ഭാര്യയ്‌ക്ക് വിഷം നൽകി ഭർത്താവ് ജീവനൊടുക്കിയ സംഭവത്തിൽ കൂടുതൽ വിവരങ്ങൾ പുറത്തുവരികയാണ്. ആലപ്പുഴ കൈനകരി തോട്ടുവത്തലയിൽ 79 വയസ്സുകാരനായ അപ്പച്ചന്റേയും 75 വയസ്സുകാരിയായ ലീലാമ്മയുടേയും മരണത്തിൽ കൂടുതൽ വ്യക്തത വന്നിരിക്കുകയാണ്. ഭാര്യ ലീലാമ്മയ്‌ക്ക് വിഷം നൽകിയ ശേഷം അപ്പച്ചൻ തൂങ്ങി മരിക്കുകയായിരുന്നു എന്നാണ് പോലീസിന്റെ നിഗമനം.

ഇവരുടെ വീട്ടിൽ നിന്നും ആത്മഹത്യ കുറിപ്പ് കണ്ടെത്തിയിട്ടുണ്ട്. വാർദ്ധക്യത്തിന്റെ ഒറ്റപ്പെടലാണ് ജീവനൊടുക്കാൻ കാരണമെന്നാണ് ആത്മഹത്യ കുറിപ്പിൽ പറയുന്നത്. ആറ് മക്കളുള്ള വൃദ്ധ ദമ്പതികൾ ഇവരുമായി അകന്നാണ് താമസിച്ചിരുന്നത്. രണ്ടു പേരും രോഗികളായിരുന്നു. ലീലാമ്മ കിടപ്പു രോഗിയായിരുന്നു.

കൂടാതെ സാമ്പത്തിക ബുദ്ധിമുട്ടും ഇവരെ അലട്ടിയിരുന്നതായി അയൽവാസികൾ പറഞ്ഞു.പള്ളിയിലേയ്‌ക്ക് പോകുകയായിരുന്ന അയൽവാസികളാണ് അപ്പച്ചനെ വീടിന്റെ മുന്നിലുള്ള മാവിൽ തൂങ്ങിമരിച്ച നിലയിൽ കണ്ടെത്തിയത്. തുടർന്ന് വീടുനുള്ളിൽ നോക്കിയപ്പോൾ ലീലാമ്മയും മരിച്ച് കിടക്കുന്നത് കണ്ടു എന്നാണ് പ്രദേശവാസികൾ പറയുന്നത്.