ചക്ക കൊണ്ടു വന്നതിനെ ചൊല്ലിയുണ്ടായ തര്‍ക്കത്തിനൊടുവില്‍ യുവാവ് വീടിന് തീയിട്ടു... മക്കളുടെ പുസ്തകങ്ങളും പത്താംക്ലാസുകാരിയുടെ ഹാള്‍ ടിക്കറ്റുള്‍പ്പെടെ കത്തി നശിച്ചു, പരാതിയെ തുടര്‍ന്ന് യുവാവ് അറസ്റ്റില്‍.

സഹോദരിയുടെ വീട്ടില്‍നിന്ന് അച്ഛന്‍ ചക്ക കൊണ്ടുവന്നതിനെ ചൊല്ലയുണ്ടായ വഴക്കിനെത്തുടര്‍ന്നാണ് യുവാവ് വീടിനു തീയിട്ടത്. മക്കളുടെ പുസ്തകങ്ങളും പത്താംക്ലാസ് പരീക്ഷയുടെ ഹാള്‍ടിക്കറ്റും വസ്ത്രങ്ങളുമെല്ലാം തീയില്‍ കത്തി നശിച്ചു.

അച്ഛന്റെ പരാതിയില്‍ പൊലീസ് മകനെ അറസ്റ്റ് ചെയ്തു. തൃശൂരില്‍ അവിണിശേരി ചെമ്പാലിപ്പുറത്ത് വീട്ടില്‍ സജേഷ് (46) ആണ് പിടിയിലായത്. ഞായറാഴ്ച രാത്രിയിലായിരുന്നു സംഭവം നടന്നത്.

സജേഷിന്റെ അച്ഛന്‍ ശ്രീധരന്റെ പരാതിയിലാണ് അറസ്റ്റ് ചെയ്തത്. പിടിയിലായ സജേഷിന്റെ രണ്ടു പെണ്‍മക്കളില്‍ ഒരാള്‍ പത്താംക്ലാസിലും ഒരാള്‍ എട്ടാംക്ലാസിലുമാണ് പഠിക്കുന്നത്. പത്താം ക്ലാസില്‍ പഠിക്കുന്ന മകളുടെ ഹാള്‍ടിക്കറ്റ് അടക്കമാണ് കത്തി നശിച്ചത്. സജേഷിന്റെ ഭാര്യ വിദേശത്താണ് ജോലി ചെയ്യുന്നത്.

അച്ഛന്‍ മകളുടെ വീട്ടില്‍നിന്ന് ചക്ക കൊണ്ടുവന്നതുമായി ബന്ധപ്പെട്ട് ഞായറാഴ്ച വൈകുന്നേരം തന്നെ തര്‍ക്കമുണ്ടായിരുന്നു. ഇതേ തുടര്‍ന്ന് സജേഷിന്റെ മക്കളെയും കൂട്ടി ശ്രീധരനും ഭാര്യയും മകളുടെ വീട്ടിലേക്കു പോയി. അതിനുശേഷമാണ് വീടിന് സജേഷ് തീയിട്ടത്.

ഈ വിവരം അയല്‍വാസികളാണ് ശ്രീധരനെ ഫോണ്‍ വിളിച്ച് പറഞ്ഞത്. ഉടന്‍ അഗ്നിരക്ഷാ സേനാംഗങ്ങളെത്തി തീ നിയന്ത്രണവിധേയമാക്കി.