്റെ സര്‍വ സൈന്യാധിപനായി.

യച്ചൂരിയുടെ എം.പി. സ്ഥാനം തെറിപ്പിച്ചത് പോലും ദേശീയ തലത്തില്‍ അദ്ദേഹത്തിന്റെ മാറ്റ് കുറയ്ക്കുന്നതിന് വേണ്ടിയാണ്. ഒരു പ്രാദേശിക നേതാവ് എന്നതില്‍ നിന്ന് തനിക്ക് സി പി എമ്മിന്റെ അഖിലേന്ത്യാ നേതാവകണമെങ്കില്‍ ഇതാണ് വഴിയെന്ന് പിണറായി മനസിലാക്കി.

മമതാ ബാനര്‍ജി കഴിഞ്ഞാല്‍ പറഞ്ഞാല്‍ പറഞ്ഞു പോലെ ചെയ്യുന്ന നേതാവാണ് പിണറായി വിജയന്‍. ഇത് രാജ്യം തന്നെ സമ്മതിച്ചിട്ടുള്ള കാര്യമാണ്. കെ റയില്‍ പദ്ധതി പ്രഖ്യാപിച്ചത് തന്നെ രാജ്യത്ത് തന്റെ യശസ് ഉയര്‍ത്തുന്നതിന് വേണ്ടിയാണ്. വന്‍കിട പദ്ധതികള്‍ നടപ്പിലാക്കുന്ന മുഖ്യമന്ത്രി എന്ന പേര് നേടുകയാണ് പിണറായിയുടെ ലക്ഷ്യം.

ബിജെപിയുടെ പിന്തുണയാണ് പിണറായിയുടെ മറ്റൊരു നേട്ടം. രാജ്യത്ത് കോണ്‍ഗ്രസിനെ ഇല്ലാതാക്കാന്‍ ശ്രമിക്കുന്ന ബിജെപി പിണറായി കോണ്‍ഗ്രസിന് ഒരു മറുപടിയാണെന്ന് കരുതുന്നു. നിശ്ചയ ദാര്‍ഢ്യത്തിന്റെ ഉദാഹരണമായി പിണറായിയെ അവര്‍ കരുതുന്നു.

ഏതായാലും വരും ദിവസങ്ങള്‍ പിണറായിയുടേതാണ്. പ്രധാനമന്ത്രിയെങ്കില്‍ പ്രധാനമന്ത്രി എന്ന മട്ടിലാണ് കാര്യങ്ങള്‍ നീങ്ങുന്നത്.