അയാളുടെ പൂച്ച ഇപ്പോഴും അവിടെ തന്നെയുണ്ട്- കഴിഞ്ഞ ഏതാനും ദിവസങ്ങളായി ട്വിറ്ററിലൂടെ പ്രചരിക്കുന്ന ഒരു ചിത്രത്തിന്റെ ക്യാപ്ഷനാണിത്. മഞ്ഞുമൂടിയൊരു ഖബര്‍സ്ഥാനില്‍ ഒരു ഖബറിനരികിലിരിക്കുന്ന പൂച്ചയുടെ ചിത്രവും ഇതില്‍ ഉണ്ടായിരുന്നു.

ആ പൂച്ചയുടെ യജമാനന്‍ മരിച്ചിട്ട് രണ്ട് മാസമായി. മഞ്ഞായാലും മഴയായാലും വെയിലായാലും അന്നു മുതല്‍ എല്ലാ ദിവസവും ആ പൂച്ച യജമാനന്റെ ഖബറിനരികില്‍ വന്നിരിക്കും. സെര്‍ബിയയില്‍ നിന്നാണ് മനുഷ്യനും മൃഗവും തമ്മിലുള്ള ഈ ഹൃദ്യമായ ബന്ധത്തിന്റെ കരളലിയിക്കുന്ന ദൃശ്യം പുറത്തുവന്നിരിക്കുന്നത്.

സെര്‍ബിയയിലെ പ്രമുഖ മതപണ്ഡിതനും ചീഫ് മുഫ്തിയുമായിരുന്ന ശൈഖ് മുആമര്‍ സുകൊര്‍ലിക്കിന്റെ ഖബറിനരികിലാണ് അദ്ദേഹത്തിന്റെ പൂച്ച നിത്യവും സന്ദര്‍ശനത്തിനെത്തുന്നത്. 2021 നവംബര്‍ ആറിനാണ് അദ്ദേഹം മരിച്ചത്.

ഖബറടക്കം നടന്നതു മുതല്‍ പൂച്ച ആ ഖബറിനരികില്‍ നിന്ന് മാറാതെ നില്‍ക്കുന്നുണ്ട്. നവംബര്‍ ഒമ്പതിന് ലാവേഡര്‍ എന്ന ട്വിറ്റര്‍ അക്കൗണ്ടില്‍ നിന്നാണ് ഈ അപൂര്‍വ ബന്ധത്തിന്റെ കഥ ലോകം അറിയുന്നത്.

മുആമര്‍ സുകൊര്‍ലിക്കിന്റെ ഖബറിനരികില്‍ നില്‍ക്കുന്ന പൂച്ചയുടെ ചിത്രമാണ് അന്ന് പങ്കുവെച്ചത്. ഇപ്പോള്‍ മഞ്ഞുവീഴ്ച ശക്തമായിട്ടും ഖബറിനരികില്‍ നിന്ന് മാറാതെ നില്‍ക്കുന്ന പൂച്ചയുടെ ചിത്രവും ലാവേഡര്‍ തന്നെയാണ് പുറത്തുവിട്ടത്. അചഞ്ചലമായ ഈ സ്‌നേഹത്തിന്റെ ചിത്രം ഏറെ ആവേശത്തോടെയാണ് സോഷ്യല്‍ മീഡിയ പങ്കുവെച്ചത്.

അവസാനശ്വാസം വരെ യജമാനന്റെ തിരിച്ചുവരവ് കാത്തുകിടന്ന ഹാച്ചികോ എന്ന നായയുടെ കഥ പറയുന്ന 'ഹാച്ചി: എ ഡോഗ്‌സ് ടെയ്ല്‍' എന്ന ജപ്പാന്‍ സിനിമയാണ് പലരും അനുസ്മരിച്ചത്. 'നല്ല മഞ്ഞുവീഴ്ചയാണ്. ആരെങ്കിലും ആ പൂച്ചയെ ദത്തെടുക്കൂ', 'ഇത് വളരെ ഹൃദയഭേദകമാണ്' തുടങ്ങി നിരവധി കമന്റുകളാണ് ചിത്രത്തിന് ലഭിച്ചിരിക്കുന്നത്.

സെര്‍ബിയയുടെ ചീഫ് മുഫ്തിയായിരുന്ന ശൈഖ് മുആമര്‍ സുകൊര്‍ലിക് ഹൃദയാഘാതത്തെ തുടര്‍ന്നാണ് മരിച്ചത്. സെര്‍ബിയയിലെ മുസ്‌ലിമുകള്‍ക്കിടയില്‍ വന്‍ സ്വാധീനമുണ്ടായിരുന്ന അദ്ദേഹം 2016 മുതല്‍ 2020 വരെ പാര്‍ലമെന്റ് അംഗമായിരുന്നു. 2020 ഒക്ടോബര്‍ മുതല്‍ മരണം വരെ നാഷണല്‍ അസംബ്ലി ഓഫ് സെര്‍ബിയയുടെ വൈസ് പ്രസിഡന്റായിരുന്നു അദ്ദേഹം.