കെ റെയില് പദ്ധതിക്കെതിരെ സമരം കടുത്തതോടെ സംസ്ഥാനത്ത് സര്വേ നടപടികള് നിര്ത്തിവെച്ചു
കെ റെയില് പദ്ധതിക്കെതിരെ സമരം കടുത്തതോടെ സംസ്ഥാനത്ത് സര്വേ നടപടികള് നിര്ത്തിവെച്ചു. സംസ്ഥാന വ്യാപകമായി കെ.റെയിലിനെതിരെ പ്രതിഷേധങ്ങള് അരങ്ങേറുന്ന പശ്ചാത്തലത്തിലാണ് നടപടി. ഇന്ന് സംസ്ഥാനത്ത് ഒരിടത്തും സര്വേ ഉണ്ടാകില്ലെന്ന് ഏജന്സി അറിയിച്ചു. പ്രതിഷേധം ശക്തമായതിനാല് മുന്നോട്ട് പോവാന് കഴിയില്ലെന്ന് ഏജന്സി കെ റെയിലിനെ അറിയിച്ചു. എറണാകുളത്ത് സര്വേ നടപടികള് താത്കാലികമായി നിര്ത്തിവെച്ചിട്ടുണ്ട്.
പ്രതിഷേധക്കാര് ഉദ്യോഗസ്ഥരെ ആക്രമിക്കാനും കല്ലിടുന്നതിനുളള ഉപകരണങ്ങള് കേടുവരുത്താനും ശ്രമിക്കുന്നുണ്ട്. ഈ സാഹചര്യത്തില് കൂടിയാണ് സര്വേ നിര്ത്തിവെക്കാന് തീരുമാനിച്ചതെന്നും ഏജന്സി പറഞ്ഞു. അടുത്ത മാസം പത്ത് വരെ സര്വേ നടപടി നിര്ത്തിവെക്കാന് സിപിഐഎം നേതാക്കള് കെ റെയില് ഉദ്യോഗസ്ഥരുമായി സംസാരിച്ചുവെന്നാണ് പുറത്തുവരുന്ന വിവരം.
അതേസമയം, സംസ്ഥാനമൊട്ടാകെ സര്വേ നടപടികള് നിര്ത്തിവെച്ചു എന്ന വാര്ത്ത കെആര്ഡിസി നിഷേധിച്ചു. സര്വേ നിര്ത്തിവെക്കാന് തീരുമാനിച്ചിട്ടില്ല. ജില്ലകളിലെ സാഹചര്യങ്ങള് വിലയിരുത്തി സര്വേ നിര്ത്തിവെക്കുന്നതിനെക്കുറിച്ച് ആലോചിക്കും. പ്രതിഷേധം കാരണം സര്വ്വേ നടപടികള് മുടങ്ങിയതാണെന്നാണ് കെആര്ഡിസി നല്കുന്ന വിശദീകരണം.പൊലീസ് സുരക്ഷ ഉറപ്പാക്കാനാകാതെ സര്വ്വേ തുടരാനാകില്ലെന്നാണ് എറണാകുളത്ത് സര്വ്വേ നടത്തുന്ന സ്വകാര്യ ഏജന്സിയുടെ ഉദ്യോഗസ്ഥരുടെ നിലപാട്. വനിതാ ജീവനക്കാരെ അടക്കം കയ്യേറ്റം ചെയ്യുന്ന സാഹചര്യമാണെന്ന് ഏജന്സി പരാതിപ്പെടുന്നു. ഇന്നലെ പിറവത്ത് സര്വ്വേ സംഘത്തിന്റെ കാര് ഉപരോധിച്ചത് വലിയ പരിഭ്രാന്തിയുണ്ടാക്കിയെന്നാണ് ജീവനക്കാര് പറയുന്നത്.
https://www.facebook.com/Malayalivartha
