എസ്ഡിപിഐ ലക്ഷ്യമിടുന്നത് ആര്‍എസ്എസിനെ അല്ല, ആര്‍എസ്എസ് അവരുടെ മാര്‍ഗം മുടക്കിമാത്രമാണെന്ന് തുറന്നുപറച്ചിലിന് പിന്നാലെ പോസ്റ്റ് മുക്കി എസ്എഫ്‌ഐ നേതാവ്. പട്ടാമ്പിയിലെ എസ്എഫഐ നേതാവായ സുധീഷ് തെക്കേതിലാണ് ഫേസ്ബുക്കിലൂടെ പരസ്യപ്രതികരണം നടത്തിയത്. എന്നാല്‍ സ്വന്തം പാര്‍ട്ടിയിലെ പ്രത്യേക വിഭാഗക്കാരുടെ എതിര്‍പ്പ് പോസ്റ്റിന് താഴെ കമന്റായി പ്രത്യക്ഷപ്പെട്ടതോടെ സുധീഷ് പോസ്റ്റ് പിന്‍വലിക്കുകയായിരുന്നു.

'കാവി മുണ്ടുടുത്തതിന്റെ പേരില്‍ കൊല്ലടാ അവനെ എന്നുപറഞ്ഞ് ആക്രോശിച്ച് അയാള്‍ക്കുനേരെ പാഞ്ഞ് മര്‍ദിക്കുന്നത് അയാളുടെ രാഷ്ട്രീയം ചോദിച്ചിട്ടല്ല. അവന്റെ കാവി മുണ്ടില്‍ തെളിഞ്ഞ അവന്റെ മതം, അതു തന്നെയാണ് ആ ആക്രോശത്തിന് പിന്നില്‍. എസ്ഡിപിഐ എന്ന തീവ്രവാദ സംഘടന ലക്ഷ്യമിടുന്നത് ആര്‍എസ്എസിനെ അല്ല എന്നതിനു ഇതില്‍ കൂടുതല്‍ എന്ത് തെളിവാണ് വേണ്ടത്. ആര്‍എസ്എസ് അവരുടെ മാര്‍ഗം മുടക്കി മാത്രം ആണ്'. സുധീഷ് ഫേസ്ബുക്കില്‍ കുറിച്ചു.

കാവിമുണ്ട് ഉടുത്ത യുവാവിനെ അള്ളാഹു അക്ബര്‍ മുദ്രാവാക്യം വിളിച്ചുകൊണ്ട് അക്രമിക്കുന്ന വീഡിയോ ഷെയര്‍ ചെയ്തുകൊണ്ടായിരുന്നു സുധീഷിന്റെ പ്രതികരണം. കഴിഞ്ഞ ദിവസം കൊല്ലപ്പെട്ട പോപ്പുലര്‍ ഫ്രണ്ട് നേതാവിന്റെ മൃതദേഹവുമായി നടന്നു നീങ്ങിയ സംഘമാണ് ആശുപത്രി വളപ്പില്‍ നിന്നിരുന്ന കാവിമുണ്ടുടുത്ത യുവാവിന് നേരെ കൊലവിളിയുമായി തിരിഞ്ഞത്. അള്ളാഹു അക്ബര്‍ എന്ന് പറഞ്ഞുകൊണ്ട് വിളിച്ചുകൊണ്ട് അയാളെ അക്രമിക്കുകയായിരുന്നു.

സൈബര്‍ ആക്രമണം ഭയന്ന് അദേഹം ഫേസ്ബുക്ക് പ്രൊഫൈലും ലോക്ക് ചെയ്തിരിക്കുകയാണ്.

ജില്ലയിലെ ഇരട്ടകൊലപാതകങ്ങളെ തുടര്‍ന്ന് മന്ത്രി വിളിച്ച സര്‍വകക്ഷിയോഗം ബഹിഷ്‌കരിച്ച് ബിജെപി. ജില്ലയില്‍ ബിജെപി പ്രവര്‍ത്തകര്‍ കൊല്ലപ്പെട്ടപ്പോള്‍ ആരും സര്‍വകക്ഷിയോഗം വിളിച്ചിട്ടില്ല. ജില്ലാ ഭരണകൂടം നടത്തുന്ന സമാധാനശ്രമങ്ങള്‍ പ്രഹസനമാണെന്നും ബിജെപി നേതാവ് സി.കൃഷ്ണകുമാര്‍ ആരോപിച്ചു.

സഞ്ജിത്ത്, ശ്രീനിവാസന്‍ വധകേസുകളിലെ മുഴുവന്‍ പ്രതികളെയും ഇതുവരെ അറസ്റ്റ് ചെയ്തിട്ടില്ല. രണ്ടുതരം നീതിയാണ് നടപ്പാക്കുന്നതെന്നും ബിജെപി ആരോപിക്കുന്നു. യോഗനടപടിയില്‍ തൃപ്തിയില്ലെന്നും പൊലീസ് അന്വേഷണം പോരെന്നും നേതാക്കള്‍ പറഞ്ഞു. മന്ത്രി കെ. കൃഷ്ണന്‍കുട്ടിയും സിപിഎം പ്രതിനിധിയായി യോഗത്തിനെത്തിയ എന്‍.എന്‍ കൃഷ്ണദാസും തമ്മില്‍ തര്‍ക്കമുണ്ടായി.

ഏലപ്പുളളിയില്‍ പോപ്പുലര്‍ഫ്രണ്ട് നേതാവായ സുബൈര്‍, ആര്‍എസ്എസ് മുന്‍ ശാരീരിക് ശിക്ഷണ്‍ പ്രമുഖ് എ.ശ്രീനിവാസന്‍ എന്നിവരാണ് 24 മണിക്കൂറിനിടെ കൊല്ലപ്പെട്ടത്. ഇതോടെ കനത്ത പൊലീസ് കാവലിലായി പാലക്കാട് ജില്ല. ഇരുചക്രവാഹനങ്ങളില്‍ പിന്നില്‍ പുരുഷന്മാര്‍ക്ക് സഞ്ചരിക്കാന്‍ നിയന്ത്രണമുണ്ടായി. അതേസമയം സര്‍വകക്ഷിയോഗം അവസാനിച്ചു. ബിജെപി വന്നത് ഇറങ്ങിപ്പോകാന്‍ തീരുമാനിച്ചാണെന്നും യോഗത്തില്‍ തര്‍ക്കമൊന്നും ഉണ്ടായില്ലെന്നും മന്ത്രി കെ.കൃഷ്ണന്‍കുട്ടി അഭിപ്രായപ്പെട്ടു. നടന്നത് തീവ്രവാദസ്വഭാവമുളള ആക്രമണമാണെന്നും മന്ത്രി പറഞ്ഞു. ഇത്തരംസംഭവങ്ങള്‍ ആവര്‍ത്തിക്കാതിരിക്കാന്‍ വിട്ടുവീഴ്ചയില്ലാത്ത യാതൊരു കരുണയുമില്ലാത്ത പൊലീസ് നടപടിയെടുക്കുമെന്നും ജനങ്ങളുടെ ഭീതിയകറ്റുകയാണ് ലക്ഷ്യമെന്നും മന്ത്രി വ്യക്തമാക്കി.