ചെയര്‍മാന്റെ ഉത്തരവ് മറികടന്ന് സമരക്കാര്‍ ഇന്ന് വൈദ്യുതി ഭവന്‍ വളയും.... വൈദ്യുതി ബോര്‍ഡില്‍ സമരം ചെയ്യുന്ന സിപിഎം അനുകൂല ഓഫീസേഴ്‌സ് അസോസിയേഷനു പിന്തുണയുമായി സമര സഹായ സമിതിയുടെ നേതൃത്വത്തില്‍ ഇന്ന് വൈദ്യുതി ബോര്‍ഡ് ആസ്ഥാനമായ പട്ടം വൈദ്യുതി ഭവന്‍ ഉപരോധിക്കും.

സമരം വിലക്കിക്കൊണ്ട് ബോര്‍ഡ് ചെയര്‍മാന്‍ ഉത്തരവിറക്കിയെങ്കിലും ഇത് അനുസരിക്കേണ്ടതില്ലെന്നാണ് ഓഫീസേഴ്സ് അസോസിയേഷന്റെ തീരുമാനം. ആയിരത്തോളം പേര്‍ പ്രതിഷേധത്തിന്റെ ഭാഗമാകുമെന്നാണ് വിവരം. സമരം തീര്‍ക്കാനുള്ള ഉത്തരവാദിത്തം മാനേജ്മെന്റിനാണെന്നും സമരക്കാര്‍ പറയുന്നു.



സ്ഥലമാറ്റ ഉത്തരവ് പിന്‍വലിക്കണമെന്നാവശ്യപ്പെട്ടുള്ള കെ.എസ്.ഇ.ബി യിലെ ഇടത് സംഘടനയുടെ സമരം ശക്തിപ്പെടുത്തുന്നതിന്റെ ഭാഗമായിട്ടാണ് വൈദ്യുതി ഭവന്‍ വളയുമെന്ന് സമരക്കാര്‍ പ്രഖ്യാപിച്ചത്. സമരം വിലക്കി ചെയര്‍മാന്‍ ഇറക്കിയ ഉത്തരവില്‍ സമരത്തിന്റെ ഭാഗമായാല്‍ അച്ചടക്ക നടപടിയുണ്ടാവുമെന്ന മുന്നറിയിപ്പ് നല്‍കിയിട്ടുണ്ട്.


മന്ത്രി കെ. കൃഷ്ണന്‍കുട്ടി ഇന്നു തിരുവനന്തപുരത്ത് എത്തും. മന്ത്രി പാലക്കാട് സര്‍വ കക്ഷി യോഗം വിളിച്ചിരുന്നതിനാല്‍ ഇന്നലെ നടത്താനിരുന്ന യോഗം ഇന്നത്തേക്കു മാറ്റിയിരുന്നു.
എന്നാല്‍ മന്ത്രി കെ. കൃഷ്ണന്‍ കുട്ടി ഇന്ന് വിളിച്ച യോഗത്തില്‍ സംഘടനാ നേതാക്കള്‍ പങ്കെടുക്കും. സമരം രമ്യമായി പരിഹരിക്കുക എന്ന ആവശ്യം മാത്രമാണ് തങ്ങള്‍ക്കുള്ളതെന്ന നിലപാടിലാണ് ഇടത് സംഘടന.

വര്‍ക്കര്‍മാരില്‍ നിന്ന് ലൈന്‍മാന്‍മാരായി പ്രമോഷന്‍ നല്‍കുന്നതിലെ നിയമ പ്രശ്‌നം സംബന്ധിച്ച് ചര്‍ച്ച നടത്താനായി അംഗീകൃത തൊഴിലാളി സംഘടനകളുടെ യോഗം ഇന്ന് ഉച്ചകഴിഞ്ഞ് മൂന്നിന് നടക്കും. അതിനുശേഷം ഓഫീസര്‍മാരുടെ സംഘടനാ നേതാക്കളുമായി ചര്‍ച്ച നടക്കും.

ഓഫീസര്‍മാരുടെ സംഘടന ഉന്നയിച്ച പ്രമോഷന്‍, സസ്‌പെന്‍ഷന്‍ പിന്‍വലിക്കല്‍ എന്നിവ നടപ്പാക്കിയതായും ഇനിയും എന്തെങ്കിലും പ്രശ്‌നമുണ്ടെങ്കില്‍ ചര്‍ച്ച ചെയ്യാമെന്നും അപാകതയുണ്ടെങ്കില്‍ പരിഹരിക്കാമെന്നും മന്ത്രി വ്യക്തമാക്കി.