കെടി ജലീലിനെതിരെ നിയമനടപടിക്ക് ലോയേഴ്സ് കോണ്ഗ്രസ്; മുന് മന്ത്രി കെ.ടി ജലീലിന്റെ നടപടിക്കെതിരെ കോടതിലക്ഷ്യഹര്ജി
ലോകായുക്ത ജസ്റ്റിസ് സിറിയക് തോമസിനെ നിശിതമായി വിമര്ശിച്ച മുന് മന്ത്രി കെ.ടി ജലീലിന്റെ നടപടിക്കെതിരെ കോടതിലക്ഷ്യഹര്ജി. ലോകായുക്തയിലാണ് ലോയേഴ്സ് കോണ്ഗ്രസ് കോടതിയലക്ഷ്യ ഹര്ജി നല്കിയത്. ജലീലിനെതിരായി ഡിജിപിക്കും പരാതി നല്കിയിട്ടുണ്ട്. ലോയേഴ്സ് കോണ്ഗ്രസ് ഭാരവാഹി അഡ്വ. രാജീവ് ചാരാച്ചിറയാണ് ജലീലിനെതിരെ ലോകായുക്തയില് കോടതിയലക്ഷ്യ ഹര്ജി നല്കിയിരിക്കുന്നത്. ഹര്ജിക്കാരന് വേണ്ടി അഡ്വ. മൃദുല് ജോണ്, അഡ്വ. ദീപക് എന്നിവര് ഹാജരാകും.
ജലീലിന്റെത് മനഃപൂര്വം ലോകായുക്തയെ ഇകഴ്ത്തുന്ന തരത്തിലുള്ള പോസ്റ്റുകളാണെന്ന് ഹര്ജിയില് ചൂണ്ടികാണിച്ചിട്ടുണ്ട്. ജലീല് ഉന്നയിക്കുന്ന ആരോപണങ്ങള്ക്ക് നിയമപരമായി തെളിവില്ലെന്നും അതിനാല് കോടതിയലക്ഷ്യം ചുമത്തണമെന്നുമാണ് ഹര്ജിയില് അഡ്വ. രാജീവ് ചാരാച്ചിറ ആവശ്യപ്പെടുന്നത്.
ജലീലിനെതിരെ ഡിജിപിക്ക് പുറമെ കാസര്കോട് ജില്ലാ പൊലീസ് മേധാവിക്കും പരാതി നല്കിയിട്ടുണ്ട്. തക്ക പ്രതിഫലം കിട്ടിയാല് ആര്ക്കെതിരെ എന്ത് കടുംകൈയും ചെയ്യുന്നയാളാണ് ജസ്റ്റിസെന്നും പിണറായി വിജയനെ പിന്നില്നിന്ന് കുത്താന് യുഡിഎഫ് കണ്ടെത്തിയ കത്തിയാണ് ലോകായുക്തയെന്നുമായിരുന്നു ജലീലിന്റെ ആരോപണം.
സഹോദര ഭാര്യയായ ഡോ.ജാന്സി ജെയിംസിനെ എംജി സര്വകലാശാല വിസിയാക്കാന് സിറിയക്ക് ജോസഫ് യുഡിഎഫ് നേതാവിനെ രക്ഷപ്പെടാന് അനുവദിച്ചെന്നും പോസ്റ്റില് ജലീല് ആരോപിച്ചു. 2005ല് കുഞ്ഞാലിക്കുട്ടി ഉള്പ്പെട്ട ഐസ്ക്രീം പാര്ലര് കേസിന്റെ വിധിപകര്പ്പ് പങ്കുവച്ചായിരുന്നു ജലീലിന്റെ ആരോപണം. കുഞ്ഞാലിക്കുട്ടിക്ക് അനുകൂലമായി വിധിവന്ന ബെഞ്ചില് ജസ്റ്റിസ് സിറിയക് ജോസഫും അംഗമായിരുന്നു.
2013ല് ദേശീയ മനുഷ്യാവകാശ കമ്മീഷണ അംഗമായി സിറിയക് ജോസഫിനെ നിയമിച്ചതിനെതിരെ ലോക്സഭാ പ്രതിപക്ഷ നേതാവ് സുഷമാ സ്വരാജും രാജ്യസഭയിലെ പ്രതിപക്ഷ നേതാവ് അരുണ് ജെയ്റ്റ്ലിയും വിയോജനകുറിപ്പെഴുതിയതിന്റെ പരിഭാഷയും ജലീല് പങ്കുവച്ചു. ഒന്നാം പിണറായി സര്ക്കാരിന്റെ കാലത്ത് ജലീലിനെതിരായി വിധി പറഞ്ഞത് ജസ്റ്റിസ് സിറിയക് ജോസഫായിരുന്നു. സര്ക്കാര് നിലവില് ലോകായുക്ത ഭേദഗതി കൊണ്ടുവരുന്നതിനെതിരെ പ്രതിപക്ഷ പ്രതിഷേധം കനക്കുമ്ബോഴാണ് ലോകായുക്തയ്ക്കെതിരെ ജലീല് ആരോപണമുന്നയിച്ചത്.
https://www.facebook.com/Malayalivartha
