തിരുവനന്തപുരം പാലോട് മദ്യപിച്ച് റോഡരികില്‍ ബോധംകെട്ട് വീണുകിടന്നയാള്‍ക്ക് കാര്‍ കയറി ദാരുണാന്ത്യം.. പാലോട് ബീവറേജസ് ഔട്ട്‌ലറ്റിന് മുന്നിലാണ് സംഭവമുണ്ടായത്. കരിമണ്‍കോട് തേക്കുംമൂട് മൂന്ന് സെന്റ് കോളനിയില്‍ താമസിക്കുന്ന സുന്ദരന്‍ ആണ് മരിച്ചത്. 52 വയസ്സായിരുന്നു.


ഇന്നലെ ഉച്ചയ്ക്ക് രണ്ട് മണിക്കാണ് അപകടം നടന്നത്. ബീവറേജസില്‍ നിന്ന് മദ്യം വാങ്ങാനെത്തിയവര്‍ കാര്‍ പിറകിലേക്ക് എടുത്തപ്പോള്‍ നിലത്തുകിടന്ന സുന്ദരന്റെ ശരീരത്തിലൂടെ കാര്‍ കയറിയിറങ്ങവേയാണ് ദാരുണാന്ത്യമുണ്ടായത്.

പുറകില്‍ ആള്‍ കിടപ്പുണ്ടെന്ന് ആളുകള്‍ വിളിച്ച് പറഞ്ഞെങ്കിലും കേട്ടില്ലെന്നാണ് വാഹനത്തിനുള്ളിലുണ്ടായിരുന്നവര്‍ പൊലീസിനെ അറിയിച്ചത്. ഇയാളെ ഉടനെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.


സുന്ദരന്റെ കുടുംബത്തെക്കുറിച്ചുള്ള വിവരങ്ങള്‍ ഇതുവരെ അറിവായിട്ടില്ല. മൃതദേഹം മോര്‍ച്ചറിയില്‍ സൂക്ഷിച്ചിരിക്കുകയാണ്. അപകടത്തിന് കാരണമായ വാഹനം കസ്റ്റഡിയിലെടുത്തു. അപകട സമയത്ത് വാഹനമോടിച്ചിരുന്നയാള്‍ക്കെതിരെ മനപൂര്‍വ്വമല്ലാത്ത നരഹത്യക്ക് കേസെടുത്ത് പോലീസ്.,