എസ്എസ്എല്‍സി പരീക്ഷ ഡ്യൂട്ടിയെടുക്കുന്ന സ്‌കൂളില്‍ തന്നെ അധ്യാപകര്‍ക്ക് എട്ട്, ഒമ്പത് ക്ലാസുകളിലെ വാര്‍ഷിക പരീക്ഷ ഡ്യൂട്ടിക്ക് ക്രമീകരണമൊരുക്കാന്‍ ഉത്തരവ്. ഒരേദിവസം എസ്എസ്എല്‍സി പരീക്ഷയും വാര്‍ഷിക പരീക്ഷയും നടക്കുന്നത് അധ്യാപകര്‍ക്ക് ദുരിതമാകുമെന്ന് കണ്ടാണ് പൊതുവിദ്യാഭ്യാസ ഡയറക്ടറുടെ നിര്‍ദേശം.

എസ്എസ്എല്‍സി പരീക്ഷ മാര്‍ച്ച് 31ന് രാവിലെ 9.45 മുതല്‍ 11.30 വരെ നടക്കുന്നുണ്ട്. ഇതേ ദിവസം ഒമ്പതാം ക്ലാസിനും എട്ടാം ക്ലാസിനും ഉച്ചക്കുശേഷം ഒന്നര മുതല്‍ വാര്‍ഷിക പരീക്ഷയും നിശ്ചയിച്ചിട്ടുണ്ട്. രാവിലെ മറ്റൊരു സ്‌കൂളില്‍ എസ്എസ്എല്‍സി പരീക്ഷ ഡ്യൂട്ടി എടുത്ത് അധ്യാപകര്‍ ഉച്ചക്കുശേഷം വാര്‍ഷിക പരീക്ഷ നടത്തിപ്പിനായി മാതൃസ്‌കൂളിലേക്ക് ഓടിയെത്തണമെന്ന് പ്രശ്‌നം പരിഹരിക്കാനാണ് പുതിയ ക്രമീകരണം.

എട്ട്, ഒമ്പത് ക്ലാസുകളിലെ പരീക്ഷക്ക് എസ്എസ്എല്‍സി പരീക്ഷ ഡ്യൂട്ടിക്ക് നിയോഗിച്ചിട്ടില്ലാത്ത അധ്യാപകരെ ആവശ്യാനുസരണം നിയോഗിക്കാനും നിര്‍ദേശം നല്‍കിയിട്ടുണ്ട്. അധികം പേരെ ഡ്യൂട്ടിക്ക് ആവശ്യമുണ്ടെങ്കില്‍ തൊട്ടടുത്ത എല്‍ പി/യു പി സ്‌കൂളുകളിലെ അധ്യാപകരെ നിയോഗിക്കണമെന്നും നിര്‍ദ്ദേശത്തില്‍ പറയുന്നു.